مداهمه حقيقيه لمنزل صديق لي
السلام عليكم ورحمة الله وبركاته
اللي هحكيه ده مش قصة متألفه دا حصل حقيقي
امبارح الساعه 2.5 صباحا عدى من المنطقه عندنا 3 او 4 عربيات للشرطه ودخلوا على منزل صديقي المنزل مكون من 3 ادوار ونزل من العربيات عدد قليل جدا من المباحث وامناء الشرطه المعروفين في المنطقة عندنا
والباقين كلهم مقنعين مش باين منهم غير العنين والانف ووقف مجموعه امام كل شقه واقتحموا الشقق في وقت واحد بعد كسر الابواب والحوار اللي دار بين صديقي وبين اول واحد شافه في الشقه
صديقي : ايه ده ايه ده فيه ايه
الضابط : اصبر شويه
صديقي :اصبر ايه ياعم فيه ايه وعايزين ايه وفي حد يدخل بيوت الناس بالطريقه دي
الضابط :قولتلك اصبر شويه
صديقي : يعني انتوا ترضوا حد يدخل عليكم كده طب اقف ياعم انت وهوا مكانك وفهموني فيه ايه
الضابط : انت متقدم فيك بلاغ انك انت وواحد من اخواتك عندكم سلاح وبتضربوا نار فوق السطح باستمرار وهعايزين نفتش الشقه .
وبالمناسبه ياجماعه الحوار ده دار امام الحجرة اللي دخلت فيها زوجت صديقي واولاد والباقين كانوا بيفتشوا في باقي الشقه
صديقي : ثانيه واحد اخرج المدام
الضابط : خرجها
زوجة صديقي لبست طرحه علشان تغطي شعرها وصديقي بيخرجها هما دخلوا على طول وزوجة صديقي قالت ممكن ثانيه واحده البس النقاب ورد عليها الضابط
الضابط لو عايزة تعملي حاجه اعمليها واحنا واقفين.
صديقي خد زوجته ونزلها تحت في شقة والدته
الضابط : انت عندك سلاح ناري
صديقي : لا ماعنديش اي اسلاحه
واحد من اللي بيفتشوا دخل المطبخ وجاب 4 سكاكين وخرج وقال
ايه دول
صديقي سكاكين انت جايبها من المطبخ هتكون ايه يعني الضابط لقى فيهم سكينة شاورمه وقال للي جابهم من المطبخ خد ديه وسيب الباقين
وهما بيفتشوا لقوا فوق الدولاب سكينه كبير بتاعة الدبيح والضابط قال لصديقي ايه ده بقى
صديقي سكينة دبيح وكنت واقف بيها ايام الثورة في الشارع علشان معندناش سلاح نقف بيه
الضابط طب البس هدومك وتعالى
صديقي قالوا اما اطمن على اخواتي الاول ونزلوا للدور اللي تحتهم
والضابط قال لصديقي انت هتزل كده
صديقي : اه هنزل كده ( صديقي كان بالبوكسر فقط)
نزلو للدور اللي تحت واخوه كان عنده مسدس رش قديم نمره واحد وبايظ مش شغال وعنده كرباج سوداني متعلق على الحيطه
وصديقي لبس هدومه هوا واخواته ونزلو معاهم واخوا صديقي الصغي اسمه مش معهاهم وهما في الشارع قالهم انا هاجي معاكم ( اخوا صديقي الصغير عمره 22 سنه ) وصديقي 33 وخوه الكبير حوالي 39 سنه
واحد من الضباط بتون العمليات الخاصه اللي هما مقنعين بيكلم اخو صديقي بأسلوب وحش الواد مسك فيه والاهالي اتلمت عليهم وكانت هتبقى مجزرة صديقي واخوه الكبير مشوا الناس وهدوا الموضوع واللي راح معاهم اخو صديقي الكبير والصغير وصديقي مارحش معاهم.
والنهارده الصبح اخدوا حبس اربع ايام على زمة التحقيق لحين الكشف على السلاح هل هوا معدل وتم تغير الماسورة ام لا .( دا اللي هوا المسدس الرش )
السؤال بقى هنا اللي بيحصل ده حرام ولا مش حرام
والناس تاخد حقها من الحكومه ازاي
مع العلم ان الناس دي اول مره تدخل قسم شرطه
ولا تحسبن الله غافلا عما يعمل الظالمون
__________________
وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ
|