رد: الناس كلها بتفتي
السلام عليكم
أستاذ نيازي أولاً إن شاء الله تتحل وبندقيتك ترجع أحسن من الأول كمان ومتزعلش نفسك قوي كده
ثانياً وده المهم إنت ليك حق طبعا تزعل من الموقف اللى حصل بس إسمحلى أنصحك نصيحه وهي إنك تروح تانى لأستاذ شريف.. أنا معرفوش بس من كلام الناس عليه هنا واضح إنه إنسان أمين ...
هتسأل طبعا سؤال منطقي وهوا: الموقف اللى حصل معاك ده كان إيه سببه؟؟
بص يا سيدي الإحتمالات كتير ومنها:
- إحتمال إنه كان مشغول ومش مركز (ده لو السوسته كانت مش مناسبه للبندقية)
- وإحتمال يكون مضغوط نفسياً لأن زي ما الناس قالت محله إتسرق وبالتالى هيكون مش مركز برضه وحالته متسرش حد
- وإحتمال يكون إنسان مش أمين والناس اللى بتشكر فيه دول كلهم كانو صدفه وحظهم كان حلو
- واحتمال تكون الاسعار اللى بيشتري بيها تكون زادت فبالتالى سعره بقى أغلى من الناس اللى عندهم بضاعه بسعر قديم
طيب تعرف إزاى هوا فعلا إنسان وحش وظلمك ولا هوا انسان كويس وده غلط غير مقصود أو مكانش غلط وهوا ليه عذر؟؟؟؟؟؟؟
تروحله تانى وبهداوه شديده إشرحله الموضوع وخليه يفهمك... وساعتها تقدر تحكم عليه فعلاً من رد فعله... لأن التاجر مهما كان فهو بشر زيه زي أي حد سعات بيكون مزاجه حلو ورايق وسعات بيكون متعكنن ومتقدرش تحكم عليه من موقف واحد لازم تديله فرصه عشان تقدر تحدد هوا كويس ولا لأ.. فلازم تروحله تانى
توكل على الله وروح تانى وإن شاء الله خير والراجل يطلع زي ما بيقولو عنه كويس ويكرمك ويعملك اللى انت محتاجه وزياده
وإبقى قول لنا عملت إيه عشان نتطمن عليك وعشان نوصل للحقيقه بدون تسرع
وفي الآخر مهم جدا نستفيد من تجارب الآخرين بس غلط جدا اننا نعتمد عليها فقط
فلازم كلنا قبل ما نجيب حاجه نكون عارفين سعرها عند اكتر من محل ونفهم لو في فرق فى الاسعار ايه سببه وبعد ما كل الامور تبقى واضحه... الواحد يتوكل على الله ويقضى مصلحته وهوا فاهم بيعمل ايه وميعتمدش فقط على كلام الناس
|