اقتباس:
المشاركة الأصلية كتبت بواسطة BERETTA M92FS
هل شاركت فى اللجان الشعبية ؟ ممكن تحكى تجربتك ؟
استفدت منها ايه ؟
هل عاد الامان فى منطقتك ؟ هل مازلتم تسهرون على الحماية ؟
هل صادفت مواقف صعبة ؟ هل كنت تتمنى وجود سلاح نارى مع احد منكم ؟
موضوع مؤلم....معلش....لكنه لم ينتهى بعد
|
احييك عالموضوع الجميل ده و فكرة اكتر من رائعة ..
نعم شاركت فى اللجان الشعبية (امال الاجازة راحت ف ايه)
من تانى يوم فى موضوع اللجان الشعبية قسمنا اللجنة مناوبات خلينا الناس الكبار اللى مش بينزلو شغل او مش عندهم مشاوير ينزلو نبتشية الصبح (من 8 الصبح الى 2 الظهر) و اللى يتعب يكلم حد من الفاضيين ينزل مكانه (بعد ما كل شباب و رجالة المنطقة خدو ارقام بعض) و النبتشية التانية تستلم منهم من 2 الى 8 او 9 بليل (دى كانت اهدى فترة و اقل الفترات تعب) نيجى للنبتشية التالتة و دى كانت للشباب اللى لسه بصحتهم من 9 بليل لحد 7 او 8 الصبح و دى كانت اكتر فترة ملائمة ليا بحكم مواعيدى و الشغل و كده (اضافة لأنى كائن ليلى
كنا نتجمع كل يوم فى معادنا و نتمم على الحضور (كان فى كشف بالاسامى و ارقام الموبايلات للحضور) و البرد الله ينور بوظ عضم الواحد و النار بوظت صدرنا برضو
منطقتنا الى حد ما كانت شبه مستقرة اللهم الا تلات مرات حصل قلق اول مرتين كانو من عربيات الاولى ميكروباص فيه حوالى 5 بلطجية او 6 بس الحمدلله ملحقوش ينزلو من العربية و هربو
المرة التانية كانت عربية ملاكى الكمين اللى قبلنا شك فيها و لما حاولو يفتشوهم جريو بالعربية و خبطو شاب من اللجنة بس البركة فشباب المنطقة و كل من كان معاه سلاح قفلنا لهم السكك و سيبنالهم طريق واحد (يطلعك على وحدة عسكرية جمبنا
)
بالنسبة للمواقف الصعبة اظن محدش من اللى نزلو اللجان الشعبية فكر ان فى حاجة هتكون صعبة و السبب بسيط 95% من شباب اللجان الشعبية كانو متسلحين بشوم او اسلحة بيضاء و حاجات بسيطة عارفين انهم هيواجهو بيها اسلحة نارية يعنى يا قاتل يا مقتول و نية الشهادة خالصة لربنا
و اسمحلى مهما كان الواحد اتعرض لموقف صعب كفاية اوى انك تلاقى اهلك فى البيت نايمين و نفسيتهم الى حد ما هديت دى بالدنيا
نوصل لاخر سؤال
انا اتصدمت صدمة عمرى لما شوفت كمية السلاح اللى فمنطقتنا والله حاجة تفرح مسدسات 9 مم ميرى و مرخص و بندقية الى (بتاعت ظابط كبير والد صاحبى
و بندقيتين خرطوش منهم واحدة اتجننت بسببها pump action و خبراء المنتدى يعرفو قيمتها و فعاليتها
و اخيرا اسف انى طولت عليكو انتو اللى سألتو مليش دعوة