السلام عليكم ... ازيك ..
اولا .. اسلحة ضغط الهواء فيها منها كذا نظام .. ( سبرنج ) سوسته .. وهى تعتمد على قوة انضغاط النابض اوالسوسته .. ودى زى البنادق المشهوره فى مصر زى رمسيس ومعادى (المصانع الحربيه) .. وفى منها بنادق كسر زى الرمسيس وبنادق بعتله (ذراع للتعمير اما جانبيه او سفليه ) زى التل المجرى ... والبنادق اللى بتستخدم انابيب الغاز بتبقى ضعيفه نوعا ما وتستخدم لصغار السن لتعلم الرمايه ... النظام الثانى وهو (pcp) وهى بنادق تعتمد على مخزن للهواء سواء كانت بخزنه او بدون ... وتملأ بالمنفاخ او اسطوانة هواء ... وطبعا البنادق دى مش موجوده بس هى جباره ... ونظام النيترو بيستون ... ده النظام الثالث وهو نظام مبتكر فى آخر 10 سنوات وعمل طفره فى اسلحة ضغط الهواء ... وهو خليط من النظامين يعنى بتتعامل مع البندقيه القديمه (الشكل) بتكنولو جيا حديثه من الداخل ... والنظام ده ناجح جدا فى الخارج ... انا طولت فى الكلام عشان افهم حضرتك لكن ممكن نشرحها مع بعض بعدين لكن زى ماقلت حضرتك هى البندقيه والرشه بس (ده اللى عندنا فى مصر ) وان شاء الله بالمتابعه هتعرف اكتر واكتر ... اما بالنسبه للاماكن لو مبتدأ خليك مع النيل والاراضى الزراعيه والاشجار واحذر الاماكن السكنيه لغاية ماتتعلم عشان المشاكل ... ولازم تخرج مع حد يكون اصطاد قبل كده لو عايز تتعلم بسرعه ( انما ممكن طبعا تعلم نفسك بس الصبر ) وعشان الونس كمان ... مواسم الصيد دى لما حضرتك تضرب طيور مهاجره لكن احنا فى مصر ولله الحمد موجود طيور طول السنه ... ومتهيألى حضرتك مش هتضرب الا يمام وحمام ... على الاقل دلوقتى ... نيجى لحكاية لما توقع فريسه .... تعمل فيها ايه ؟؟؟ .
بص ياسيدى ... لما توقع يمامه (مثلا) لازم تلحقها بالسكينه اوام (حتى لو ماتت ) بس متنساش قبل ماتضرب تسمى وتكبر ... ولازم تدبح عشان هى ليها ناحيتين ... اول حاجه لازم عشان الشرع والحلال والحرام .
تانى حاجه علميه وهى عشان حمض البوليك اللى فى اليمام ... نيجى بقى للذبح .
قال رسول الله صلى الله عليه وسلم :" اذا ذبحت فأحسن الذبح " أنه يهتم بأن يسن الذابح شفرته «سكينه» حتى لا يؤلم ذبيحته .
وطبعا الكلام مش عايز شرح ... لازم يبقى معاك سكينه حاميه ويفضل تبقى 3 سم عشان انت فاهم التلكيك ... ولو ملقيتش يبقى سكينة مطبخ عاديه بس خليك فى الاحجام الصغيره ... وطريقة الدبح تمسك جسم اليمامه بايدك وتلف الدماغ على صباعك الكبير عشان تبين رقبتها وبعدين تدبح ... ومتشلش الماغ كلها عشان يفضل تدفق الدم ... يارب اكون عرفت افيدك ... وطبعا لو انا غلطان فى حاجه من الكلام ده ابقى سعيد لو حد من اخوانا الصيادين يفهمنا فين الغلط والصح بتاعه ايه ... تحياتى .