[glock800]

السلام عليكم يا شباب ،،

وقانا الله واياكم شر الحوادث ،، حبيت اشترك معاكم فى الموضوع الشيق وبالمناسبة اسمحولى احكيلكوا حكايه طريفة كان عندى حوالى 15 سنة وكان معايا ابن عمتى اصلنا كنا ساكنين فى بيت عيلة وكنا طالعين نصطاد هوا كان معاه بندقية نوريكا بتاعت جوز عمتى وانا كان معايا بندقية جامو شادو 1000 كانت هدية من والدى الله يرحمه
المهم روحنا نصطاد ورا البيت كان فى جنينة كبيرة اسمها جنينة الشلالات مشهورة فى منطة شرقى بالاسكندرية
واحنا طالعين من باب البيت كان فى راجل جارنا اسمه عم عماد الله يديله الصحة واحنا طالعين سلمنا عليه وقعد يدنا نصايح عشان نخلى بالنا ومنعملش كوارث بالبنادق المهم نزلنا الجنينة وكان فى كابل كهربا كبير كان واقف عليه كمية حمام كبيرة المهم قعدنا انا وابن عمتى طاخ طوخ نصطاد فى الحمام ورجعنا يجى ب10 او 12 جوز حمام على قد ماقدرنا نشيل وقابلنا عم عماد جارنا وكان فرحان اوى اننا اصطدنا الكمية الكبيرة دى من الحمام وطلعنا البيت وعزما العيلة على اكلة حمام محشى المهم بعد الاكل وقفت فى البلكونة شوية سمعت صوت خناقة كبيرة عند عم عماد فى البيت كان بيزعق لولاده المهم دخلت وقلت لوالدى الله يرحمه خرج هوا وعمى وجوز عمتى وراحوا لعم عماد يخبطوا على الباب فكروه بيتخانق مع حد غريب قالهم بقى على ( الكارثة ) عم عماد كان مربى حمام على السطوح بتاع بيتهم و اتارى ولاد عم عماد كانوا طيروا الحمام عشان ينضفوا الغية وانا وابن عمتى نزلنا حصدناه من الجنينة وكان فى الحمام اللى اصطدناه 3 حمامات من نوع معين المهم النوع ده الفرد منه يعمل حوالى 600 جنيه الكلام ده من حوالى 11 سنة ولكم ان تتخيلوا حجم المشكلة الى عملناها انا و ابن عمتى لجارنا عم عماد لانه كان بيحب تربية الحمام جدا وطبعا اولياء امورنا حاولوا يعوضوا الراجل عن خسارته وطبعا رفض وده كان اطرف موقف قابلنى وانا بصطاد لحد دلوقتى وفى نفس الوقت اكتر حاجة بتضايقنى لانى اتسببت فى مشكله كبيرة لراجل عزيز على قلبى جدا
وطبعا زى الباشمهندس طلعت ما قال اهم حاجة الامان ..

واتمنى ماكونش طولت عليكوا ،،،،

وتقبلوا مرورى ،،،،