رد: يا جماعة أنا صاحب محل فتح الله. محطة مصر. و فرع الدقي نادي الصيد. و للأسف كل الناس بتشتكي من فر
يا سيد محمد فتح الله
أنا أبدا لن أنسى ما حييت المعاملة التى تلقيتها فى محل حضرتك اللي في محطة مصر إسكندريه جنب مسرح الحبايب منذ 16 سنه... و ربما هذه أول مرة في حياتى أشارك هذه القصة مع اى مخلوق ... سنه 1995 كنت أنا لسه مخلص إعدادية و كانت هديتي البندقية ال bsa اللى لسه عندى لحد النهارده و كنت شاريها ب 660 جنيه من السجلابي ... المهم متتصورش فرحتي بيها وقتها قد إيه و كنت بحافظ عليها زي عينايا لأنها وقتها كانت غاليه جدا جدا و كنت امنيه غاليه عندي جدا.... و في أول طلعة ليا بالبندقية و مع أول يمامة أضربها و تقع سيبت البندقية على الأرض و جريت على اليمامة أمسكها و من كتر فرحتى مخدتش بالى إنى وقعت الحافظه بتاعت النشان الأمامي بتاع البندقية لما سيبتها على الأرض طبعا أنا معرفش أنه ممكن يتحرك و إنه فيه مجرى فكنت متخيل إنى كسرت النشان!!!... طبعا إدمرت فرحتى باليمامة و حزنت حزن شديد على البندقية و تخيلت إنها كدة بازط ... فرجعت على طول للسجلابي يصلحهالى ... فقالى روح فتحالله محطة مصر عنده و رشه و قطع غيار و بالفعل مشيت لمحل سيادتك العظيم و ٍسألت هل ممكن إصلاحها فقالوا لي أيوه ممكن و طلعلي حافظه جديدة و قالى هتكلفك 5 جنيه !!!
فطرت من السعادة و إطمئن قلبي انه يمكن إصلاح البندقية و كانت مشكلتى الوحيدة اني معييش خمسه جنيه !! و المصرووف وقتها كان نص جنيه بس !!! يعنى مستحيل اعرف أجيب خمسه جنيه ... المهم فضلت أحووش فلوس لحد ما كملت الخمسه جنيه يمكن بعد شهر و رحت من بدرى جدا للمحل بتاع سيادتك و ماكانش حتى لسه فاتح و فضلت مستنى لحد ما حضراتكم فتحتم و لما دخلت و طبعا معايا البندقية و طلبت الحافظة و طلعت الخمسة جنيه... المهم السيد المحترم اللي كان موجود أمرنى إنى انتظر .. و بالفعل إنتظرت .... و بعد شويه راح مطلع لى حافظة قديمة و معووجه جدا شبه مطبقة و مجرحه جدا و حشرها بالعافيه فى النشان و خد الخمسة جنيه !!!!
طبعا أنا إتصدمت و معرفتش أعمل إيه !!! فطلبت منه ممكن واحدة جديدة زى اللى شفتها قبل كدة؟؟ قالي مفيش غير هى دي وسابنى و راح معرفش يعمل ايه !!! انا طلعت برة المحل و وقفت قدام الباب أفكر مش عارف أعمل أيه!!! و بعد شويه دخلت مرة تانيه و طلبت بمنتهى أدب الأطفال ولاد الناس من فضلك ياعمو انا عاوز واحده جديدة عشان ديه معووجه!!! راح السيد المحترم صرخ فى واجهى و قال لي " إمشيي يا ولااا من هنا بقى متصدعناش!!! " فطبعا مشيت من قدام باب المحل و فضلت راكن على عربية مصدوم من طريقة المعامله و عمرى ما إتعرضت لموقف مشابهه و حزين على البندقية و على الخمسة جنيه تحوييشه العمر و حاسس بالظلم و الإهانه...
المهم فضلت واقف قريب من المحل شايل بندقيتى على كتفى و الجو بقى حر شديد و محطة الرمل بقيت زحمة جدا و حسيت ان كل الناس بتبص عليا و شاعر بالضعف و قله الحيله و مش عارف أعمل إيه فضلت كدا حوالى ساعتين إلى ان استجمعت جميع شجاعتى و دخلت المحل مرة أخرى و طلبت بمنتهى الأمل و الرجاء الخمسة جنيه بتاعتى و قلت أنا خلاص مش عاوز النشان... راح السيد المحترم نظر لى نظرة حنق و بكل حنق راح ساحب رف من عنده و مد إيده و طلع حافظة جديدة و ركبها فى البندقية !!!!!!
وقتها فرحت بالنشان الجديد و تناسيت عملية النصب و الإذلال اللي تعرضت لها ... و لكنى مع مرور الزمن لم انساها و عرفت انى كنت فريسه نصب و جشع و طمع تاجر قال ده عيل و نضحك عليه في اى حاجة...فيبدوا ان الأساس عندكم هو عدم الأمانه و الغش من أجل المكسب السريع و غير مهم مصلحة الزبون.
فربما يرى البعض رسالتك على إنها دلاله على إحترامك .... و لكن أيضا سيرى الكثير من الناس الغرض الحقيقي من الرساله الواضح من بين السطور و هو محاولة الحفاظ على البقية الباقية من الزبائن و تحسين سمعتكم لتحقيق مكسب شخصى ليك و لمحلك حتى لو على حساب أبناء عائلتك و تبرئك منهم بقولك " للأسف تحت اسم واحد عائلة واحدة."
على فكرة المنتدى هنا أغلبه ناس بتنصح بعضها و تفيد بعضها من أجل تبادل الخبرات و المعلومات و تبادل القصص و المغامرات عن هوايه الصيد أو رياضه الرمايه التى يعشقها الجميع في المنتدى كما يوجد أيضا العديد من التجار المحترمين الملتزمين بهذا العقد الإجتماعي بين الاعضاء و أصبحوا أصدقاء و مصدر ثقة و خبرات... ولا مجال لمن يحاول الإستخفاف بعقول و خبرات الأعضاء من أجل تحقيق مكاسب شخصية... بصراحة انت اول واحد أشوفه يدخل و يقول انا فلان الفلانى و مليش دعوة بكل أبناء عائلتى الفلانيين ... ايه الغرض من هذة الرسالة و ايه الفايدة اللي هتعود على اى من الاعضاء بمعرفتنا انك من عيله فتح الله و ملكش دعوة بيهم.. غير ان الفايدة تعود عليك و على محلك؟؟!!!
خد منى انت بقى النصيحة " عاوز تستفيد؟؟.... فكر الأول إزاى تفيد و انت هتستفيد
__________________
Massoud 
|