أول وأسرع طلعة لصياد جديد

[dr_mohasan]

أول طلعة لصياد جديد
الطلعة كانت سريعة جدا , استغرقت دقيقة واحدة فقط , كنت باجرب البندقية على هدف حى بعد أيام من التدريب على الأهداف المرسومة عالورق وظبط الناشينكاه.
العصفور البائس ده كان حظه وحش إنه صادف معايا حظ المبتدئين , بس برضه هو غلطان , هو شايفنى معايا بندقية يقوم ييجى يقف أمامى على بعد حوالى 12 - 15 متر , ده كلام !!!
عموما حظه كده بقى
انا نظفته وشايله عندى فى الفريزر , وبمناسبة انه أول صيد , انا هاعمل عليه عزومة لجميع أعضاء المنتدى , بس ياريت يا جماعة الجميع يحضر وبلاش الأعذار وبلاش حد يقوللى عامل ريجيم , والدكتور مانعنى من الدسم والكلام ده , و هازعل لو ماجيتوش , وأهو عصفورة هنية تكفى 100
المهم , ميعاد العزومة هايكون فى الإجتماع القادم لأعضاء المنتدى إن شاء الله

السلام عليكم وفى انتظار تانى طلعة بإذن الله , وربنا يسهل ممكن الصيد يكون كبير أوى وربنا يرزق بيمامة مثلا, (مش عارف ساعتها الواحد من الفرحة ممكن يعمل ايه)

------------------------------------------------
طبعا ده موضوع انا عملته هزار مع إخوانى الكرام , ولأنى فعلا فرحان ببداية هذه الهواية الجميلة والتى لم أكن أعرف عنها أى شىء من 3 شهور فقط , وبصراحة أول ما حببنى فى هذه الهواية هو روح التعاون والأخوة التى رأيتها بين أعضاء هذا المنتدى الجميل , وأخص بالشكر سيادة القنصل فقد كان لمشاركاته فى المنتدى أثر هام فى نفسى وذلك للمستوى العالى و الراقى جدا من لغة الحوار التى يتمتع بها , أدامك الله لنا فى أفضل صحة وعافية
كما أشكر جميع إخوانى وزملائى فى المنتدى على مشاركاتهم ومعلوماتهم التى استفدت منها كثيرا

وأخيرا , إوعوا تنسوا العزومة هههههههههههههههههههههههههههههههههههههههه