موقف غريب حصل مع أحد أصدقائى

[ahmadkader]

أحد أصدقائى من اللى ميعرفوش حاجة فى السلاح غير الضغط على الزناد ، هو راجل دكتور معانا و مسالم و عمره ما مسك حتى مسدس لعبة ،، طلع فى دماغه من يومين يشترى مسدس صوت ، هو أصلا كمان ميعرفش أنهى محل سعره أحسن من التانى ، الراجل خد بعضه و نزل على محل فتح الله وسط البلد ، وقف طبعا مع الحشود اللى على الباب يتفرج على الثلاث أربع مسدس اللى فى الفترينة ، عجبه ال P29 كأى هاوى جديد ، إبتدا يسأل على ثمنه و لقاه ب 1200 جنيه على حد تعبيره ،، حتى الآن مافيش مشاكل. الغريب بقى إن فيه واحد من اللى واقفين قالله:
" تحب أجيبهولك ب 700 جنيه " ؟؟؟ ،، صاحبنا إتمخول .. ده كدا بنص التمن ؟ بس الصراحة بيقوللى قلقت من الراجل لا يطلع نصاب و اللا حاجة ؟ الراجل حس علطول ،، قالله الحاجة فى العربية اللى راكنة دى .. و شاورله على العربية ، صاحبنا راح معاه و وراله ترسانة أسلحة كلها تركى و بأسعار على حسب مابيقول أغلى حاجة ب 900 جنيه ، طبعا هو مبيعرفش فى الموديلات ، المهم أخينا لأنه مابيفهمش فى الحاجة دى برضه قلق لحسن تكون الحاجة يا بايظة يا معيوبة و مشتراش منه و قاله طيب شكرا ، و هو ماشى و إداله ظهره ، تخيلوا إيه اللى حصل ؟ 200 جنيه نزلوا فى ثانية ، يعنى ال p29 بقى ب 500 جنيه ، صاحبنا برضه قلق زيادة و مشى و سابه

اللى لفت نظرى فى الموضوع إن صاحبنا و لا عمره فهم فى السلاح و لا عمره دخل على المنتدى بس قال جملة حكمة:
قاللى " بص البضاعة اللى معاه دى يا فيها عيب يا تقليد "

يعنى الإنسان البسيط فهمها لوحده فى خمس دقايق ، و إحنا يا خبرة عمالين بقالنا يومين نضرب أخماس فى أسداس ،، صحيح يوضع سره ف أضعف خلقه