استخراج رخصة لاول مرة بصورة حقيقية وليست قانونية

[The last knight]

اخوانى الاعزاء
بعد التحية
حانتكلم انهاردة عن موضوع الرخصة بس بصورة حقيقية وليست قانونية يعنى ايه؟
طبعا الموضوع مفتوح قبل كده واعلى نسبة مشاهدات فيه عشان كدة ححاول اكون مختلف عشان ما أطيلش عليكم.انا قلت فى العنوان استخراجها لاول مرة عشان لو المطلوب طلب استبدال او اضافة حاتبقى قصة ثانية خالص.
طبعا حضراتكم عرفتم ايه الاوراق المطلوبة من فيش-صور-شهادات صحية-خطاب تدريب.....وطبعا مبررات الترخيص اللى هى السجل التجارى وقائمى الاملاك والحيازة الزراعية فى منطقة نائية الى اخره.
دى الاوراق المطلوبة لاستخراج الرخصة بس مش معنى كدة انك لما تقدمها تاخد الرخصة عشان نحسم موضوع هل النظام اختلف قبل او بعد الثورة.النظام هوهو ومفيش رخصة من غير الاوراق دى.
طيب واحد اخد الاوراق دى حايروح القسم التابع ليه وحايقدم حياخد ورقة بتاعة كشف العائلة يملاها ياريت مايكتبش اى اسم هو شاكك ان عليه حاجة حايرد واحد يقولى ماهمة حايعرفوا حاقوله اسمع للاخر المفروض ان ورقك بكشف العائلة تروح للمديرية بعد العرض على رئيس المباحث وهنا احب اقولك ان لو حضرتك معاك واسطة حايوافق رئيس المباحث انه يبعت الورق المديرية بس حايمضى ان حضرتك تتمتع بالحماية الشرطية يعنى هو مش موافق عليك بس لو المديرية عايزة توافق ماشى .الورق لو راح كده للمديرية حايقعد حوالى شهر او شهر ونص بس عشان ورق كشف العائلة طب ايه الحل نرد بقى على اخونا اللى كان بيسأل.
لما تاخد كشف العائلة تطلع بيه على المديرية للشخص اللى حايستلمه فى الظروف العادية طبعا مع واسطة حايخلص الكشف ده فى 45 دقيقة عشان يتمضى من كل الادارات اللى بالك فيها.تخلصه وترجع تحطه مع الورق ويتقدم كدة لرئيس المباحث خلاص تبقى وفرت شهر ونص.
تانى يوم الملف ده حايتصدر للمديرية حايروح التحريات بس المرة الدى التحريات عنك انت ومبرراتك ممكن الملف مايرجعش القسم تانى وممكن يضيع وممكن ياخد من 6-12 شهر طبيعى جدا لو رجع ولما يرجع طبعا اما ان انت راجل كلامك مظبوط او انه مش حايرجع اصلا طب ايه الحل
اول مايوصل التحريات حضرتك حاتاخد واسطتك وتروح والخطوة دى مش حتاخد اكتر من 5 دقائق
ملحوظة صغيرة قبل ما اكمل لما باقول واسطة يعنى واسطة يعنى فيه لواء بيلم رخص عربيات ميساويش وفيه عميد مثلا فى حتة تانية يساوى اكتر منه يعنى الرتب حت لو متساوية عمرها مابيبقى ليها نفس الصلاحيات وياريت محدش يقولى امال الثورة عملت ايه والكلام ده.
بعد ما التحريات حاتمضى لازم يتعرض الملف على رئيس مباحث الجناءية لبلدك لو مضى تبقى انت اوشكت على الحصول عليها لو ممضاش خلاص انسى وطبعا انت واخد رفض من رئيس المباحث بتاعك اصلا اما لو تجاوزت الخطوة دى فالملف حايرجع القسم لنه لازم يتمضى من رئيس المباحث لان رئيس مباحث المدينة مضى يبقى هو لازم يمضى.
يتم تصدير الملف تانى للمديرية لقسم الرخص وغالبا ما حايمضى رئيس قسم الرخص لانك تخطيت مرحلة كبيرة فاضل ايه طيب؟
يتم العرض على مساعد المدير ثم المدير شخصيا واللى ممكن يلغى كل اللى احنا قولناه بجججججرة قلم او انى اقولك مبروك.لفة المدير ومساعد المدير دى تاخد حوالى اسبوع 10 ايام.
بعد كدى حاتاخد تصريحك من المديرية ومبروك.
يبق الرخصة ممكن تاخد اسبوعين ووممكن سنة ووممكن ماتتعملش.
ياريت ماحدش يسأل على المبررات لانها ضرورية طبعا عشان كل الناس دى تمضى
على فكرة اللى معاهم ترخيص سلاح دفاع فى مصر 130000 يعنى لو قسمتهم على 80000000
حاتلاقى واحد فى الالف بيطلع الرخصة.
ياريت يكون الموضوع ده افاد الناس وكل واحد يعرف هو فى انهى مرحلة ويعرف اذا كان حاياخدها ولا لا عشان انا شايف ان فى موضوعات اخدت اكتر من وقتها خاصة فى الموضوع بتاع الاستخراج وكل واحد يعمل خطوة يجى يقولها بقالنا شهور .يارب اكون وفقت انى الخص لكم الموضوع .
وماعرفش اذا كانت الادارة حاتسيب الموضوع ولا تلغيه لان ممكن يقولوا انه مشابه ويمكن يثبتوه.
ارجو ان اكون افدتكم والسلام عليكم ورحمة الله وبركاته