تحويل الصوت الى حى نارى

[ahmadkader]

الناس اللى بتشتغل فى الموضوع ده يا جماعة ناس محترفة مش ناس هاوية زى حالاتنا كدا ، و يؤسفنى إنى أقولكم إنه الموضوع ده علميا خطر ، و لكنه عمليا بيحصل و فيه ناس أكل عيشها من ورا الكلام ده ، و فيه بلاد فى مصر متخصصة فى تحويل المسدسات و خلافه ، السؤال هنا بقى ، ليه ؟ يا جماعة ده اللى معاه سلاح حى مرخص بقى يسيبه فى البيت إتقاءا للمشاكل ، ممكن ببساطة الواحد يتهور و يزهق روح فى مجرد خناقة عادية ، البلد مش مستقرة يا جماعة و الإشاعات كتير ، و السلاح شاطر و بيقوى القلب ، رجاءاً يا جماعة نستعمل السلاح اللى ربنا ميزنا بيه على باقى مخلوقاته ، نستخدم عقولنا ، و صدقونى بعقولنا سوف نتجنب الكثير و الكثير من المشاكل ، طيب أنا هحكيلكم حكاية حدثت لأحد أقاربى ممكن يملكون بندقية آلى و بيتحرك بيها فى شنطة عربيته كمان ، الراجل إتخانق معاه سائق ميكروباص و شتمه و مسح بيه الأرض و نزل و الخناقة إمتدت للتشابك بالأيدى و على حسب كلام الراوى الواد بتاع الميكروباص راح جابله شومة من العربية و إتهجم عليه بيها ، طبعا أخينا معاه آلى فى الشنطة ، بيحلفلى إنه طلع تماما فكرة الآلى دى من دماغه ساعتها و لو حتى للتهويش لأنه عارف إن السلاح شاطر و غدار ، و إنتهى الموضوع و خلص على خير من غير دم ، سألت نفسى و هو بيحكيلى ، طيب تفتكر لو الواحد مطرحه و معاه الطبنجة ساعتها ، كانت ممكن تبقى إيه النتيجة ؟ و الموضوع لا فيه سرقة ولا حاجة ، آه صحيح السواق كان بيبلطج عليه ، بس الموضوع ميستاهلش ضرب نار ، يا جماعة لوجه الله وحده و بحق الأيام المفترجة نسيب البلد تهدا بأقل الخسائر