تقييم لكل انواع الرش بالتجربه الشخصيه -هام-

[amlabib]

مساء الخير على احلى اعضاء و احلى منتدى انا قررت اعمل الموضوع ده عشان افيد الاعضاء بتجربتى بدل ما كل واحد يجرب كل انواع الرش. انا استخدمت فى الاختبار حبيبتى النوريكا و عامود المونيوم و خشب ابلكاش, و اللى حصل التالى اولا : اختبار الجامو ماتش: الرشه ديه معروفه طبعا لكل الاعضاء, الرشه قويه ما شاء الله خرمت وش واحد من الالمونيوم و الخشبه الابلكاش اتكسرت بس الرشه وقعت مكانها, و ده يدل على انها بتدمر الهدف و لكن بلا اختراق, و ميزه اخرى انها دقيقه فى المسافات البعيده. ثانيا : اختبار جامو ماستر بوينت: الرشه ديه موجوده فى مصر و لكن غاليه جدا مقارنه بالرش التانى, انا جبت العلبه ب40 جنيه ! بس عامه الرشه ديه مفتريه !! خرمت وشين الالمونيوم و الخشبه اللى فى وسطهم ! و طلعت الناحيه التانيه لسه بتجرى !!! و لكن ماكانش فيه تدمير للهدف زى الماتش, و لكن اختراق قوى, و المشاكل الاخرى انها بتتكسر و مش دقيقه قوى من بعيد. ثالثا : اختبار ال rws hollow points : انا معرفش اسمها بالعربى الصراحه, و ديه واحد صاحبى جابلى منها كام رشه اجربهم, هى مش موجوده فى مصر و هو كان جايبها من بره, و ديه اغلى رشه فى كل اللى جربتهم -بالاسعار العالميه- الرشه "كسرت" العامود !! ايوه كسرته !! لانها مصممه ان وشها يفلطح عند الاصطدام و بالتالى ال collision قوى جدا و لكن الاختراق ضعيف, و ديه افضل رشه للصيد طبعا, و كمان دقيقه جدا حتى للمسافات الطويله. و اخيرا : JSP predators : للاسف انا مجربتهاش ! و لكن بالنظر ليها تعرف الميزه الرهيبه فى التصميم ! هى عباره عن ال hollow point و فى نصها سن الmaster point عشان تخترق الهدف اولا و تفرتكه من جوه !! انا نفسى فى كام واحده اجربها و لكن دول اغلى من ضعف ثمن ال hollow points !! و لكن اعتقد ان ديه هى ملكه الرش ! اتمنى يكون الموضوع عجبكوا و ياريت لو اى حد عندوا تعقيب او تزويد يفيدنا