السلام عليكم ... انصرونا

[hoka]

السلام عليكم
انا كنت فى الميدان يوم السبت بليل وامبارح طول اليوم وهانزل انهارده ان شاء الله
اللى بيحصل يا جماعه اننا كنا واقفين فى الميدان ومأمنينه من ناحيه كل مداخله ولقينا الامن المركزى جاى علينا من مصطفى محمود طبعا رد الفعل الطبيعى جهزنا طوب
فجاه قنابل بتترمى وخرطوش
طبعا ما سكتناش ودخلنا عليهم ورجعناهم لحد هارديز كده
بس هم علشان مصرين يفضو الاعتصام وعددنا قليل هربنا لطلعت حرب وسحلونا جوه اقسم بالله القنابل وصلت لحد ميدان طلعت حرب
طب ليه؟؟ ما احنا سيبنالك الميدان اهه انت عاوز تروحنا بيوتنا بالغاز؟؟؟؟
ع العموم العدد زاد وهجمنا عليهم بالطوب بس اقسم بالله ما شوفتش مع حد مولوتوف الا فى اخر اليوم
وهم اللى ولعو فى عربيه الامن بتاعتهم وبعدين سحبوها علشان ما نشمتش فيهم
امبارح على مساله الهدنه وكده
احنا يا جماعه من قبل اى حاجه بنروح نقف قدامهم ونقول خلاص
طبعا فيه ناس لسه بتحدف طوب بس اقسم بالله الطوب ما بيقرب منهم
يقومو هم مستريحين شويه واحنا بنهدى الناس ورانا نلاقيهم يضربو تانى بغباااااااااااااااااء
نقوم نجرى منهم ونعاود الاشتباك تانى
ووالله الجيش امبارح كان بيضرب رصاص حى فى شارع جانبى مؤدى للوزادره وكان فيه ليزر جاى من ناحيتهم بيخوفونا بيه
معرفش ده فشنك ولا حى فعلا بس واحد قالى كان واقف ولما خلصو القنابل ولقونا بنهجم جندى طلع رشاشه وشد الاجزاء وضرب من اليمين للشمال وبيقولى الناس اللى بتموت مش كلها بيتاخد ومش كلها بترجع الميدان وفيه اهاليهم بياخدوهم ع البيت على طول معرفش ليه
انا نفسى اعرف احنا يوم 25 و28 كان بيتقال علينا عيال فاضيه واننا غلط
يا جماعه احنا مكناش عاوزين نروح الوزاره اصلا بس بسبب اللى عملوه كان لازم نضغط عليهم لحد الوزاره علشان ما يرجعوش الميدان (يعنى احنا بنضحى علشان نعمل جدار بشرى مننا)
اللى بيشبه الوزاره ببيته وان اللى يدخلها يموت
يا جماعه ديه وزراه شعب ودوله مش عزبه ابوهم واحنا لو دخلناها مش هانقتل ولا نخرب حاجه غير اننا نقولهم كفايه اتقو الله
انا شخصيا طالما دخلتها مش هاحرق ولا اخرب ووقتها هانقدر نعين ناس مننا فى الوزاره تديرها بشكل صح
ولو الشرطه مليون واحنا محتاجينهم فاحنا 80 مليون ومحتاجين نفسنا وربنا قبل كل شئ علشان ننقذ البلد من اللى بيلعبو بيها
ع الاقل احنا لو مسكناها وحد جيه يحاكمنا هايعرف يجيبنا لكن فين الناس اللى قتلت الثوار فى 28؟؟؟
فين حبيب العادلى اللى بقاله اكتر من 10 شهور ما اتحاكمش؟؟؟
ليه بيحكمو عليا بالقتل والعمى فى لحظه علشان واقف بتظاهر وسايبين اللى قتل مئات فى السجن لسه بينظرو فى قضيته(ده اذا كان فى سجن اصلا)
يا جماعه لازم ثوره بجد وما نخافش حتى لو هانبقى زى ليبيا او سوريا بس صدقونى احنا لو نوينا هانعرف نعدى الازمات كلها وبلاش نخاف من مصائر الشعوب اللى حوالينا ونعرف ان المصرى مختلف
ياريت كلامى يكون وصلكو واللى مقتنع بيه يحاول يفهمه لغيره واللى مش مقتنع هاتاسف انى مش هارد عليه لانى مش هادخل تانى دلوقتى خالص
ع العموم السلبيه وحزب الكنبه مش هاتعمل حاجه ولو انت معترض انزل الميدان او الوزاره وهدى الطرفين ع الاقل وخليهم يبطلو(ده لو رايك ان ده غلط او حاجه يعنى)
يللا استودعكم الله والسلام عليكم