لو كنت من خارج القاهرة

[bedreamer]

السلام عليكم ورحمة الله وبركاته
محتاج افيد الاعضاء الكرام اللى ساكنين خارج القاهرة بإلقاء قصة قصيرة متلخصة بأحداث يوم قضيته لشراء مسدس صوت من القاهرة وبصراحة جالى احساس ان مجرد تلاوتى باللى حصل معايا خلال اليوم هيخليكو تستفادو منو لو حبيتو تنزلو تشترو حاجه من احدى الاعضاء فى اى مكان غير المدينة اللى انتو فيها ونبدأ بالآتى
معاكم اخوكم وائل من بورسعيد
عضو جديد فى المنتدى اللى شرفنى الانتساب فيه بصحبة ناس زى العسل
محتاج ادوشكو معايا بالقصة دى اللى خضت احداثها انهاردة 14-1-2012 وهيا بخصوص سفرى الى القاهرة لشراء مسدس من عند ابو سيف التاجر المسجل بالمنتدى اللى ناس كتير شكرت فيه وفى اخلاقه هو و تجار اخرين ايضا هنا وكلهم ناس لهم اسمهم المشرق والمشرف ونكن لهم كل احترام
المهم: بعد الالمام بالمعلومات الكافية لإقتناء مسدسى المفضل من احدى اعضاء المنتدى الكرام قررت الشراء من محمد ابو سيف فاكلمتو انهاردة مرتين قبل السفر مردش عليا
وفى التالتة رد والحقيقة انو تجاوب بأداء محترم فى التليفون وسالت على منتج عارضه فى المنتدى وقالى انو متوفر طبعا ما اتردتش خالص انهاردة يوم اجازتى (الجمعة )واليوم لسة فى اولو ومش ناقص غير التوكل على الله
وفعلا خدت العربية وطيارة عالقاهرة
الوصف:::: الطريق---- أمطار غزيرة عالطريق من بورسعيد لغاية الكيلو 120 بورسعيد القاهرة الصحراوى الساعة كانت حوالى 6م تقريبا واحنا عندنا الطرق فى مصر دولية جميلة ومضاءة ومش مكسرة طبعا ولا مدغدغة اساسى وواسعة 8 حارات زى الفل والنقل ملتزم بأقصى اليمين طبعا خالص والعربيات بتدى اشارات للتخطى والتجاوز طبعا جدا والنظام كان هو الحاكم الرئيسى على طريق ههههههههههه طبعا لا متفهمونيش غلط كنت بهزر كل اللى قولتو كذب واللى حصل هو العكس واعذرونى علشان (الهمجية) هى اللى كانت الطبع السائد على الطريق كالمعتاد والصفة دى من اشدد الاشياء التى تعصبنى فى هذا الكوكب ولكنى لا اريد التعميم فيوجد من كان ملتزم ولكنهم للاسف قلله
ما علينا عند الكيلو 150
لمبة النزين نورت رحت راشق فى اول بنزية شافتها عنيا وصلت وببص لاقيت 3 طوابير طواااااااااااااااااااااااااااااااااااااااااااااااا ل قدامى وعلى بال ما اوصل امون تكون فلسطين اتحررت واذا برجل ابن حلال بصلى وقالى هتمون كام قولتلو 92 قالى الطوابير دى كلها عشان سولار اخلفها وادخل انت مون على طول
الحياه ابتسمت فى وشى وجريت رهوان ولسه فرحتى مكملتش لاقيت الراجل اللى بيمون بيرزعنى الطلقتين دول فى سنانى بيقولى مفيش غير بنزبن 80
قولت قدر الله ما شاء فعل
خدت بعضى وروحت اشوف اللى بعدها وان شاء الله ال5 ليتر الاحتياطى هيوصلونى
كنت سائل واتقالى ان اول بنزينة تانية على بعد 13 كيلو من اللى انا فيها
وبالفعل وصلت الحمد لله لاقيتها مشطبه بردو ومفهاش نقطة بنزين والخمسة ليتر عمالين يتحرقو كملت وعديت على 2 تانيين وبرردو مفيش بنزين وعينى ماتشاليتش من على المؤشر بتاع التانك وعمال ادعى ربنا ما تفطعش منى
بس بدأت افقد الامل وبدات افكر انا ممكن اعمل ايه فى البرد والمطر والصحرا اللى انا فيهم لما العربية تقطع بيا بنزين فى الظروف والمزاج اللى زى الزفت ده هههههههههههه
وانا بفكر شوفت نور بنزينة وطنية ادامى على بعد 500 متر اعدت ادعى ربنا فى ال500 متر دول انى الاقى 92 او حتى 80 كنت همون والنبى حتى لو سولار والحمد لله
شوف بقى ربنا لما يفرجها طلع فيها 95 بس روحت مفول التانك من غير ما افكر علشان سمعت ان فى ازمة بنزين فى القاهرة واللى شوفتو اكدلى ده واتوكلت على الله
اول حاجة خطرت على بالى فى اللحظة دى كنت فى الكيلو 176 تقريبا يعنى اقل من 10 كيلو واكون فى القاهرة
هو انى اتصل بمحمد ابو سيف
طلعت الموبايل وقتى عشان اكلموا واطمن منو بيقفل امتى وبالمرة اخد العنوان
رد بعد جرسين وقالى انو بيقفل 12 والعنوان حدايق القبة عند مسجد الشيخ غراااب
مشكور
راودنى احساس بعدم اخذ المكالمة التليفونية على محمل الجد وخاصتا بعد شرحى له الموضوع بإختصار بانى من بورسعيد ونازله مخصوص علشان كده بكلمو واتاكد من مكانه وتواجده بالمحل والاحساس ده سببه ان كان فى ضحك مع اناس مجاورين وتجاوب بطيء فى رد الفعل وهزار المهم فهمت منو الكلمتين بالعافية و
قفلت وكملت الطريق بس للعلم انو ممكن يكون سوء ظن منى واكون فهمت غلط او ان الظروف اللى كنت موضوع فيها مخلتنيش استوعب اسلوب التعامل الغامض بالمكالمة الاخيرة بشكل صحيح ، وبعد دخولى القاهرة حمدت ربنا على وصولى بالسلامة و اتشاهدت بعد رحلة كانت متعبة جدا للأعصاب وشاقة لابعد حد وفكرت بما ان استاذ ابو سيف بيقفل 12 اروح اتغدى واكون عنده على 9 ونص
اتغديت عند محل فى روكسي وخدت بعضى وطيرت على حدايق القبة شغلت الجى بي اس وكان فى بعض الماره بسالهم وبيفدونى بردو مشكورين وبالفعل وصلت لمسجد غراب بحديق القبة ركنت بجوار المسجد ونزلت اسال اول واحد عن ابو سيف يقولى مفيش التانى بردو مفيش واقولو ده مشهور اااااااااااااااااااااااااااااوى يقولى متلاقيش لحد ما وصلت لاخر الشارع وانا مش لاقى اى محلات اسلحة
قلت ما بدهاش يمكن فهمت منو غلط او انى حتى مكنتش بكلم ابو سيف فى المكالمات اللى فاتت وانو واحد كان بيشتغلنى وساق فيها ، جايز ما هو اصل ولاد الحلال كترو اليومين دول،
قمت مطلع التليفون تانى واتصلت بأستاذ ابو سيف وكالعادة جرس ومبيردش
تانى بردو مبيردش قولت فى سرى بأعلى صوت فى المحاولة ال3 يااااااااااااااااااااااااااااااااااااااااااااااااا ارب يرد
بس للأسف مردش 4 مرات جرس للأخر ومفيش طبعا مكانش ادامى اى حلول تانية لانى معرفش عناوين كل تجار الاسلحة بالقاهرة وكان معايا ارقام ناس تانيين من المنتدى بردو تجار ومنهم أعضاء سبحان الله محدش رد عليا منهم نهائى مش عارف ده علشان يوم جمعة ولا انا اللى منحوس
مش قادر اوصفلكم الشعور اللى تملكنى وقتها حاجة كده عاملة زى ال...... زى ال....... ههههههههههه
المهم غيرو كنت مأمن معايا على رقم المدمر تانى اقوى عرض كان عاجبنى (رأى شخصى)ك
كللمتو رد من اول مرة مشكور الراجل اخد كلامى بجدية تامة وقالى انو فى 6اكتوبر وبيقفل 10 والساعة وقتها كانت 8 ونص وطبعا علشان اروح 6 اكتوبر من حدايق القبة فى اقل من ساعة ونص فى ظل الزحمة ده شىء مستحيل فا بدات افقد الامل و
استعوضت ربنا فى اليوم اللى راح أونطة والمصاريف وحرقة الدم واخدت قرار للخلف در بالخطوة السريعة على بورسعيد تانى واليوم قفل معايا وكنت اخر عكننه الحقيقة
بس الحمد لله على كل شىء ودى كانت قصتى خلال يوم قررت فيه اقتناء منتج وتلخص فيه مصيرى بالكامل على مكالمة تليفون ( مكاملة جوال حقيرة ب18 قرش لو كانت تمت كان اليوم مشى زى الفل
اسف انى طولت عليكم بس بصراحة نفسى احبائى اعضاء المنتدى الكرام يقولولى اراءهم فى الموضوع ولو كنتو مكانى كنتو هتعملو ايه وهتتصرفوا ازاى وايه اللى ممكن استفادو منكم تنصحونى بيه المحاولة الجاية علشان انا قررت
انشاء الله انزل تانى الجمعة الجاية بس اتمنى انها تكون بفايدة والتليفونات ترد عليا
مشكورين جمعيا
ومتنسوش التقييم