افضل نوع رش للكرال الفبر

[dr_mohasan]

المشاركة الأصلية كتبت بواسطة amhamed

كلام حضرتك مظبوط في ان التجربه خير دليل بس الفكرة الي انا اقصدها ايه الي هايخليني اقول ان الرش ده حلو ولا لأ هل قوته الاختراقيه مثلا ولا وزن الطلقه ولا ايه

المشاركة الأصلية كتبت بواسطة amhamed

الحاجه التانيه لو انا جبت نوع رش معين العلبه ب 30 جنيه مثلا وفيها 250 رشه وطلع وحش او مش مناسب للبندقيه هل ارميه ولا بيكون مناسب لحاجه تانيه

وشكرا لمرورك

شوف يا باشا , مافيش رش حلو و رش وحش إلا فى جودة الصناعة فقط , فإذا ضمنت الجودة (باستخدام الرش الأسبانى أو الانجليزى مثلا) بعد كدة يبقى نحكم على الرش على حسب نوع البندقية , ظروف الاستخدام و راحتك الشخصية.

وهاديلك مثال علشان أوضحلك قصدى , ودايماً بحب أدى أمثلة من تجارب شخصية

عندى بندقية رويال (سرعة 220 و تعتبر بداية الهاى باور) , وطالع أصطاد انهاردة فى مكان فى الأرياف , زرع و شجر , تقدر تتخفى كويس و تصطاد من مسافات قريبة يبقى ايه أفضل رش للظروف دى ؟ الجامو ماتش مثلاً (خفيف مفلطح) , طيب ليه ؟ علشان الطير مايتسرقش و يقع بعيد عنك و ماتقدرش تجيبه لأن الماتش فى المسافات القريبة بيقفل الطير فى مكانه , لكن لو استخدمت الرش البروماجنوم (التقيل المدبب) , هاتلاقى نسبة السرقة فى الطير زادت و ممكن تخسر صيد كتير يهرب منك

والعكس لو طالع تصطاد فى مكان صحراوى , بتضطر تضرب من مسافات بعيدة لأن المساحات مكشوفة و يصعب الاختباء و التمويه , كما أن الريح بتكون اقوى و بتأثر فى مسار الطلقة , يبقى لازم نستخدم الرش التقيل , وبالتجربة بيروح مسافات ابعد و يدى نتايج افضل

طيب لو عندك بندقية أقل فى القوة (160 - 190 متر/ث) يبقى لازم تستخدم الرش الخفيف والبندقية هاتشتغل معاك كويس فى المسافات الصغيرة و المتوسطة (10 - 30 متر)

وبعد كل ده يظل العامل الشخصى مؤثر بشكل كبير , يعنى صديقى شريف صلاح عنده بندقية 350 ماجنوم و بيستخدم عليها الرش الماتش و جايب معاه نتايج هايلة , ونفس البندقية مع صديقى محمد وفيق والرش الماتش مش نافع معاه خالص , ولما غيّر للبروماجنوم جاب نتايج رائعة , مع انها نفس نوع البندقية , ولكنه العامل الشخصى .

شخصيّا كان عندى بندقية كرال دبشك أسود , وكان أفضل رش معاها هو البروماجنوم , أنصحك بيه عن تجربة علشان ماتحترش و تضطر تجرب حاجات كتير

فى النهاية , أنت لازم هاتجرب أكتر من نوع رش لغاية ما تستقر على النوع اللى أنت هاتفضله , ويمشى معاك على طول , وممكن تستقر على نوعين تبدل مابينهم على حسب ظروف الصيد , ونصيحة شخصية , خلى نوع الرش اللى بتتدرب بيه هو نفس النوع اللى بتصطاد بيه علشان تتعود عليه .

أرجو أنى أكون قدرت أوضح رأيى