طلعه ممتعه جدا لمده ساعتين ونص مع رفيق الكفاح

[قناص المنوفيه]

ازيكم يا اجدع صيادين وقناصين فى مصر انهارده طلعت طلعه جميله جدا مع رفيق الكفاح اللى مفيش
غيره بيطلع معايا وكان الجو حلو جدا وبعد ما زهقنا من المشى فى نهايه الطلعه قلنا نروح مكان
عندنا اسمه الوحده الزراعيه المكان ده مهجور وكل المبانى المهجوره فيه من ايام الانجليز حتى
برج الحمام اللى انا مصوره ده والمكان ده ياما اصطدت فيه زمان وجبت احلى يمام قمرى وحمام برى منه
وهو كمان طلع كان بيصطاد فيه بس للاسف روحنا لقينا الحكومه بنت مدرسه تجريبيه جنبه
على نص المساحه وملقناش فيه ولا حمامه بريه ولا يمامه قمرى كله يمام عادى وحذر جدا جدا
وصقور مضربتهاش خالص لانى مش ناوى اضرب صقور تانى
وبرج الحمام المهجور اللى كان مليان حمام برى بابه مكسور قصدى مبقاش فيه باب اصلا ومفيش
ولا حمامه فضلنا شويه وبعدين مشينا واكتفينا بالحصيله اللى جبناها قبل منروح المكان ده
وبصراحه الجامو والكرال ابدعوا انهارده هو جاب حوالى تسع يمامات بس مصورتهمش
وانا جبت عشر يمامات وكيشه انا بس حبيت احكلكم ع المكان القديم ده واصوره لانى كنت
بحب اصطاد فيه جدا وبحسه زى الغابه لانه فيه تعالب كمان وحيوانات غريبه ومفيش بشر بتدخله
بس الظاهر ان الناس والحكومه قضت عليه و زعلت عليه جدا

فيه صورتين كمان ليا انا وهو بس للاسف انا صورته صوره حلوه والبندقيه بينه زى الفل
وهو صورنى صوره البندقيه مش باين الا حته من الماسوره بس ده غير انى اصلا مسكتى
اثناء الضرب كده عشان كده بحب البنادق اللى دبشكها طويل معلش طولت عليكم اسيبكم
مع الصور علما بان اخر صورتين بوضح فيهم دقه الضرب فى صدر اليمام وقوه البندقيه والرشايه
اللى كسرت العظم وطلعت من الناحيه التانيه ...