كيفية مسك بنادق الصيد (اللي فيها سوستة فقط)

[Angel of Death]

السلام عليكم,
صباح الخير يا قناصين مصر و مدفعيجتها.. عاملين إيه؟؟ إن شاء الله كويسين في الفترة الصعبة الحالية..

النهاردة هعرفكو على ما يسمى بمسكة المدفعية أو بما يسمى بالإنجليزية Artillery Hold . طريقة مسك السلاح ديه تنفع فقط مع بنادق ضغط الهواء التي تعمل بالسوست Spring (التي هي كسر-الماسورة أو العتلة الجانبية أو السفلية أو بنادق الضغط ذات الشحن اليدوي Multi-Pump Pneumatics). ده ماينفعش مع البنادق مسبقة الشحن بالهواء Pre-Charged Pnematic (PCP) و إن إستخدمت مع الPCP سوف تاثر سلبيا جدا جدا على الدقة ذلك لوجود كمية إرتداد قليييييلة جدا أو حتى منعدمة تماما.. ذلك لأن بنادق الهواء االتي تعمل بالسوست لديها إرتدلد غير متوقع من حيث الإتجاه ذلك بسبب تحركات السوستة القوية و المفاجئة..

أكيد كلنا شفنا المدفعيات الثقيلة الحربية بتضرب. دائما تلاقي الماسورة نفسها بترجع إلى الخلف لإمتصاص الإرتداد, لكن العربة نفسها مش بتتحرك خالص. ذلك لأن الماسورة عند الإطلاق يمر بها كميات مهولة من الطاقة التي لا يمكن حبسها فيتم تفريغها عبر إمتصاصها برجوع الماسورة إلى الخلف. ذللك لأن نسبة التراجع مع كل ضربة هي طبق الأصل عن اللي قبلها. ده بيخلي قذيفة المدفع دقيقة جدا (بالنسبة لحجم القذيفة طبعا)




الطريقة:
كل مختصين الأسلحة النارية بيقوله لازم تمسك السلاح بقوة جدا لتسيطر على الإرتداد ذلك لأن إرتداد الأسلحة النارية دائما ثابت و غير متغير حسب السلاح و العيار. لكن كلللل المعادلة بتتغير مع البنادق العاملة بالسوست. ذلك لأن مع كل ضربة ببنادق العاملة بالسوست تتحرك الماسورة و السوستة في جميع الإتجاها على محور 360 درجة. و لو الواحد مسك السلاح بقوة زي الأسلحة النارية هيلاقي المجموعات الرش بتاعتة بعيدة عن الهدف و غير دقيقة (و هيلاقي الرش في كل حتة مع إن المفروض الصياد الجيد يعرف يحط مجموعة من على بعد 10-15 متر يقدر يغطيها كلها بجنية فضة)

1) تمسك البندقية زي ما أت بتمسكها عادي لكن بثلاث فروق كبيرة. أولا تفرد كف يدك اليسرى تماما.

2) حاول تلاقي نقطة أو مكان على أسفل ماسورة البندقية تعرف توازن بيه البندقية على كف يدك (زي ميزان العدل كدة).

3) إسند الماسورة بكف يدك اليسرى.. يا جماعة أنا بقول إسند الماسورة.. يعني ماتمسكش الماسورة أو تقفشها (ما تخفش البندقية مش هتجري منك) على المكان اللي وجدنا في الخطوة السابقة و لف أصابعك عليها قليلا عشان بس البندقية ماتوقعش على جنبها.
ركز في الصورة على اليد اليسرى..

4) أكيد الأغلبية بتخلي مؤخرة البندقية تضغط جامد على الكتف و بتحس إن كتفها البندقية هتخرمه من القوة.. في بنادق الصيد ده غلط تماما.. إحنا عاوزين مؤخرة السلاح يكون بالكاد لامس الكتف.. يعني يادوب لامس الكتف عشان بس يمسك البندقية مكانها و ماتوقعش على الأرض و تدعي علي..

5) بإيدك اليمنى تمسك الدبشك و مجموعة الزناد بخفة جدا برده.. أهم حاجة يا أساتذتنا الكرام خفة المسك أو القبضة في كل الخطوات..

6) تسمي و إتكل على الله و إضرب . هتلاحط إن البندقية بترجع للخلف بكمية صغيرة و ذلك لأن الإرتداد بيدفع السلاح إلى الخلف قليلا لإمتصاص الطاقة و بعد كده هتروح قدام شوية أصغر. ده عشان مافيش حاجة بتمنعها (و ده الصح يا رجالة)..

أسئلة متوقعة:

س: طب ليه يا عم نعمل الكلام ده كله.
ج : ده عشان لو معملتش كده و ثبت قبضتك للسلاح الإرتداد مش هيلاقي مكان يفضي نفسه فيه غير الماسورة و الماسورة هتتحرك (طبعا مش هتشوفها لأنها سريعة جدا و بكميات صغيرة جدا ميكروسكوبية ) و الرش بقى هيستهبل عليك و يروح في أي حتة.. غير اللي حضرتك عاوزه يرحها..

س: طب ليه يا عم الحاج إسمها مسكة المدفعية, و لا هو أنت عامل فيها عبقرينو و خلاص و مقتي الدولة في السلاح و الصيد.
ج : تصدق ياض إنك عيل فاشل يلا ياض من هنا ببنطلونك اللي شبهك ده . أنا هارد على السءال عشان حبايبي اللي في منتدى الصيد في مصر مش عشانك يا عايل يا تافه ... ما علينا, المسكة ديه إسمها مسكة المدفعية عشان إحنا بنقلد فيه ميكانيزم المدفعية, حيث إن البندقية بترجع للخلف بطريقة مطابقة كل مرة تضرب فيها (زي ماسورة المدفعية) . و لكن حضرتك كشخص مش بتتحرك مللي (زي جسد المدفع نفسة مش بيتحرك خالص)

س: طب ليه ماينفعش نعمل كدة مع الPCP ..
ج : ياض ما أنا قلتها فوق.. ركز معايا عشان مطلعكش برة الكيلااس.. هههههه ده عشان الPCP مفيهاس إرتداد أصلا لعدم وجود قطع متحركة في الداخل. و لو عملت كدة هتتعب عشان لازم تمسك البندقية بثبات لأن أغلبية البنادق الPCP وزنها مش متوزع صح و هتلاقي صعوبة توزنها في أي حتة...
طب بالذمة, ديه أمسكها منين ديه؟؟


كدة كفايا بقى عشان حاسس إني هبدأ أفتي كثير و أعمل فيها صياد بجد

إن شاء الله بالطريقة ديه هتلاقي مجموعة الرش بتاعتك صغرت و هتعرف تغطيها بجنيه فضة..
يلا بقى روحو جربوها و إدعولي .. الموضوع من إنشائي 120% أرجو عدم نسيان التقييم يا اساتذتنا الكبار

http://www.youtube.com/watch?v=ZLed_nD5ixA

http://www.youtube.com/watch?v=ZLed_nD5ixA

http://www.youtube.com/watch?v=_mnbI9Nfu4c

http://www.youtube.com/watch?v=_mnbI9Nfu4c

تحياتي,
محمد قطب الدكماوي