طريقة الصيد بالتشكيم أو التمشيط

[أبو صفية]

السلام عليكم و رحمة الله و بركاته

بعد المواضيع الى عملتها عن طلعات التشكيم و صيد حمير السمك أو قشر البياض
كتير من أعضاء المنتدى المحترمين إستفسروا عن طريقة التشكيم و هى إن شاء الله كالتالى

أولا طريقة الصيد

و هى رمي وش أو سبحة مكونة من 8 شكامات أو أهلاب فى منطقة مياه جارية و عميقة حيث يكون السمك عايم و منجذب لها عكس التيار و تنتظر فترة يعنى من 2 إلى 5 دقايق عشان السمك يرجع لمكانه تانى بعد رمى السبحة و يكون هناك شد قوى و عشوائى فتشبك الشكامات فى السمك و الطريقة دى قوية و عنيفة شويةو لذلك بتحتاج مواصفات خاصة.

ثانيا السنارة

لآن المياه جارية و فى الغالب السمك بيكون كبير و الشد قوى بتحتاج سنارة قوية و مواصفاتها كالتالى

الغابة بتكون من النوعية القوية و الصلبة عشان من النتش أو الشد القوى ما تتكسرش و يكون اللبلوب أو الإريل أو أخر عقلة فيها من نوعية الصب أو مش مفرغة لأن معظم الحمل بيكون عليه و المفرغ بينكسر على طول و يكون طولها مناسب أو من النوعية الطويلة من 3.5 إلى 5 متر عشان تدى قوة و طول فى النتش و معظم محلات الصيد بتعرفها بغابة التشكيم

المتور أو المكنة فى الغالب بيكون من النوعية الوسط أو الكبيرة عشان يكون سحبه قوى و تكون الكباية بتاعته ( مكان لف الخيط ) كبيرة عشان تاخد أكبر قدر ممكن من الخيط.

الشعر أو الخيط و دا لازم يكون من السمك الكبر يعنى ما يقلش عن 70 و يفضل يكون 80 لأن النتش عشوائى و بيكون فيه شبك كتير سواء فى الصخور أو أى حاجة فى المية و بيتربط فيه رصاصة من الحجم الكبير عشان فى الرمي البعيد تديك مجال و فى نفس الوقت فى المية الجارية بتغوص و بتركز مع الشكامات فى نفس مكان الرمى بسرعة و ما تجرفهاش المية و لو خفيفة المية بتجرفها و الشكامات بتشبك فى بعضها و دى يفضل فيها حجم التمن 1/8كجم.

السبحة أو الوش ودى الجزء الى بيتربط فيه الشكامات و دى يفضل يكون أقل درجة فى السمك من الشعر الرئيسى أو من نفس سمكه و دا بيتربط فيه 8 شكامات من الحجم الوسط أو الكبير يعنى مقاس 3 أو 4 أو 5 وبتكون المسافة بين كل الشكامات من 40 إلى 50 سم و بيكون طول السبحة ككل تقريبا نفس طول الغابة و ورا آخر شكام فى السبحة بحوالى 10 سم بيكون فيه رصاصه من الحجم الصغير عشان الوش يركز من الآخر على القاع

ثالثا مكان الصيد

دا بيكون فى الترع الى بتكون فيها المياه شديدة ودى غالب الترع الى بتنبع مباشرة من نهر النيل أو الى بتنبع من ترعة كبيرة و بيكون الصيد من جانب جدران المنبع لأن بيكون نابت عليها الريم الأخضر الى سمك البلطى بيجى ياكله و من ثم الأسماك المفترسة زى البياض ( الشموس ) أو الحمير ( قشر البياض ) أو بالرمى فى مجال المية الجارية

رابعا الوقت

أفضل الأوقات لها بيكون النهار و أفضل وقت للنهار بيكون من العصر للمغرب لأن الفترة دى معظم الأسماك سواء البلطى أو المفترسة بتاكل أو بتصتاد فيها.

ملحوظة هامة
طبعا الكل صيادين و يعرفوا قيمة الصبر فى الصيد الطريقة دى بتحتاج صبر شديد و معنويات عالية لحد ما تتقنها و غاب بيتكسر و خييوط بتتقطع و سبح بتروح و أيام كتير ما تجبش حاجة.

و الله الموفق و أتمنى أكون أفدتكم فى الموضوع.