العقل المصرى ( مفيش حاجه بتقف قدامه )

[القبطان المصرى 77]

بسم الله الرحمن الرحيم
ندخل فى الموضوع على طول عشان مفيش وقت والعيد قرب
ههههههههههههههههه
طبعا كلكو متابعين معايا حكاية السوسته الماجنوم و مجموعة الزناد والبندقيه اللى كانت بتضرب لوحدها
وانا طبعا مليييييييش خالص فى فك وتركيب مجموعة الزناد
النهارده بعد الضهر قلت مبدهاش انا لازم اجرب افكها واشوف ايه مشكلة التعليق ( اللى بيخلى البندقيه تضرب لوحدها )
قمت جايب البندقيه ورحت عند صديق ليا ( عشان عنده جميع انواع العدد ومبارد وحجر جلى وخلافه) عنده معرض موتسكلات
ودخلت عنده وفرشت على الارض وفككت البندقيه حته حته
وافتكرت نصايح الاستاذ عادل 152 و الاستاذ عادل عبده
لما قالولى بص على لسان التعمير ومجرى البستم
وبالفعل
اول حاجه بصيت عليها هى لسان الزناد بتاع اللاقط
ولقيته مفهوش اى حاجه وتمام التمام

تانى حاجه بصيت عليها
الفتحه اللى فى البستم اللى الزناد بيلقط فيها التعمير
ولقيتها سليمه ميه ميه

ومسكت مجموعة الزناد وفضلت اقلب فيها شمال ويمين يجى نص ساعه قبل ما افكها عشان افهم
الميكانيزم بتاعها شغال ازاى
وفى الاخر اكتشفت الاتى
ان لسان التعمير بتاع الزناد ( الشاكوش ) هو كمان له قاعده من الخلف اللى فى الصوره دى
ومعلم عليها باللون الاحمر

والقاعده بتاعة الشاكوش دى بعد التعمير وقبل الضرب بتكون راكبه على القاعده اللى تحت دى اللى معلم عليها باللون الاصفر

وبمجرد مابتشد الزناد اثناء الضرب القاعده دى بتنزلق لقدام يقوم لاقط الزناد ساقط لتحت ويتحرر البستم
كل ده كلام سليم
فين بقى المشكله اللى بتخللى البندقيه تضرب لوحدها؟؟؟
المشكله هى ان القاعده الخلفيه بتاعة لاقط التعمير اللى هى بتنام على القاعده بتاعة الزناد
اللى هى دى لقيتها من فوق مبريه ومنزلقه وناعمه
وعشان كده لما باعمر والقاعدتين بيركبو فوق بعض مش بيكونو مستريحين على بعض
لأن فيه واحده منهم واقفه فوق التانيه على الشعره ومن السهل انزلاقها ( بسبب البرطشه )

وحسيت ان فعلا هى دى اللى فيها المشكله
وقعدت افكر
واتكتك
واخطط
امممممممممممممممممم
قمت فاكك مجموعة الزناد وقمت واخد الشاكوش ده بتاع الزناد ورايح على اقرب ورشة خراطه
وقلتله زودلى اللسان ده بلحام صلب ( حوالى نص مللى )
وبالفعل لحملى فيها بنطتين من قدام زودوها حوالى 2 مللى
وقمت واخدها ورايح على الحجر الجلى
وظبطتها وتمام التمام وخليتها زياده حوالى نص مللى فقط
لاحظ الفرق بين قطر اللسان القديم والجديد اللى انا معلم عليه بخطين باللون البنى

ورجعت تانى على صديقى فى المعرض وجمعت البندقيه وقفلتها
وجربت خمس ست مرات كسر وتعمير وضرب فى الخشب
وحسيت ان الزناد بقى مستريح جدااااااااااااااا فى لقط التعمير
وكله بقى تمام التمام الحمد لله
وقعدنا ندردش انا وصديقى حوالى نص ساعه
وباب المعرض كبير وفاتح على طريق عمومى عرضه 20 متر
وفجأه
شفت من الباب حمامه جت قدام المعرض بس من بعد الطريق من الناحيه التانيه ووقفت على سلك الكهربه
هههههههههههههههههههه
المسافه
20 متر عرض شارع
3 متر رصيف الناحيه التانيه
3 متر رصيف من ناحية المعرض
11 متر داخل المعرض من جوه خالص
8 متر ارتفاع الحمامه
45 متر اجمالى المسافه
واحنا طبعا فارشين وقاعدين على الارض جوه المعرض
انا مكدبتش خبر وقمت ماسك البندقيه
اه والله زى مابقول كده
صديقى قاللى انت بتهزر ولا ايه
عمرك ماتعرف تجيبها من هنا
ماردتش عليه
وكانت الحمامه مديانى ضهرها
وقمت منشن ومسمى ورفعت سن نملة الدبانه 1 سنتى فوقها
وطااااااخ
لقيت الحمامه نازله تفرفر فى الشارع ولحقتها بسكينه من عند صديقى
كل ده وانا قاعد مربع على الارض ( قاعده بلدى )
هههههههههههههههههه


وعلى فكره البندقيه حتى مكنتش مظبط الناشنكاه بعد مافكيتها وركبتها
بس سبحان الله حسيت ان الرزق ربنا بيبعتهولى بأى وسيله وفى اى وقت
وبأى بندقيه
ودى كانت حكايتى مع الزناد
والنهارده كمان ان شاء الله طالع اصطاد بالليل عشان بقالى اكتر من يومين مخرجتش للصيد بقى
ههههههههههههههههه
والسلام عليكم ورحمة الله