اصنع ماسكك بنفسك - ماسك الوجه الخاص بالقوات الخاصه

[_SAIKO_]

بسم الله الرحمن الرحيم

مش هطول عليكم هههههه ندخل ف الموضوع علطول

كتير من الاعضاء و انا منهم كان نفسنا نجيب الماسك الخاص بالوجه زي اللي بيلبسه الجنود بتوع القوات الخاصه , و الماسك دة بيحميهم من الاتربه و البرد و الهوا الشديد برده اذا تم لبس نضاره معاه

و دي بعض صورهم








و الماسك ليس حكرا عالجيش و الشرطه و انما هما بيلبسوه للاسباب اللي قولتها فوق دي و كمان لاخفاء الهويه .

طيب احنا هنلبسه ليه هو .. احنا لا شرطه ولا جيش و لو لبسناه هيقولوا عننا بلطجيه و بيخفوا وجوههم ... الرد القاطع علي الكلام الحمصي ده كالاتي

- احنا لا بلطجيه ولا قطاع طرق عشان نلبس ماسكات دة اولا
- في ناس بتنزل شغلها الصبح بدري و بيكون الجو تلج و محتاج يغطي وشه
-في ناس بتطلع تصطاد بعد الفجر وبالليل و بيكون الجو برد عليهم
- في ناس بتتعب من الدخان و عوادم السيارت و الاتربه اللي متواجده بكثره ف القاهره
- الماسك مش هيتلبس طول اليوم لالالا هو لغرضه فقط وخلاص يعني مثلا يتلبس الصبح بدري لحد لما الجو يدفي و بعدين يتقلع .. اللي موجود ف اماكن عمل فيها اتربه مصرحه بالماسك ف اي وقت

و دي صور للماسكات و هي نوعين ماسك ل وجه كامل و ماسك ل نص وجه و دي بعض صورهم برده عشان الناس تبقي عارفه احنا بنتكلم عن ايه










نيجي بقي للماسك نفسه :: طبعا ماشاءالله الاستغلال يفوق الوصف تلاقي تاجر بيبعه ب 50 جنيه و اخر ب 80 و اخر ب 100 و اخر 30 جنيه ... طيب و علي ايه الاستغلال ده مانت ممكن تعمله ف البيت و ب تكلفه اقل كمان ولا الحوجه للتجار و استغلال التجار

المطلوب :

- ايس كاب او زعبوط بس يكون لونه اسود ساده او بني ساده اي لون غامق ساده
- استك رفيع
- قلم فسفوري
-مقص

الخطوات للماسك الكامل - وجه كامل - : واحده واحده كده نمشي ف الخطوات

- هتنزل عند اي حد بتاع جونتيات و كابات و زعابيط و ايس كابات تشتري ايس كاب او اتنين او 3 تكلفه الواحد حوالي 10 -15 جنيه و خامات مختلفه طبعا علي حسب ذوقك

- تاخد الايس كاب و تطلع عالبيت عدل لا تبص يمين ولا شمال ههههه انسان الي بالظبط .. تروح البيت تطلع الايس كاب و تعطيه للوالده او ست البيت و تخليها تدكك الاستك ف الايس كاب .. طيب فين ف الايس كاب يا عم سايكو هقولك ياسيدي ..الصبر مفتاح الفرج

الجزء السفلي من الايس كاب هتدكك فيه الاستك بحيث انك لما تيجي تلبسه يبقي الاستك هو اللي حوالين رقابتك و ماتقلقش الاستك مش هيخنقك بالعكس دة هيبقي ماسك الماسك حوالين رقابتك و شده زي ماسك القوات الخاصه بالظبط زي ماهو موضح بالصوره سهم رقم 1



- بعد ما تدكك الاستك تاخد الايس كاب و تلبسه و تشده كله علي راسك و وشك .. طبعا انت مش هتشوف حاجه لانه مغطي عينك تروح ماسك القلم الفسفوري ب ايدك و تحدد بالقلم مكان عينك و وشك زي ما هو موضح بالصوره سهم رقم 2 .. تمام .. انت كده حددت مكان العين و الجزء الظاهر من الانف ..تقلع الماسك و تقص مكان هذا التحديد



- قصك مش هيطلع مظبوط اووي .. دة عادي ماتخافش ..انت هتساوي و تظبط قصك بحيث ان القص يبقي متناسق و مفيش حته زياده او اقل

- بعد القص و بسبب القص هتلاقي مكان القص مشرشب و منسل مفتل بسبب القص ..هتروح تدي الماسك للوالده الكريمه او الزوجه الكريمه و هما عارفين خياطه كويس ف هيعملولك الحتت المنسله دي سواء يتنوها و يخيطوا عليها او اي كان هما هيعملوا ايه بقي المهم انها هتتعدل

كده اقدر اقولك مبروك انت عملت ماسك بنفسك باللون اللي انت عايزه و الخامه اللي انت عايزها

طيب واحد هيقولي طيب فايده الاتنين ايس كاب التانين اللي انا اشترتهم ايه انت قولت نشتري اتنين او 3 ايس كاب .. بص يا سيدي انا قولت تشتري اتنين او 3 عشان لو واحد باظ منك تعدلف التاني و لو التاني باظ منك تعمل الثالث و كل ما تجرب هتطلع ماسك احلي و هو مش مستاهل اصلا تجرب بس من باب الاحتياط و انك تعمل ماسك محترم .

لسه ماخلصناش رايح فين ..

الخطوات للماسك نص الوجه :

نفس الخطوات السابقه لكن مع بعض التعديلات و هي كالاتي

- اما انك تعمل نفس الخطوات السابقه و بدل ما تقص جزء العين و الانف تقص الراس كلها كمان

- او انك تجيب كم ل تيشيرت قديم و تقص الكم من التي شيرت طبعا خامه التي شيرت ضعيفه و مش هتستحمل الجو و البروده و التراب ف تعمل ايه تجيب صوف او قماش ناعم او قطن و تغطي الكم ده بالصوف او القماش الناعم و طبعا بالخياطه تعمل كده و بعد ما تغطيه تلبسه لحد المستوي اللي انت عايزه يغطي وشك و تمسك القلم الفسفوري و تحدد الزيادات و بعد كده تقلع الماسك و تقص الزيادات و برده تعمل الاستك من عند الرقبه و الالوان و الخامات براحتك برده

الاسئله اللي انا متوقعها

- خامه ماسك القوات الخاصه مختلف ؟ حضرتك و انت بتشتري اختار الخامه اللي تعجبك نعامه خشنه ساده كاروهات برحاتك

- في انواع كتير من الماساكات باشكال كتير ؟ حضرتك انا قولتلك الفكره و انت قص الشكل اللي يعجبك في ناس بتعمل ماسك للوجه كله بالراس ف بيقص منطقه العين و الانف و ناس عايزه ماسك نص وجه ف هيقص علي قد نص الوجه و هكذا

طيب و علي ايه التعب ده كله ما انا اشتري جاهز .. والله ياباشا براحتك انت حر و فلوسك كتير روح اشتري بس لما تمسك الماسك ف ايدك و انت دافع فيه 80 جنيه او 100 جنيه او 50 جنيه و تلاقي واحد تاني عامل ماسك زي بتاعك و احسن منه ب 20 جنيه تكلفه ماتزعلش ولا تضايق كل الفرق بينكم ..ان هو شغل مخه و انت شغلت فلوسك

اتمني ان الموضوع يكون قدم افاده