ظاهرة في منتهي الخطورة

[LEGION]

المشاركة الأصلية كتبت بواسطة orabi

السلام عليكم يا أستاذ أحمد يا رب تكون بخير
أنا لي وجهة نظر مختلفه في الموضوع و هي أن الأمر يعود إلي طريقة تعاملك مع ضابط الشرطة يعني سامحني ممكن يكون أصدقائك آستفزوه أو تحدثوا معه بطريقه غير لائقه أو مثلاً تهكموا عليه في الرد عند السؤال المعتاد "أنتم بتعملوا إيه " " أو إيه البنادق دي" " أو في ترخيص للبنادق دي" و علي شاكلة هذه الأسئله الذي إذا تمت الإجابة عليها بإبتسامه أو شئ من اللياقة في الحديث و ذكاء الحوار الموقف بيعدي.
الكلام ده مش كلام مرسل و الله و عن تجربه. فأحيناً كثيره أنا و محمد محمود بنقابل كمائن شرطه و معانا بنادق ديانا اللي شكلها لوحده يودي في داهيه و بطريقة الحوار الضابط بيبتسم و يقولك طب عدوا علينا شوية حمام و أنتم راجعين و مره إتنين ظباط قالك ممكن أضرب بيها مره . و أقسم لك بالله إننا ساعات بنضرب قدام قسم شرطه أو بوكس كمين واقف بس زي ما بقولك أسلوبك بيفرض علي الطرف الأخر طريقة التعامل. ممكن تلاقي حد مرعوب من منظر البندقية لما تنزل بيها من العربيه و في مثل ذلك الموقف نتعمد الإبتسام في وجه هذا الشخص المرعوب و طمئنته بكلمة "متخفش إحنا بنصتاد". النهارده مثلاً و في رحلات صيد سابقه كنا بنضرب أمام منطقه عسكرية أه و الله عسكرية و ممكن تلاقي حراسات الأبراج بعته حد يقولك أنت بتعمل إيه أو لو سمحت إمشي لما بنرد "إحنا أسفين و حاضر" بينتهي الموقف فوراً و ممكن تقلب بهزار و لكن تخيل لو رديت و أنت بتسأل ليه أو لا مش ماشي ؟؟؟!!!. صدقني أسلوبك أنت كصياد هو مفتاح الحل و ده نصيحه لكل الصيادين.
ممكن يكون برضه الضابط اللي قبض علي أصدقائك هو المخطئ و المتجني عليهم و الله أعلم بتفاصيل الموقف بس زي ما قلت لك بشئ من الحنكه المواقف دي بتعدي حتي لو الضابط غير متفهم أو عايز يعسفك يعني بمعني أصح تحكم بنفسك و بطريقة ردودك حتي تتحكم في الموقف و رد فعل من أمامك و كل ده عن تجربه و الله.
أخيراً و ليس أخراً لازم كلنا نبقي عارفين إن سؤال أي ضابط عن السلاح اللي في إيدك ده من صميم عمله و علينا مراعاة ما تمر به البلاد من ظروف إرهاب و إطلاق نار علي الضباط و خلافه.
أعهدك شخص متفتح و مثقف و ستتفهم كلامي جيدا

خالص تحياتي لحضرتك

أولا و قبل كل شئ تحياتي لحضرتك

وجهة نظر حضرتك طبعا تحترم و هي واقعية جدا جدا
بنسبة 50% من وجهة نظري المتواضعة يمكن تطبيقها علي أرض الواقع
الـ 50 % التانيين خاضعين لعامل آخر مهم
و هو إن في ضباط مرضي نفسيين و ده واقع مينفعش نهرب منه
أنا من فترة عملت موضوع و قلت إني خرجت مع أصدقاء ليا
كانوا بيصطادوا و أصروا إني أجرب أضرب رش
و عجبني الموضوع جدا و إكتشفت إني ممكن أنفع صياد علي أدي

و بدأت أفكر أجيب بندقية
في اليوم ده عدت عربية دورية فيها ضابط أمن مركزي و سواق و 4 عساكر
هدي جنبنا و بصوت عالي قال ( سلام عليكم )
قربنا عليه
لما شاف البندقية من علي بعد حوالي 10 أو 15 متر
قال تمام يا باشا لا مؤاخذة و إبتسم
أنا بقي مسكتش
أصريت أكمل لغاية عنده و قلتله ( لا يا افندم تشوفها حقك )
هو إحترمني يبقي لازم أحترمه غصب عني
لقيته رد الإحترام بإحترام أكثر و فتح باب العربية و نزل
و بيقولي ربنا يخليك كتر خيرك خلاص يا باشا
و فضل واقف معانا حوالي 10 دقايق بنتكلم في حاجات عادية
و مشي و توكل علي الله يشوف حاله

إنما في الموقف محل النقاش
لما يكون إتنين طلعوا بطايقهم و راحوا لغاية العربية
و إدوله البندقية في إيده
ياخد البطايق منهم و يحطها علي التابلوه
و يتكلم في الموبايل عشر دقايق
فبيسألوه من فضلك هو في مشكلة
يرد بمنتهي البرود أه في مشكلة لما نشوف الهبابة إللي معاكوا دي أقف هناك كده ...
و يكمل كلام في الموبايل ...
و في الأخر يصر ياخدهم قسم المرج
و يباتوا لتاني يوم العصر
و البندقية تتاخد منهم
يبقي أنا أسف لأني مضطر أوصف الموضوع بدقة ( دي قلة أدب و سفالة )
أنا أعرف الشخصين دول كويس أوي
مهندس و طبيب أسنان و ناس محترمة جدا
إنما للأسف كلام حضرتك ممكن يكون صحيح
مع ضابط سوي نفسيا و من بيت محترم
إنما هما قابلوا ضابط لا شاف تربية و لا يعرف إحترام
للأٍسف هي دي أخلاق نسبة غير قليلة من الضباط
و في الأخر بيسألوا بمنتهي البراءة ( ليه مش بتحبونا ؟؟؟ )
ضابط الشرطة يا أستاذي الفاضل إسمه عنصر فرض القانون
مش عنصر إستغلال النفوذ و قلة الأدب
هو بيعمل كده علشان يحس بنفسه شويتين تلاتة
و يمكن تكون إللي معاه علي الموبايل واحدة مش واحد
فحب يعمل شويتين أدامها أهي فرصة تسمعه بيتكلم كده مع حد ادامه

شكرا لسعة صدر حضرتك
و كل سنة و إنت طيب ( أنا أسف جت متأخره )