حقيقة الطبنجات الصوت

[elhosseiny]

من واقع مشاهداتى للعديدمن المواضيع المرتبطة بالسلاح الصوت و المبالغة فى الأسعار حبيت أشارك معاكم بوجهة نظرى المتواضعة و أتمنى إنها تلاقى القبول الكافى أو النقد حتى علشان نوصل لنتيجة.

أتمنى إن الناس تدرك إن السلاح الصوت ده مجرد حاجة للمرح .... يعنى زى ما الأجانب بيقولوا .... For FUN ..... أما كحماية و الكلام ده أنا شايف اللى يفتكر إنه هيحمى نفسه بيه يبقى بيهزر لأن سلاح الصوت لا يسمن و لا يغنى من جوع.

كل الموضوع إن فى بعض الناس (و أنا منهم) بيحبوا صوت الفرقعة و ضرب النار و مفيش مجال إننا نضرب نار حى، فبالتالى بنجيب مسدسات صوت و نفرغ طاقتنا.... ممكن نضرب رصاصتين فى فرح ..... خراطيش ألعاب نارية ..... يعنى الموضوع هواية و مالهوش علاقة بأى ظروف أمنية.

و طبعاً لا ننسى إخوانا اللى عايزين يعيشوا فى دور إنهم ظباط و يمشوا بمسدس شبه الحقيقى ... بس أعتقد إن الفئة دى قليلة (طبعاً لو الفئة دى كتير تبقى مصيبة لأننا هيبقى عندنا كم مرضى نفسيين كتير).

أما للحماية فده كلام فاضى، إلا لو واحد شاله فى البيت و سمع إن فيه حراميه فيقوم يضرب عيارين فى البلكونة يعمل بيهم دوشة و يرهب الحرامى اللى فى المنطقة .... بس بشرط إنه يكون فى مكان منعزل عن الحرامى .... يعنى ما يكونش فى المواجهة .... هنا ممكن نقول إن الطبنجة الصوت ساعات بتنفع .... إنما فى حالة المواجهة الأكيد إن ضررها أكتر من نفعها.

و برضه ينفع للغفر و الحراس على أساس إن صوته العالى بيلفت نظر الجيران ليهم و فى نفس الوقت ممكن يرهب اللصوص .... بس بشرط .... إنه ما يواجهش اللصوص بيه .... يعنى يضرب و هو بعيد عن اللصوص أو البلطجية .... يعنى بلاش مواجهة برضه.

الخلاصة، مفيش داعى للتهافت على السلاح الصوت دلوقتى و نصبر لحد ما الجو يهدى و الأسعار تبقى طبيعية و نبقى بعد كده نمارس هوايتنا عادى .... إنما اللى رفع الأسعار الفترة اللى فاتت هو الهوجة اللى خلت كل الناس عايزة تعمل منظر علشان وهم البلطجية اللى بينزلوا يقتلوا الناس ... و ده طبعاً كلام فاضى.

مجرد إن الجو يهدى فى الطلب شوية الأسعار هتنزل أكتر .... يعنى على رأى أحمد زكى فى فيلم البيضة و الحجر، ياريت نحارب الغلاء بالإستغناء ..... و بالأخص إن المسدس الصوت سلعة كمالية و مش أساسية و لا مهمة (لو فكرنا بشىء من المنطقية)