مسدس الصوت يسبب رعب للأهالى وليس للبلطجية

[monismod]

أنا عايز أقولكم على مشكلة بقت حاصلة دلوقتى .. إن بعد فترة البلطجية اللى انتوا عارفينها زاد الطلب على مسدسات الصوت والمسدسات الحية .. وأصبح عدد كبير من الناس يمتلك إما هذا أو ذاك .. والحمد لله مش كل المناطق فى مصر بها تهديد بلطجية .. ولكن كل المناطق بها مسدسات صوت وحى .. وطبعاً اللى عنده مسدس يا إما عايز يهوش البلطجية اللى بتفكر تخش المنطقة فا يضربلوا طلقتين فى عز السكون وفى منتصف الليل .. يا إما معندوش بلطجية فى المنطقة ولله الحمد .. بس الراجل لقى نفسه فى إيدوا مسدس وعلبة طلق .. طب أعمل بيهم إيه ؟ ما أنا أكيد هاضرب مش هاعد ساكت كده .. لحد ما حد ياخد منى المسدس .. اللى أصبح لعبة فى إيدى .. وفيه مشكلة كمان حاصلة .. إن لما حد يطلع البلكونة ويضرب 3 طلقات فى الهواء .. هاتلاقى اللى قاعد فى البيت وعنده مسدس قام اتنطر من على السرير وهو مرعوب إنه يكون بلطجى ولا حاجة .. وبيخرج البلكونة بحذر شديد .. ولما ما يلاقيش حد قدامه يقوم يضربله 3 طلقات هو كمان ..... الـ 6 طلقات بقى بتوع الشخص الأول والثانى دول صحوا الشخص الثالث اللى راجع من شغله تعبان ونايم مقتول .. فا بيصحى أخيراً وبياخد مسدسه ويطلع من ورا شيش غرفة النوم ويفرقعله 3 طلقات هو كمان ( يا ولاد الكلب على الله أشوف حد فيكوا هنا ) .. هو طبعاً جايب الشجاعة دى اللى هيا من وراء الشيش علشان هو لسة صاحى ولسة دماغه ما اشتغليتشى .. والظاهرة الأخيرة إنه شباب المنظقة اللى هما أصحاب بطبيعة الحال .. كلهم عندهم مسدسات صوت .. فا بيطلع هانى يضربلوا 4 طلقات متقطعين بطريقة الشيفره .. فا يسمعه وائل .. فا يطلع يرد عليه بـ 5 طلقات بطريقة تانية .. يقوم يرد عليهم سامح اللى معاه مسدس صوت بيشتغل رشاش ويفضيله خزنة فى لحظة .......

فا ينتج عن كل اللى حصل ده إيه ؟ إن الناس اللى فى البيوت اللى هما الناس اللى مش فى اللعبة دى والأطفال والنساء يحسوا إن فيه بلطجية فى المنظقة وإنهم بيضربوا نار على الناس ويعتقدوا إنهم كمان شوية هايطلعوا ليهم البيت يسرقوهم ويقتلوهم .. ويقدوا ليلة سودا منتظرين الموت .. وطبعاً لو فيه أطفال هايفضلوا يصرخوا فى حالة هيستيرية طول الليل ..

أنا عايز أفهمكوا حاجة .. انتوا لو قضيتوا ليلة معا الناس المرعوبة دى هاتكسروا المسدسات اللى عندكوا دى كلها .. حتى مش هاترضوا تبيعوها حتى .. علشان ماحدش يأذى بيها حد تانى .. أنا مش بقول إن حالة الرعب دى عند كل الرجالة .. بس هى أكيد عند كل الأطفال والنساء .. فكر قبل ما تضرب طلقة من مسدسك بعد كده فى الناس اللى هاتسمعها ..

شكراً