طريقة صنع مدفع صوت (طريقة الكريون)

[الأفوكاتو]

طريقة الكربون .. طبعا هي قديمة ، ولكن ماكنتش اعرف ان صوتها جامد كدة ، انا شوفتها في الشارع مع العيال أيام الثورة ، وكنت بسمع صوتها وانا في البيت وافتكر حد بيضرب بفرد خرطوش ، ولكن امبارح كان في فرح في الشارع عندنا ، فقولت أجامل العريس علشان جارنا وكدة ، روحت مطلع الحتة الروم والطلقات الألماني ومعبي وشادد وخرجت البلكونة ، طخ طخ طخ طخ ، أربع طلقات ورا بعض ، كل الفرح بيبص عندي في البلكونة ، وأتفاجئت بواحد من المعازيم سخن زي ما انا بسخن بسرعة بالظبط وراح مطلع فرد خرطوش (بروحين) وضرب الطلقتين ، طبعا انا هاروح فين بالروم جنب الفرد ههههههههه ، ولكن اللي انقذ الموقف (عيل صغير) دخل بيتهم جاب الماسورة بتاعته (الاختراع) وبل حتة الكربون وحطها وهز هز هز هز هز ، وولع ، بــــــــــــــــوم ، علي حق يابا ، طبعا انا والواد بتاع الخرطوش كل واحد فينا حط الحتة بتاعته في جنبه وعمل عبيط ، لأن حتة عيل صغير علم علينا كلنا بإختراع لا يتكلف 7 جنيه ، تخيل ! (7 جنيه) يعملو صوت اكتر من الروم والمقروطة ! سبحان الله .
اللي عايز اقوله : ان مافيش مانع نستعمل هذا الاختراع يا جماعة بدل الفرد ، يعني الناس اللي عايزة تشتري فرد ولو حتي هتضرب بيه صوت (زي الاستاذ اشرف نبيل لما كان بيدور علي طلقات خرطوش صوت بس) طيب ما احنا ممكن نستعمل هذه الأداة العجيبة بدل الخرطوش تجنبا للمخاطر المعروفة والمسائلة القانونية ، واهو بيعمل صوت اعلي من الخرطوش ، هو صحيح ليس له علاقة بالدفاع عن النفس ولا يصلح ابدا لذلك ولكن ينفع لهواة الصوت العالي ، ولا يوجد به اي نوع من المخاطر ولا الأضرار .
انا عن نفسي والله بعد الفرح ندهت علي الواد الصغير (في الخباثة طبعا) والكنزاية اللذيذة (رشوة طبعا هههههههه) وقولتله : قوللي بالتفصيل جبت الكربون منين لأني كنت ناوي اعمل واحدة من ايام الثورة وكنت مجهز الماسورة البلاستيك لكن كنت دايخ علي الكربون لأن الموان اللي عندنا بقالو فترة مش بيفتح ومش عارف اجيب منين ، قاللي موجود واجيبلك الكيس بـ2 جنيه فيه خمس حتت كربون (قولت عسل) خد عشرة جنيه هاتلي خمس أكياس ، وراح جاب الكربون وانا طلعت جهزت الماسورة وشريط اللحام وعلبة سبراي (دانهيل ديزاير) هههههههههه وفتحتها من فوق ودخلتها جوة الماسورة وخرمتها من تحت وظبطت الدنيا زي ما قال الكتاب ، وبليت الكربون وحطيطه في الماسورة وهزيتها حوالي 10 ثواني وولعت بالولاعة جنب الخرم اللي تحت واسمع الصوت يا معلم (ولا خرطوش ولا غيره) دي من الآخر ، والله الواد استغرب وزعل علشان الماسورة بتاعتي صوتها أعلي من صوت الماسورة بتاعته وقاللي حاجة غريبة (علمناهم الشحاتة سبقونا علي الأبواب) وكان متأثر يا عيني ، وانهاردة طول النهار كل ما يطلع يضرب أروح طالع البلكونة وضارب بماسورتي يقوم يزعل ويدخل تاني هههههههه ، المشكلة اني معرفتش منه المكان العجيب اللي بيجيب من الكربون لأني نسيت أسأله بعد ما جابه ، وطبعا بعد اللي حصل مش هيجيبلي كربون تاني ، علشان يفضل يضرب هو لوحده ، دي كانت حكايتي مع طريقة الكربون
خالص تحياتي للجميــــــــــــــع