أتقوا الله , الموجودين فى ميدان التحرير أسر الشهداء و البلطجيه مع الشرطة

[don'tshoot]

المشاركة الأصلية كتبت بواسطة axel

يا جماعة بالله عليكم مش ناقصة الاسطوانة بتاعت الشرطة هي السبب يعني سؤال الشرطة ضربت فيهم من غير سبب
عايز تعرف الصورة الحقيقية
الصورة ان ساعة لما كان فيه تكريم في مسرح البالون لاسر الشهداء
جت مجموعة كبيرة عايزين يدخلوا بالعافية بيقولوا انهم اسر الشهداء الله اعلم هم اسر الشهداء و لا لأ لكن حتي لو هم اسر الشهداء و عملوا كده يبقي اسمها بلطجة
و بعدها طلعوا ع ماسبيرو و بعض المتظاهرين انضموا ليهم و مشيوا معاهم في اتجاه وزارة الدخلية و ابتدي الضرب بالطوبو فعلا زي مقولت تكسيير محلات و عربيات ..ألخ و ابتدت الشرطة ترد عليهم راحو طالعين ع التحرير و ابتدا بعدها الضرب بالطوب في الامن المركزي و الامن المركزي رد بالطوب و القنابل المسيلة للدموع
و شيخ في عمر مكرم طلع في الميكروفون بيقول للناس فضوا ميدان التحرير فيه وسط الناس بلطجية راحت مجموعة كبييرة داخلة المسجد عشان يتعدوا ع الشيخ و مجموعة تانية راحت تحميه
ديه اسمها بلطجة و لا لأ و انهم يدخلوا مسجد بالطريقة ديه ؟؟؟؟؟؟
و الضرب شغال و الامن المركزي مشي من التحرير و طلع في اتجاه وزارة الدخلية
و الله اعلم ايه اللي حصل بعد كده و ع فكرة حضرتك بتقول مفيش اصابات في الشرطة و محدش جيه جنبهم بالعكس فيه اصابات في الجانبين لأن الاتنين ضربوا في بعض

و اللي سمعته من زمايلي و الاخبار ان بعد ما المتظاهرين راحوا في اتجاه وزارة الدخلية ضربوا في الامن المركزي و العكس و انضم ناس من المنطقة مع الامن المركزي

و كمان حضرتك بتقولي واحد لابس بدلة و مش لابس بدلة مهو يمكن ملوش دعوة بالقصة كلها و كان معدي بس من هناك زي صاحبي
بالاضافة ان اساسا لو حضرتك نزلت التحرير اول امبارح كنت هتلاقي الناس قالبينها جنينة هناك و منظر زي الزفت كراسي و اكل و عربيات كبدة و حمص و مقضينها هناك

فالموضوع كان عبارة عن ناس معتصمين و ناس معتصمين همج بيزيطوا في الزيطة و ناس جاية بتولع الموضوع و ناس ملهمش دعوة بحاجة اتاخدوا في الرجلين و ناس واقفين يتفرجوا و ناس حظهم المنيل انهم معديين من هناك

مش هقول غير ربنا يستر ع البلد و يعدي الايام ديه بقي مش ناقصين اللي حصل تاني و الانفلات الامني يرجع بعد ما ابتدت الدنيا تهدي

فعلا كلام مظبوط

ياريت الناس تفكر بعقلها شوية ولا تنساق وراء العاطفة

تكريم لأسر الشهداء من حزب يسمي حزب الوعد.... أنا معرفش مين حزب الوعد ومين هما اللي كرمهم وهل كرم ناس وساب ناس تانية... طيب ع العموم مش مشكلة

الناس اللي جت دي 3 أتوبيسات وبيقولوا أسر الشهداء جايين منين.... ومين اللي جابهم.... وعرفوا إزاي.... ومين اللي جمعهم في 3 اتوبيسات!!!!

وبعدين لو هما فعلا كده يقوموا يقتحموا المسرح ويضربوا الأهالي اللي بيتكرموا!

وبعد كده يطلعوا علي وزارة الداخلية ثم علي التحرير وطبعا فيه شباب طيب افتكر الثورة واعتداء الشرطة علي المتظاهرين وراح يساند مع إن الأمر كله مريب جداً ومش واضح!!

وبعدين لو فيه مماطلة لمحاسبة رؤوس النظام الفاسد السابق ، فالمماطلة دي هتفضل لحد امتي؟! ما هي البلد المفروض انها تدخل علي مرحلة جديدة مرحلة يختار فيها الشعب حكامه وتطبق فيها العدالة...

للأسف استقرار الأوضاع في البلد في صالح تحقيق الأمر ده... لكن أقعد أقول فين المحاكمة وفين دم الشهداء وخلاص كده والدنيا تخرب واحقق للناس اللي مش عايزة استقرار في البلد مرادها عشان يفضلوا هما شغالين في المخططات بتاعتهم يبقي انا كده بساند الثورة المضادة وانا مش واخد بالي..... من المعروف إن المراحل الانتقالية بتكون ضعيفة والنظام الفاسد السابق لم تقتلع جذوره والمجلس العسكري مش هيقدر يعمل كده ده أمر محتاج نظام كامل قوي ومساندة من جميع طوائف الشعب

[Zero]

kiko_2015
فعلا دا إذا كان أصلا فيه محاكمة و إذا كان أصلا مبارك فى مصر




MaddY
مأمور سجن طرة و الترقيات إلى حصلت فى البلد ترقية خالد شلبى و غيره و غيره دا غير أن المحاكمات لظباط الشرطة المتهمين بقتل المتظاهرين كانوا لابسين لبس مدنى يعنى مش محبوسين على ذمه التحقيق لأن أصلا النيابه و القضاء متقدروش تعملوا كدة بسبب ضعفهم أو بسبب إنها متورطهم معاهم




hisham
يا باشا انا كل إلى شوفته طوب أنا مش بكدب حضرتك طبعا أكيد أنا معاك لكن برضة المولوتوف مش صعب تنفيذه مانت مينفعش تضربنى بخراطيش و قنابل مسيله للدموع و أنا أبقى واقف مفيش رد فعل ليا لكل فعل رد فعل و دا من أضعف الإيمان و حط نفسك مكانهم




Axel
يا باشا أنا معاك أن الحزب إلى نقل الناس لمسرح البالون حزب جديد و محدش يعرف عنه حاجة بس دا الطبيعى لما يكون فيه شهداء محدش ذكرهم وأهالى لحد دلوقتى نارهم موجوده فيهم أكيد هيروحوا معاهم على الأقل تكريم أو على الأقل تخليد للشهداء فمش ذنب أهالى الشهداء أنهم راحوا لأن الخطة بجد إلى عملها واحد دماغ لأبعد الحدود و دا يعتبر كمين و أنا والله مش بتكلم بالعاطفة أنا بتكلم بعقلانيه لأن الموضوع أكبر من العاطفة فى وقتنا الحالى و شيخ عمر مكرم أسمه مظهر شاهين و مقالش للناس تمشى بالعكس دا قالهم خليكم فى مكانكم فى ميدان التحرير و بص على الخبر دة
http://www.masrawy.com/News/Egypt/Po...ns_mazhar.aspx
بالنسبه للأنفلات الأمنى أكيد لازم يرجع بس عمرة ماهيرجع و قيادات الأمن نفسهم فاسدين و أحرار و متفق مع حضرتك فى وجهة نظرك لكن الأحداث فعلا غريبه و لا يعلمها إلا الله لكن دا كان تحليل للى شوفته و للى سمعته من شهود عيان هناك و التليفزيون المصرى كان بيقطع عنهم المكالمة كالعادة يعنى برضة قناة نجيب سويرس لسه مع النظام السابق




smsmn8888
يا رب يا سمسم و إن شاء الله خير مصر يبقى لأهلها المحترمين و إلى بيسرقوها نشوف فيهم يوم لان لكل ظالم يوم




ahmadkader
والله الداخليه يا جماعة لسه فعلا زى ماهيا المحترم لسه محترم و إلى مش محترم عمره ماهيبقى محترم و التعذيب زى ماهو و السجون زى ماهيا و الرشاوى زى ماهيا و كل حاجة زى ماهيا دا غير الناس إلى عايزة تنتقم من الشعب




don'tshoot
الحزب دة يا باشا راح لأهالى الشهداء عند ماسبيرو و قالهم تعالوا هتتكرموا و من الطبيعى ان أى حد من أسرة الشهيد ممكن يروح على الأقل يتكرموا بدل ماقاعدين بقالهم 4 أيام مش بيتكرموا لكن الحزب دة طلع يا أما عامل حركة واطيه يا أما الناس دى أتراقبت لحد مادخلوا حته مقفولة و على فكرة لو كانوا روحوا بيوتهم كانوا أتضربوا جوة بيوتهم بالوضع دة ,,,,, و أكيد مفيش أسر شهداء هتضرب نفسها أو هتضرب أسر شهداء زيها لأنهم فى كارثة و مصيبه زى بعض ,,,,,,, و لو على أن الأمر مريب فهو فعلا مريب ,,,,,,, و كمان حضرتك بتقول مماطلة فى المحاسبه ماهى الناس معتصمة عشان كدة يبقى العيب مش منهم العيب من الأيدى الخفية إلى وراها الرؤس الكبيرة إلى لسه أحرار أو بيدوا أوامرهم من السجون ,,,,,,, و حضرتك بتقول مساندة من جميع طوائف الشعب طب قولى و النبى الفتنه ليه حصلت بعد مبارك على طول ؟ دا على أساس أن مبارك كان بيحمى المسلمين و المسيحيين ؟ دا بالعكس المسلم و المسيحى كان الضرر عليهم أكتر من بعض ودة مش أخد حقه فى البلد ولا دة أخد حقه فى البلد سواء حقوق أجتماعية أو أقتصاديه أو مشاركة سياسية أو دينيه حتى و يا رب الحال يتعدل و بجد أنا ليا صحاب كتير مسيحيين حتى لو أتكلمنا فى الدين بنتكلم بكل أحترام و عمر ماحد فينا أستهتر بكلام حد و عمر ماحد فينا قال كلمة على حد غلط لدرجة أننا لما بقول اللهم ماصلى على النبى عشان أفتكر حاجة بيقولولى عليه الصلاة و السلام بس أنا معرفش الناس إلى بتضرب فى بعض بسبب الفتنه دول مين ؟؟؟؟

[hisham]

المشاركة الأصلية كتبت بواسطة zero

hisham
يا باشا انا كل إلى شوفته طوب أنا مش بكدب حضرتك طبعا أكيد أنا معاك لكن برضة المولوتوف مش صعب تنفيذه مانت مينفعش تضربنى بخراطيش و قنابل مسيله للدموع و أنا أبقى واقف مفيش رد فعل ليا لكل فعل رد فعل و دا من أضعف الإيمان و حط نفسك مكانهم

لا ياباشا الامن كان واقف مش بيعمل حاجة ولو دققت هتلاقي والواقفيين هما الي رموا الحجارة الاول بالتالي الامن دافع عن نفسة هما مش هيهاجمو بدوون سبب (هما الي واقفيين دلوقتي هما الي كانو واقفييين يوم 25 يناير) ؟؟؟؟