البنادق التركية الموجودة فى مصر

[Ahmed Badran]

المشاركة الأصلية كتبت بواسطة adel152

الأخ العزيز المحترم أبوالشوق
انا كده تقريبا بقالى أسبوعين بأجرب البندقية دى. والتالى هو تقييمى الشخصى بعد تقريبا 300 رشه:
فى البداية كان فى صوت عالى (فرقعة) من كثرة زيت المصنع الموجود. الصوت أختفى تماما بعد حوالى 150 رشه.
صوت أحتكاك دراع التعمير الداخلى مع السوسته أصبح خفيف جدا وتقريبا غير ملحوظ.
أنا شخصيا أعتقد الدبشك تصنيعه معقول جدا ولم يسبب لى أى مشكله او جروح.
تم وضع صمغ مطاطى (علشان مايكونش فى مشكلة لما أحب أفك الدبشك) على سن المسمارين الأماميين للدبشك ومافكوش تانى مع الضرب.

أرجو من جميع الأعضاء الأخذ فى الأعتبار بأنى أتعامل مع بنادق الرش أقل من عام ولم أستخدم فى هذه المدة القصيرة سوى بندقيتين وهم التل المجرى كسر والنوريكا 61 .

البندقية بالنسبة لى قوية جدا جداجدا. أنا ضربت على كانزات فاضيه وبرشه ميزان مصرى الرشة عدت فى 14 كانز من الناحيتين ومن بعد 15 متر.
نيشان البندقية كويس جدا وقريب جدا من التل(وهى تعتبر بندقية ممتازة فى تجميع النيشان) وأحسن من النوريكا61 .

لو أى عضو زى حالاتى مابيحبش يضرب غير بالتليسكوب (أنسى - أنسى - أنسى) البندقية دى لأن التليسكوب مابيقعدش ثابت على البندقية دى من قوة البندقية ورد فعلها.
أنا جربت 3 تليسكوبات مختلفين الأحجام والقواعد والستوبر الموجود مع البندقية وتنظيف مكان تركيب قاعدة التليسكوب من أى زيوت موجودة بدون فايدة. لم أتمكن من تجميع أى نيشان بالتليسكوبات. مع أن التليسكوبات الى عندى ممتازة مع التل المجرى.

الحاجة المهمة الى حتخلينى أبيع البندقية دى أنها محتاجة أأجرلها واحد من بتوع كمال الأجسام علشان يعمرهالى لأن بعد الأسبوعين دول دراعى بحركه بالعافية ودلوقتى بعمر التل حاسس أن مافيهاش سوسته خالص من قوة السوسته التركى.

البندقية فيها نظامين أمان الأول لما تعمر البندقية الزناد لايعمل حتى ترجع الماسورة الى وضعها الطبيعى يعنى لو عمرت مش حتعرف ترجع السوستة تانى الا لما تضرب رشايه والتانى زرار أمان امام الزناد.

أنا أستعملت 5 أنواع رش مختلفة أثناء التجربة مارسمان والميزان (مصرى) - الرش التركى الجديد أبو بوز - الماركسمان (أنجليزى) - والديابلو (ألمانى)
وماتستغربوش لما أقولكم أن أحسن رشه بتجمع معايا هى الميزان المصرى ماأعرفش ليه........

من الأخر ياجماعة البندقية دى عايزة واحد صحته مساعداه (للتعمير فقط لأن البندقية وزنها ممتاز وموزونه ). ومابيحبش يستعمل التليسكوب. النيشنات الفوسفورية بتاعتها أحسن من النيشنات العادية وأول ماترفع البندقية بتجيبلك الهدف بسهولة.

أعتقد كده أنا أتكلمت تقريبا عن كل حاجة فى البندقية دى ولو فى أى أستفسار أخر أنا تحت أمركم.

الأخ العزيز المحترم عادل...
ياريت تقولنا خامات اجزاء البندقية وملحوظاتك عنها وعن سهولة تجميعها بعد الفك وهل هناك اثار تاكل فى اى جزء من الأجزاء.... هل تستطيع عد الششخانات ف الماسورة وهل هناك قاعدة كاوتش فى نهاية الدبشك.... وشكرا لمساعدتك...