هام اكتب زكرياتك مع اكبر سمكه فرغة منك

[ابو مروان]

اولا الموضوع ممتاز....ثانيا......انا هاكون طماع واكتب عن اكبر سمكتين وهما من نوعين مختلفين الاولى سمكة بلطى ودى حكايتها وقت الصيد كان العصر والطعم دود بلدى والسن تقريبا كان 7 وبغماز الوش قصير جدا وكنت زهقان والدنيا حر وما فيش شد خالص قمت فاتح المكنة وسايب الغماز ماشى محازى لسور كورنيش الترعة اللى كنت عليها والغماز ماشى ماشى ماشى وفجاة ما لقيتش الغماز .....انا قلت شبكت فى ايه دى دة الوش 20 سنتى المهم شكمت وانا متخيل انها شابكة فى كيس ...لقيت الخيط بيشق الترعة ويجرى على نصها وانا بالم ويحضن على السور تانى ويرجع على نص الترعة الترعة كبيرة حوالى 30 متر وحاجة تقيلة جدا انا قولت دى سلفر اكيد لغاية لما السمكة شرقت وطلعت على وش المية انا تقريبا اللى حسدتها .....بدون مبالغة فتحة بقها حوالى 10 سنتى وعريضة جدا حوالى تلاتين سنتى تقريبا كدا وزنها لايقل عن 3 كيلو......وانتو عارفين بلطى 3 كيلو يكون عامل ازاى فى المياة......المهم لميت لميت لما جت تحتى والكورنيش اللى انا واقف علية ارتفاعة حوالى 3 متر وما معيش شقاطة ومامعيش حد يساعدنى .....اتلخفنت وضربت لخمة وجيت انطرها على برة وبووووووووك السن فرغ والسمكة قعدت على وش المية ثانيتين تلاتة وبالسلامة....اليوم دة شربت نص علبة سجاير ورا بعض حزنا على السمكة دى.
الحتة التانية سلفر .... كانت كبيرة بردة تلاتة او تلاتة ونص كانت بتاكل فى الحشيشة اللى على وش المية وكنت لسة رايح المكان دة وما فردتش انا شوفتها طلعت العود قوام والعود تلاتة متر ستين وماكينة حلوة.......فردت بسرعة وحطيت حتة حشيشة على السن وهو سن كبير بتاع الغلة ورميت وقلت افرد باقى العود بابص ما لقيتش الغماز ولقيت العود بيتشد منى......وشكمت وطاخ لقيت الشد ولقيت العود بيطرقع وينكسر من العقلة التخينى اللى فيها الماكينة والسمكة شابكة رميت العود وقولت فداهية ومسكت الخيط وشديت لغاية لما طلعت على الجسر وبردة كان فية سور سلك بينى وبين المية وجيت ارمى على برة فرغت السمكة بس كانت تقيلة تقيلة وصلحت العود وكل لما امسكة وابص لمكان الكسر افتكر بنت اللذينة دى