عشان عربيات حبايبنا الصيادين متتسرقش

[محمد خلف]

هانتكلم على سرقة العربيات وهي مركونة وأزاى تحمى عربيتك من السرقة

من زمان ظهر أنواع من اللصوص متخصصين في سرقة الكاسيت (أيام الكاسيت والشرايط) , سرقة تجهيزات داخلية زي أجهزة السي دي أو الدي في دي , سرقة التوصيلات الداخلية للبلوتوث ...ووصولاً لسرقة الولاعة !!

وبرضة ظهرت عصابات متخصصة في سرقة العربيات ككل , وفكها وبيعها قطع غيار (أسهل وأسعارها مش بتقع زي العربيات المسروقة بالكامل) ... أو بيعها بالكامل بعد عمل أوراق ملكية مضروبة بالاشتراك مع موظفين فاسدين في إدارات المرور المختلفة

سرقة العربية وهي متوقفة بدون تواجد صاحبها مش بيتعمل بأسلوب احتيالي , لأ بيكون أسلوب سرقة إجرامي صرف , وبيعتمد اعتماد كلي على اقتحام العربية , إما عن طريق:
1- طفاشة (في حالة السيارات القديمة)
2- مفتاح مصطنع (في حالة السيارات الحديثة بدون جهاز مانع سرقة – إيموبيلايزر)
3- مفتاح مصطنع مشفر – في حالة تمكن السارق من برمجة مفتاح جديد بعد ما يقلب صاحب العربية في المفتاح الأصلي
4- كسر الزجاج أو الهوايات
5- الاقتحام عن طريق الشنطة الخلفية وإزالة الكنبة الخلفية

_______________________________________

أهم طرق منع اقتحام العرية لسرقتها أو سرقة المتعلقات داخلها:

1- الإنذار (فكرة قديمة واتهرست 300 مرة قبل كدة)

2- أفلام الحماية (يتم تركيبها على الزجاج من الداخل لمنع كسره)

3- انك ماتسيبش متعلقات شخصية أو شنطة اللاب توب (كعادة معظم الناس دلوقتي) , ماتسيبش موبايل أو جهاز جي بي إس ...ماتسيبش جهاز دي في دي قابل للفك ... ماتسيبش علبة سجاير أو حتى خمسة جنيه مقطعة ... للسادة الضباط ماتسيبليش بدلتك الميري متعلقة على الشماعة ورا ... يا حد هايسرق العربية بحالها نكاية فيك ... يا حد هايسرق البدلة الميري علشان يعمل بيها نمرة !! ...ماحدش يسيب ملابس وجواكت وحاجات لها قيمة على الكنب والكراسي لأن دي مدفوع فيها فلوس ومظهرها مغري للحرامي في كثير من الأحيان

4- بلاش نظام (هاخبي الحاجة تحت الكرسي) ... كل الناس بتعمل كدة وبالتالي كل الحرامية عارفين ان كل الناس بتعمل كدة ! ... يعني سيادتك هو بيلاحظ طرف الحاجة من تحت الكرسي ,,, ده شغله وهو بيؤديه بكل ضمير وأمانة !!

5- غطي عربيتك ... ماحدش هايحاول يعمل حاجة حرام ومخفية وياخد مخاطرة انه يشيل الغطاء من عليها ويكشف نفسه قصاد الكل – إلا في حتة مقطوعة وهو شغال براحته وبمزاج!

_______________________________________

أما عن طرق منع سرقة العربية ككل:

1- أقدم أسلوب ولا زال أنجح أسلوب: الزرار المخفي , بيتعمل عند ميكانيكي علشان فصل الكهرباء عن العربية ككل , وبينفع للسيارات القديمة فقط بدون سنترلوك أو إنذار

2- للسيارات الحديثة بيتم عمل نفس الفكرة في مكان خزعبلي , بيفصل طلمبة البنزين وبالتالي بتفضل الكهرباء موجودة علشان جهاز الإنذار يفضل شغال , لكن بتفضل طلمبة البنزين مفصولة لحد ما يتفتح الزرار (خد بالك ان الحرامي ميكانيكي ولو كان عنده الوقت هايجيب مكان الزرار فين)

3- جهاز الإيموبيلايزر (مانع تشغيل المحرك بدون مفتاح السيارة الأصلي) , ده حل أكيد بإذن الله وبدون المفتاح الأصلي العربية مش هاتدور , باختصار فكرة عمل الجهاز ده (وبالمناسبة هو تجهيز أساسي في العديد من السيارات الحديثة) وممكن يتركب برة عند متخصصين , انه كل مفتاح فيه شريحة إلكترونية بمثابة بطاقة تعريف , بتتواصل مع كونتاكت العربية وقت الدوارة بنفس أسلوب الريموت كونترول العادي , ولازم تتوافق الإشارتين علشان المحرك يستجيب ويقول أوكاي المحرك يبدأ يدور لأن ده المفتاح الأصلي ... من غير كدة العربية مش هاتدور (المفتاح الأصلي والاحتياطي للعربية بيحتوي على الشريحة دي)

4- قفل الدركسيون اللي جاي مع العربية , ناس كتير مايعرفوش ان العربية لما بتبطل المحرك وتشيل المفتاح (وتسمع تكة لطيفة كدة وانت بتشيله) انت ممكن تلف الدركسيون ناحية اليمين أو الشمال 45 درجة , ساعتها هايعمل لوك ويقفل الدركسيون ويتجمد مطرحه مايروحش يمين ولا شمال طول ما الكونتاكت مقفول , علشان يرجع يلف تاني لازم تدخل المفتاح الأصلي وتلف الدركسيون سنة بسيطة ناحية اليمين والشمال علشان القفل يتفتح تاني ,,, انا باقول كدة علشان معظم الناس مش بيستعملوا الخاصية دي ... والحرامية مزأططين بسبب كدة !

5- قفل الدركسيون اللي بيتباع برة ... هو فكرة فاشلة , بيضيع وقتك علشان كل مرة تفتحه هاتاخد وقت (مرة المفتاح اتكسر جوة القفل ووالدي تعب جداً علشان يعرف يطلع بالعربية) ... الحرامي بيبقى مجهز ... بيحط حقنة مليانة مية نار جوة القفل وبعد كدة بيفتحه زي الحلاوة !!!

6- نفس الكلام بينطبق على كلبش العربية , فيه كلبش بيتباع بيتركب على فردة كاوتش خلفية في العربية ويمنع تحركها بدون ما تتفك بمفتاح مخصوص لكدة .... ناس كتير عندهم الاختراع ده , ومش عارف هل بيفكوه هو كمان ولا لسة ماوصلتلهمش التكنولوجيا الكافية !!

7- بخصوص سرقة الكاوتش , خصوصاً الأنواع الغالية والجنوط الاسبور ... فيه حاجة اسمها "لوك كاوتش" , فكرته بسيطة هو عبارة عن انك تغير مسمار ربط الكاوتش (اللي بيتفتح بمفتاح + اللي في العربية) وتخليه مسمار بشكل مختلف ,,, بيتم فتحه عن طريق مفك مخصوص مش بيكون غير معاك انت (ماتسيبهوش في حتة مكشوفة وسهلة في العربية ولا في شنطة عربية سهلة الفتح) ... بكل بساطة حرامي الكاوتش بالذات بيكون راكب تاكسي أو عربية قديمة وبيركن على جنب بيعمل نفسه بيغير كاوتش عربيته هو ... ويغطي جنب عربيتك المواجه ليه ويعمل مصيبته وهو متداري ... بيجيب مفتاح + اللي معاه ويفك العجل ... وبالتالي في وجود الاختراع ده مش هايقدر بإذن الله يفكه ... بس سيادتك تكون متأكد انك مش جايبه من عالرصيف ... علشان ماتلاقيش الحرامي عامل حسابه وجايبلك مفتاحه معاه وهو جاي !

8- ركب فيها جهاز تتبع ... متجرب من ناس كتير وماركته كويسة ...دور عليه واللي يسأل مايتوهش , فيه أجهزة عندها خصائص عبقرية زي انه يتصل بيك لما باب العربية يتفتح أو يحصل فيها أكشن معين ... أو لو الموتور دار أو لو اتحركت العربية حتى من غير ماتدور ....الأجهزة دي أسعارها بتتراوح من 500 إلى 2500 ... وكله حسب ماركته وخدمة الدعم بتاعته ...أعتقد فيه موضوعات بتتكلم على تجارب مع الأجهزة دي (ده ينفع حل ناجح للحرامية اللي بيجيبوا ونش إنقاذ وياخدوا العربية كدة هيلا هوب بالكامل ... وطبعاً ماحدش بيسألهم في الطريق فين رخص العربية دي ورايحة فين)

9- دايماً خلي كاوتش العربية عليه طاسات ... يعني ماتسيبش المسامير كدة مكشوفة للهواء الطلق , علشان مايكونش سهل فكها ...خصوصاً ان فيه حرامية بييجيوا يفكوها يلاقوا خطر عليهم يسيبوها مفكوكة ويجروا ... والراجل الغلبان يركب العربية يفاجأ ان الكاوتش طار وهو ماشي بيها ويتسبب في حادث أليم (صديقة لزوجتي عربيتها اتقلبت بيها بسبب الحركة دي وأصيبت ) , ماتنساش ان تركيب طاسة على الكاوتش يستلزم ان بتاع الكاوتش يركبلك عليه حاجة اسمها "أفيز" بلاستك , مهمته انه يمنع الطاسة من انها تفك مع السرعات والمطبات ,, ومهمته انه يصعب عملية فك الطاسة قبل فك الكاوتش

يعني خلي عربيتك فيها إنذار ... ركب فيها جهاز بيمنع دورانها بزرار مخفي (إذا ماكانتش مجهزة بإيموبيلايزر) ... ركب عليها جهاز إيموبيلايزر ... اعمل طبقة حماية للزجاج ضد الكسر ... ماتشيلش فيها متعلقات شخصية أو أجهزة ... اركنها في مكان قريب من نظرك أو قريب من حد بيحرسها ... غطي الكاوتش بالطاسات وركب عليه لوك علشان مايكونش سهل الفك ... ركب فيها جهاز تتبع أو مانع دوران عن طريق الموبايل , غطي عربيتك واقفل الدركسيون أول ماتوقفها

الحاجات دي كلها تصلح منفردة أو مجتمعة , لأنها طبعاً هاتكون مكلفة لو اتعملت كلها مرة واحدة ...اعملها بمراحل , اعمل جزء منها أو كلها ...أي حاجة بس خد بالأسباب
.
الموضوع منقول
انا رفعت الموضوع دا اول ما لقيته لان عربيتنا اتسرقت قبل كده
الحمد لله رجعناها
بس الاغلبيه مبيعرفوش يرجعوها
و دي خساره كبيره متمناش حد من اخواتي الي هنا يخسرها
و يا ريت الموضوع يتثبت عشان الكل يستفاد منه

[dr mohamed kamal]

أنا بقى بفك شكوش الاسبراتبر و أخده معايا , لان غطاء الاسبراتير عندى بكلبسات سهلة الفك , و أعتقد إن الواحدين إللى إستفادوا من الثورة هم لصوص السيارات , موضوع مهم , تحياتى

[محمد خلف]

شاكوش الاسبراتير قطعه من غيرها العربيه ما تدور لانه الي بيوزع الكهربا الي جايه من المبينه على البوجيهات
احييك على فكرتك
بس دا صعب على ناس كتير
دا غير ان لو الاسبراتير مش مربوط كويس و لف منك الكهربا هتعلى او هتوطى و العربيه هتبرجل
غير كمان ان في عربيات الاتبراتير بتاعها الكتروني
و في عربيات حديثه من غير اسبراتير خالص

[هشام سمير]

ايو يا حمو بقا هى دى المواضيع
موضوع رائه
تسلم ايدك

[big man]

اكتتر من رااااااااااااااائع
الى الامام دائما

[sayed amer]

موضوع جميل ومفيد جدا تسلم ايدك واحلى تقيم ليك

[TheLegnedkiller]

موضوع جميل تسلم ايدك يا كبير

واحلي تقييم لحضرتك

[محمد خلف]

كل التقييمات دي بنقطه واحده بس؟؟؟؟؟؟؟؟؟
ولا انا اتقلبت في تقييماتي ولا اييييييه؟
هههههههههههههههههه
المهم الناس تستفاد و بس الباقي مش مشكله

[saidtaha57]