تجربتي مع السكوب عالجيت و الضبط بالليزر (بورسايتر)

[Ahmedlr]

السلام عليكم اخوتي في الله

اليوم ححكيلكم تجربتي مع تركيب السكوب عالجيت و ضبطه بالبور سايتر بالتفصيل

اولا : مرحلة التحضير و الشراء لجميع التفاصيل

• البندقية : نوريكا جيت جبتها من الاسكندرية من فتح الله (السعر : 1800 جنيه)
• السكوب : جامو 40*9*3 جبته اونلاين من علي اكسبرس و طبعا عدي بمعجزة و ادبست فيه بقواعد 20 مللي فطبعا منفعش يركب عالبندقية (السعر: 400 جنيه تقريبا+- 30)
• القاعدة : قطعة واحدة عالية مقاس 10 -11 مللي تم طلبها منفردة من علي اكسبرس (السعر: حوالي 80 جنيه)
• البورسايتر: طبعا نوعه اللي يحب النبي يزق .. بس شغال و كنت مرعوب من انه ميجيش علي مقاس البندقية لان المانيوال بيقول انه بيبدا من عيار .22 و انا عيار .17 بس ربنا سترها و نفع و الميزة الجامدة اللي فيه انه ليزر اخضر (السعر : 220 جنيه)

ثانيا : مرحلة التجميع و التجهيز

• نضفت البندقية بالمجري بتاعت الاسكوب تنضيفة سريعة
• ربطت الاسكوب بالقاعدة بالتوازن و بميزان المية
• حطيت السكوب عالمجري و رجعته للاخر بحيث انه يكون ملامس للاستوبر اللي في اخر المجري
• ربطت كل المسامير بالالن الخاص بهم
• بخصوص البور سايتر .. هوا جاي معاه غيارات علشان التثبيت في كل العيارات بس طبعا مفيش ولا غيار علي مقاسي :d فاضطريت اني ادخله في الماسورة زي ماهوا و اتاكدت انه شغال. وهنا ابتدت مرحلة الضبط

ثالثا : مرحلة الضبط

• حطيت البندقية في وضع ثابت و مستقر بعد التاكد من عدم تعميرها
• شغلت الليزر في البور سايتر و حطيته في السبطانة
• طبعا لاقيت البيم بتاع الليزر في حتة و كروس التليسكوب في حتة تانية خالص
• بدات بالضبط الافقي و الراسي للتليسكوب لغاية ما تطابقت الكروس علي نقطة الليزر بس طبعا كان في مشكلة ان الزوم كان علي 3 لان الزوم العالي كان يتطلب مسافة اكبر.

رابعا : مرحلة التجربة

اخدت بعضي و طلعت فوق السطح بتاع بيتي و فرحان بالبندقية و منشكح عالاخر .. و الاقيلك تلات حمامات مكلبظين و كنت حجرب فيهم بس محبيتش اني بفرحتي انكد عليهم فضلا عن اني مبحبش اصطاد في نهار رمضان فهشيتهم و ابتديت انشن علي اهداف بعيدة باستخدام نفس درجة الزوم و هنا كانت المفاجئة .. الاصابة غير دقيقة و بالاعادة اكشفت انحراف في الاصابة و طبعا مع الزوم الانحراف تضاعف و بيكبر كل ما بعدت المسافة و طبعا اتنكدت .. بعدها طلعت البورسايتر لاعادة الضبط و مشيت علي الخطوات المذكورة اعلاه
بس المرة دي عمرت البندقية قبلها و بعد التاكد من الضبط شيلت البور سايتر و ضربت عالهدف و عرفت ساعتها ايه المشكلة .. طبعا علشان البور سايتر مش داخل زنق في الماسور فده بيخلي فيه بوش و بالتبعية كان فيه معامل خطأ محتررم ... و باعادة الضبط علي اساس معامل الخطأ .. الدنيا نورت و اشتغل التليسكوب حلاوة .. بس انا ناوي اثبته عند زوم 5 لان بيكون برضو في نسبة انحراف مع الزووم العالي ...

يا رب تكون التجربة واضحة و اسيبكم مع الصور