ظبط النيشان والبندقية ثابتة ومحمولة

[ابو مروان]

السلام عليكم ايها الاخوة الصيادون العظام .........لما بنجيب بندقية جديدة ونجرب نظبط نيشانها ناس بتقول خلى البندقية ثابتة على حامل او على منجلة او اى شىء اخر وحط الهدف واضرب 3 رشات ورا بعض والبندقية فى نفس الوضعية وفعلا بنظبط النيشان حسب القواعد المتبعة واللى المعظم عارفها وهى تحريك البكرة اللى على يمين الناشينكان لو عايزين نظبط اليمين والشمال والبكرة اللى فوق لما نظبط فوق وتحت ......بعد كدا بنشيل البندقية ونضرب نلاقي النيشان مختلف شوية ...عالى سنة او واطى سنة يمين او شمال.......وتبدا الحيرة طب ما هى كانت لسة مظبوطة.........والا حيرة والا حاجة ...من خلال التجارب الشخصية ...... فى الاول والنيشان موش مظبوط خالص ثبت البندقية على حامل واضرب لحد ما تظبط النيشان والرشاية تبقى على الرشاية او جنبها بسنتى او اتنين ......بعد كدا اضرب والبندقية متشالة وشوف الرش هايتجمع فين لان تجميع الرش والبندقية متشالة دة اللى هاتمشى علية وتظبط البندقية بناء علية.......كل واحد مننا لة ماسكة للبندقية وكل واحد جسمة غير التانى وعضلاتة وتنفسة غير التانى يعنى تجميع البندقية وهى متشالة له عوامل كتير بتختلف من صياد لاخر.......يعنى انا مثلا عشان تبقى المسالة واضحة....لو البندقية ثابتةب اضرب تيجى فى السوادة بتاعة الهدف اللى بنشن علية...ارفع البندقية واشيلها الرشاية تيجى تحت السوادة وناحية الشمال بفارق 3 سنتى ....يبقى انا كدا اظبط اناشينكان على الوضع دة ارفعة واجيبة سنة يمين واضرب الاقيها جت فى السوادة بالظبط.......كل واحد عايز يظبط نيشانة يعمل كدا ويركز على تجميع الرش والبندقية متشالة لان معظم الصيد بيكون والبندقية متشالة موش ثابتة وياريت كل واحد هو اللى يظبط نيشانة بنفسة لان ظبطة كل واحد تختلف عن التانى اى نعم القواعد ثابتة وواحدة بس كل جسم ووضعية ايد ودراع بتختلف من واحد للتانى......يارب اكون قدرت اوصل المعلومة وتحت امركم فى اى استفسار

[_SAIKO_]

صباحك سكر ابو مروان

توضيح مهم و باسلوب جميل .. تسلم

[محمد خلف]

موضوع جميل اوي يا ابو مروان

[ابو مروان]

_saiko الف شكر مرورك وتعليقك

[ابو مروان]

محمد خلف...دى شهادة جميلة من حضرتك الف شكر

[big man]

رد فعل البندقية وهيا على المنجلة بيتحبس ومبتاخدش راحتها لانها مربوطة
رد فعلها على ايدك وكتفك وضعية تانية خالص
موضوع رائع يا كبير تسسسلم

[ابو مروان]

حبيبى يا بج مااااااااااااان وردا بيضا يا حاج

[dr_mohasan]

الموضوع ده مهم جدا ، الله ينور عليك يا ابو مروان

[adel152]

تسلم ايدك يا ابو مروان. موضوع جميل جدا ومفيد للجميع.

[ابو مروان]

dr_mohasan...........نورت الموضوع يا دكتورنا العزيز

[ابو مروان]

adel152......شهادة غالية من خبير محترم

[وليد سالم]

تسلم ايدك يا ابو مروان يا جامد

[sayed amer]

اولا تسلم ايدك ع الموضوع بس ياريت نحاول نبسط الامور اكتر من كده لان بصراحه الكلام ده لو واحد مستجد هيقراءه ممكن يتعقد من البندقيه والرمايه اصلا ومش بعيد يكره الهوايه كمان ومن فتره كان فيه واحد هنا ع المنتدى كان عارض بندقيه للبيع بسبب انه مش عارف يستخدمها ووكان حاسس ان الهوايه معقده جدا واصعب من اللازم وانا اتكلمت معاه فعلا وهو كان واخد قرار انه يترك الهوايه لسبب صعوبتها

[ابو مروان]

sayed amer شرفنى مرورك والف شكر لاهتمامك بالموضوع.......اولا الصيد هواية راقية بل لا اكون مبالغا ان قلت انها غريزة او فطرة تولد مع الشخص واهم صفة يكسبها الصيد هو الصبر.......نبسط الموضوع.......لو اى واحد جاب بندقية وفاكر انه اول ما يمسكها هايصتاد يمام وحمام الخ الخ ..يبقى غلطان لان الصيد ممارسة وخبرة بتيجى سنة ورا سنة يمكن طلعة ورا طلعة بتكتسب حاجات وتتعلم حاجات............يبقى الصياد لما يجيب البندقية اول شىء يظبط نيشانها ويتعلم يمسكها صح ويولف عليها وتولف علية لان كل بندقية تختلف عن التانية بعد مرحلة ظبط النيشان ودى اهم حاجة تيجى الممارسة وسؤال الخبراء والمخضرمين فى الصيد .........المشكلة ان الصيادين الجداد اللى لسة منضمين عايزين يكسروا الدنيا على طول ويعملوا اسكور فى كل طلعة ودة اللى بيخليهم يزهقوا بسرعة واى واحد يطلع مرة او مرتين او تلاتة وما يصتادش حاجة ويفكر على طول انه يبيع البندقية ..دة موش صياد والا عمرة هايكون صياد حتى لو معاة احدث بندقية فى العالم.....احيانا بعد حوالى 20 سنة صيد باطلع طلعات وارجع بجوز يمام_ههههههه وساعات يمامة واحدة ......وعمرى ما فكرت ابيع البندقية واسيب الهواية

[Mohamed sh]

مشكوووووووووور

[قناص اسوان]

تسلم يا استاذنا وبارك الله فيك على الشرح الوافى وعندى استفسار انا عملت كل اللى قولت عليه ولكن مفيش رشاية بتاجى فى مكان واحد مرتين مش عارف العيب فى ايه البندقية كرال

[ابو مروان]

قناص اسوان... اولا تحياتى لاهلنا الطيبين بتوع اسوان كلهم ...ثانيا البندقية الكرال بالتجربة يا عزيزى فيها مشكلة فى تجميع النيشان...لازم يتعمل لها تعديلات كتير ..السوستة والجلبة الجوانية والقاعدة السوستة عشان تبقى مظبوطة 100%غير كدا هاتشكل ممكن رشاية فى السنتر ورشاية بعيد خالص.........ربنا يكرمك ببندقية حلوة وهاتلاقى نيشانك تمام التمام بس الكرال حلوة كبداية

[قناص اسوان]

شكرا لتعاونك استاذى الكريم والله بجد انت انسان قمة فى الاحترام والزوق وشرف ليا انى اتعلم منك واكون من تلاميذك .... ثانيا انا غيرت السوستة بس ومش عارف ايه هى الجلبة الجوانية وازاى اغيرها ولا قاعدة السوستة برضه .... ومعلش لاسئلتى الكتير .....

[ابو مروان]

والا يهمك يا قناص ...احنا هنا عشان نتعلم من بعض.....بص يا غالى ابحث فى المنتدى عن مواضيع تعديل الكرال....الاستاذ عادل عبدة لية كذا موضوع وهو الخبير الاول فى الكرال ومن اول الناس اللى عدلوها

[ehab.bob]

موضوع رائع ومجهود مشكور من حضرتك وأحب اضيف اننا دايما بنظبط البشان والبندقية فى وضع أفقى ولما بنبتدى نصطاد بتكون فى وضع رأسى أو بزاوية 45 درجة ودى حسابات لازم تتحط فى الحسبان واحنا بنضرب ..... تقبل تحياتى

[bekhet]

موضوع جميل ومهم
بس المفروض يكون الوضعين قريبين من بعض
اهم حاجة برضو ان يكون التجميع كويس لان لو رشة يمين وواحدة فوق وواحدة تحت هتبقى مشكلة لكن لو بتجمع فى اى حتة مش مشكلة الصياد مع الوقت هيحس بالبندقية ويعرف بتجمع فين
مشكور على الموضوع المهم

[ابو مروان]

بالظبط يا استاذ بخيت.....لازم يكون النيشان مجمع فى مكان واحد موش مشكل

[بكر سعودى]

مشكووووووور

[ابو مروان]

ظبط الناشينكان...من الارشيف....حتى تعم الفائدة

[Mohamed Mahmoud]

فعلا والله موضوع مهم جدا جدا
تسلم على الرفع يا متر