تأجيل حظر النقاش في الأسلحة الحية والمحولة علي الأقل في هذه الأيام الصعبة

[الأفوكاتو]

موضوع جرئ شوية (انا عارف) ورخم (ممكن) ويخوف (احتمال) ومش هيعجب ناس كتير (ده اكيد) وهلاقي احلي هجوم عليا دلوقتي واعتراض ويمكن يحذفو الموضوع او حتي يلغو عضويتي (مع اني لسة جديد ومكملتش شهر) ، بس كل ده مش مهم ، الموضوع بجد عايز تفكير مع النفس لمدة دقيقة واحدة (60 ثانية) ، انا عارف ان ممنوع و (محظور) النقاش او فتح مواضيع في هذا المنتدي (الجبار) عن الأسلحة الحية أو (المقلوبة) أو (المحولة) وذلك من أجل السلامة العامة اولا وأخيرا ، ولخطورة هذه العملية ، ولـــــــــــــــــــكن ، هل احنا دلوقتي مش في خطر ؟ هل مافيش بلطجية ؟ ، هل مافيش سجناء هربانين من السجون ومعاهم سلاح ، هل مافيش حالات سرقة وسلب ونهب واغتصاب وتحرش واستيلاء وخطف وقتل وترويع ؟
طيب احنا مستنيين ايه علشان ندافع عن انفسنا إذا (لا قدر الله) تعرض احدنا (ممن لا يمتلكون أسحة دفاع عن النفس) ، هو احنا منتظرين لما نتعرض للموقف ونبتدي نفكر في الدفاع ؟
الأخ اللي عامل موضوع عن الدفاع عن النفس ، والحقيقة ان الراجل قلقان (زي ما انا وكل الناس قلقانين) من اللي حصل في التحرير فجر يوم السبت ، والأخ اللي عمل تعديل علي مسدس (الروم) والهجوم اللي حصل والمشادات بين بعض الأعضاء (ملهاش لازمة ومش وقتها الحاجات دي) أثناء الردود والمشاركات في الموضوع
طيب هنفضل لغاية امتي نقول (ممنوع الكلام في الموضوع ده) (لأنه خطر) لأنه ممنوع لأنه لازم ترخيص بحمل سلاح لأنه مش عارف ايه ، طب وبعدين ، في حين أصلا ان كلنا كنا واقفين امام بيوتنا نحميها وكلنا معانا اسلحة متنوعة ، بس افضل واحد فينا كان معاه مسدس حي أو بندقية نارية فأقل ، مع اننا عارفين ان البلطجي اللي جاي دلوقتي جاي ومعاه (كلاشينكوف) او رشاش او فرد خرطوش (يادوب هيضرب طلقة والبلي هايجي فينا كلنا حتي لو كنا 30 واحد) يعني واحد ممكن يأذي 30 واحد ، وبردو مكناش خايفين ، ده انا ناقص اقول زي المليجي (كنا رجالة ووقفنا وقفة رجالة) وكل شوية واحد ابن حلال في الشارع يجي يجري ويقولك (جايين من هنا) (دول لسة مموتين واحد علي الناصية) وبردو مخفناش (لأن كلنا نزلنا واحنا عارفين اننا لو موتنا هنموت شهداء (دفاع عن النفس أو المال او العرض او الأهل) كفانا الله واياكم شر القتال
بس انا شايف ان مش ده الوقت اللي يرد اعضاء علي اعضاء ويقوله (انت مبتفهمش) انت عارف ان ده ممنوع من المنتدي (وأرجو من الادارة حذف الموضوع ) ومش عارف ايه ، مش وقته
ليه منتكلمش في كل حاجة (ليه لما واحد يقول عايز اقلب المسدس الصوت بتاعي) يطلع خمسين واحد يقول ارجو حذف الموضوع وانت عارف ان ممنوع (اه انا عارف انهم خايفين عليه من قلبهم والله عارف) بس هما لما بيتناقشوا بيتكلمو بأسلوب بيولد عندنا شعور واحد كلنا حسينا بيه واتربينا عليه وهو (الممنوع مرغوب) بمعني ممنوع احول المسدس (طب والله هاحوله بقي ها) مع انك ممكن تتكلم معاه عادي خالص زي ما بنتكلم عن مسدسات الصوت وتفهمه بطريقة لائقة وجهة نظرك وتخليه يقتنع (زي انا مثلا اقتنعت بخطورة موضوع التحويل ده علشان ربنا وقعني في واحد ابن حلال عرف يقنعني بهدوء) مع اني عندي والتر ألماني p88 مسدس قوي وممكن اقلبه وخاماته حلوة ، فأرجو الهدوء وضبط النفس وتوصيل المعلومة بحرفية وذكاء وارجو ايضا عدم التقيد بحظر الكلام عن جميع انواع الأسلحة (علي الأقل في الوقت الراهن) لأننا بصدد خطر (مضي) وخطر (قادم) ، واللي مش مصدقني يبقي يشوف لما انتخابات مجلس الشعب تيجي هايحصل ايه والله متوقع مدابح (واحلي اشتباكات) وانفلات امني تاني (انا مش ببشر طبعا ربنا يستر) ولكن الانتخابات اللي فاتت شوفته حصل ايه وكان في حبيب العادلي ما بالكو دلوقتي والبلطجية خاربين الدنيا (وصلت انهم يشتبكو مع الجيش في التجرير) يعني مش هاممهم حاجة ولا هاممهم حد ، يبقي نهدي شوية ونعرف قيمة الخطر اللي احنا فيه .
واسف لو كان كلامي دايق حد ، او كان غلط بس انا قولت اللي انا شايفه
تحياتي للجميــــــــــــــــــــــــــــــــع