|
|
|||||||
| الورشة صيانه البنادق واصلاح مشاكلها الفنيه. |
|
|
أدوات الموضوع | إبحث في الموضوع | انواع عرض الموضوع |
12-11-10, 12:44 PM
|
#1 |
|
صيــــــــاد محتـــــــــرف
تاريخ التسجيل: Feb 2012
المدينه: الاسكندريه
المشاركات: 2,659
معدل تقييم المستوى: 140   |
الحل النهائى لمشكلة كسر قواعد مسامير الدبشك ( وثبات المسامير ايضا)
السلام عليكم ورحمة الله وبركاته
النهارده هانتكلم عن موضوع تلف قواعد ربط المسامير فى بعض انواع الدباشك وبالاخص فى الكرال والمشكله دى بتقابل ناس كتير اوى ومع الاسف لما بتروح اى ورشة اسلحه عشان تصلح المشكله الفنى بتاع الورشه يقولك الدبشك كده باظ ومالوش حل يعنى سيادتك كده قدامك حل من اتنين يا اما تبطل صيد يا اما تجيب دبشك جديد بــ250 او 600 جنيه مثلا على حسب نوع البندقيه واللى حصل معايا انى حسيت ان قواعد المسامير عندى اتشرخت من كتر الضرب ورد الفعل وفكرت فى الفكره دى ونفذتها ويادوب كلفتنى حوالى 20 جنيه بس والحمد لله بقالها اكتر من شهر ونص شغاله معايا زى الفل وخرجت رحلات صيد فى الفتره دى حوالى 7 رحلات صيد ده غير الرش اللى باضربه فى البيت على اهداف ولله الحمد الفكره ناجحه نجاح تااااااااااااااام وثبات جميل والمسامير مبقتش بتفك لوحدها كمان من الضرب زى الاول وبسم الله نبدأ الادوات المطلوبه اتنين انبوبه لاسق اسمه A H D adhesive ودول بــ 8 جنيه عند محلات اكسسوار السيارات  اتنين مسمار للدبشك ضعف طول المسمار الامامى الاصلى لكن نفس القطر الاصلى  مسمار خلفى للدبشك اطول من الاصلى بـ5مللى ونفس قطر الاصلى ........ خمسه صاموله مقاس عشره  تلاته اولسين استك على قد المسامير بالظبط اتنين للمسمارين اللى قدام وواحد للمسمار الخلفى  صوره مجمعه للكل  كده احنا جاهزين للمعركه يلا نبدأ بقى الحرب هانركب صامولتين فى مسمار من الاتنين الطوال اللى جبناهم للدبشك الامامى وحط قبل الصواميل اولسين بلاستك من اللى جبناهم وعى فكره الصاموله هاتلاقيها اوسع من المسمار شويه صغيرين ماتقلقش انا قاصد انهم يكونو واسعين شويه عن المسمار عشان سن المسمار مايبقاش مرتبط بسن الصاموله يبقى سن المسمار حر يعنى جوه الصاموله وهايكونو بالشكل ده  وجمع البندقيه ولما هاتيجى تنزل المسمار بالصواميل فى ثقب الدبشك هاتلاحظ ان الصاموله تخينه شويه وممكن ماتنزلش فى الثقب بتاع المسمار اللى فى الدبشك واحد من الجماعه المنفسنين هايبصلى بصه كلها غيظ واستهزاء ويقولى ايه ده ياعم الخفيف الصاموله كبيره انت بتهزر ولا ايه انا طبعا هاتنرفز اوى من طريقة كلامه وهاقوم خابطو بوكس محترم فى وشه واقوله اصبر بس وكمل معايا الشرح ومتخنقنيش  ههههههههههههههههههه انا ياعم قاصد انها تكون اكبر من ثقب الدبشك شويه ودى حلها سهل هاتقوم جايب شنيور وتحاول توسع الثقب بتاع الدبشك حجات بسيطه خالص حوالى 1 مللى كده اكبر من الصاموله لغاية ماتحس ان الصاموله بقت بتنزل فى الثقب مستريحه خالص ولمست القميص تحت وطبعا كل ده وانت حاطط المسمار بتاع الدبشك فى الصواميل وبتربط بيه وهاتعمل الموضوع ده فى المسمار التانى كمان وبعدين جمع البندقيه وربط المسامير بالصواميل لاخرها بس ماتقرصش جامد عليهم فى الربط دلوقت بس اتأكد ان الصامولتين ملتصقين ببعض ونازلين لغاية القميص تحت واربط كل المسامير بتاعة الدبشك بالطريقه دى نيجى بقى للخطوه الاهم فى الموضوع كله فضى شوية لاسق من كل انبوبه واخلطهم على بعض كويس اوى وابدأ بحاجه رفيعه ونزل المعجون ده حوالين الصواميل فى الثقب بتاع الدبشك اعمل مسمار واحد دلوقت واملى الفراغ كويس اوى حوالين الصواميل بس خليك حريص انك ماتنزلش معجون على الصاموله من جوه او على سن المسمار وحاول تعمل الكلام بتاع المعجون ده بسرعه لأن المعجون بيبدا فى الجفاف بعد خمس دقايق من خلطو ببعضو واحد من الجماعه المنفسنين هايزعقلى ويقولى ياعم طيب مانشيل المسمار خالص دلوقت ونلزق الصواميل بس انت هاتتعبنا معاك ليه هاقوم انا رازعه بوكس كمان فى وشه واقوله ماينفعش يازكى افندى هههههههههههههههههههههه لازم نثبتهم ونلزقهم بالمسمار عشان المسمار وهو مربوط فى الدبشك والقميص مع بعض هايظبط الصواميل على الدبشك اكتر وهايكون شكله كده بعد اللزق  وهانحط اللزق على مسمار واحد النهارده ونسيبو حوالى 10 سعات كده وبعدها هاتحل المسمار عادى وهاتلاقى الصواميل بقت حدييييييييييييييييد وكأنها حتة واحده من الدبشك كده اتطمنا على اول مسمار نربطه زى مكان بقى وندخل على المسمار التانى ونكرر نفس الموضوع معاه وسيبو عشر سعات كده لغاية ماينشف وبالنسبه للمسمار الخلفى اللى عند الزناد ده بقى حطلو صاموله واحده واعمل معاه نفس الحوار اللى عملناه فى المسامير الاماميه بس ماتوسعش الثقب حاول تدخل الصاموله حشر ولو معرفتش حاول تاكل من الصاموله من الخارج شويه على الحجر بسسسسسسسسسسسسس كده هو ده كل مافى الامر تعالى بقى هات القطعتين دول اللى هما الحليه اللى بتركب على الدبشك فوق المسامير فى الكرال والجامو  هاتيجى تركبهم مش هايركبو كويس عشان طبعا المسامير بقت عاليه شويه وراس المسمار هايمنعها من انها تنام فى مكانها  طبعا الراجل المنفسن اياه هايقعد يشخط فيا ويزعقلى تانى كالعاده ويقولى بوظت الدبشك الله يخرب بيتك ويروح يجيب قرايبو واصحابو وييجو عشان يضربونى بقى هاقوم خابطو بوكس تانى بس جامد شويه المره دى عشان يبطل تنطيط ههههههههههههههههههههه واقولو يابنى اصبر لما اكمل كلامى وشرحى بص ياسيدى هاتحط الحليه بتاعة الدبشك مكانها كأنك هاتركبها وعلم على المكان بتاع راس المسمار وحاول تخرم فيها بالشنيور خرم صغير على قد راس المسمار بس براحه ماتضغطش عليها جامد وانت بتخرمها عشان دى ضعيفه وهايكونو بالشكل ده  وبعد كده ركبها ياباشا عاااااااااااادى جدا ومش هايكون فيه مشكله تانى ان شاء الله وهايتكون بالشكل ده  ووالله بقالى فتره كبيره اوى شغال بيهم كده ومن الاجابيات اللى حسيتها فيهم صوت البندقيه مبقاش فيه الزنه بتاعة الاول المسامير مبقتش بتفك نهاااااااااااائى وحتى فى الفتره اللى ركبت فيها سوسته ديانا وبرغم رد فعلها القوى مفيش مسمار اتنفس وبكده يبقى المشكل اتحلت ان شاء الله واخيرا انا باعتزر للأخ المنفسن اللى انضرب منى كتير النهارده وباقوله ماتزعلش منى بس اعمل ايه بقى انت اللى كنت بتنرفزنى وعلى فكره هو زعلان من اعضاء المنتدى اوى ان محدش منكو راح زارو فى المستشفى لغاية دلوقت  ههههههههههههههههههه والسلام عليكم ورحمة الله
__________________
*لـيس كـل مـن حــمـل السلاح كـان صيـادا* *ولكن كل من كان صياداً كان للأخلاق عنوانا* |
|
|
| sponsor links |
| sponsor links |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| ايه حل مشكلة فك المسامير بعد الضرب | tabeeb | بنادق ضغط الهواء ومتعلقاتها | 14 | 22-09-18 05:42 PM |
| الحل النهائى للسمنه و النحافة و تساقط الشعر الميزوثيرابي | GEN- I A Z | مقتنيات الاعضاء | 7 | 12-06-10 01:31 PM |
| الحل النهائي لكل مشاكل النشان في كل البنادق الهوائية | Timo Jean | بنادق ضغط الهواء ومتعلقاتها | 31 | 12-03-23 07:23 PM |
| مسامير الطبة الطويلة | gamalatya | ادوات الصيد الثقيله | 25 | 12-01-24 04:25 PM |
| الحل النهائي لمشكلة غلاء أسعار بنادق الرش | tabeeb | الصيد العام | 23 | 11-11-02 10:55 PM |
العرض الشجري