للأسف ضاعت الأمانة بين الناس

[hanitarek]

الأخوة أعضاء المنتدى المحترمين,

أعتذر عن كتابة هذا الموضوع و لكن وجب التحذير حتى لا تتعرضوا لنفس الموقف:

كان فى زميل عارض إليكتريك طويل بسعر 600 جم و قال أنه عارضه و ما بيتاجرش فيه و مش عايز يستغل الظروف الحالية (شوف الأخلاق و الأمانة).

المهم اتصلت بيه و قابلت الأخ فى المهندسين و لقيت الصاعق شغال نور و سرينة بس , و لما سألته ليه الإليكتريك مش شغال قاللى أصله كان مركون و مش مشحون.
قمت قلتله طيب حاخده و أشحنه و أجرب بس لو ما اشتغلش حرجعه , قاللى طبعاَ لو فيه حاجة بتاعى.

طبعاَ ما اشتغلش و طبعاَ اتصالات و ماسجات مفيش فايدة و مبيردش أو تليفونه مقفول.

للأسف الأمانة ضاعت بين الناس ,ونصيحة للزملاء محدش ياخد حاجة من حد إلا إذا كانت سليمة 100% لأن ضمير الناس أصبح شبه معدوم. مع العلم إن مظهره و العربية اللى كان راكبها متدلش إنه حتى محتاج الفلوش عشان ينصب على الناس

آسف للإطالة لكن وجب التحذير وحسبى الله و نعم الوكيل فيه.

مع تحياتى.

رابط الموضوع الأصلى

http://www.egypthunt.net/showthread.php?t=6864

[mostafa_hunter122]

ربنه يعوض عليك اخى الكريم

[hokaboka]

انا اصلي بدن في مالطة...والله صوتي اتبح وانا يقول يا جماعة اللي يشتري حاجة لازم يجربها ويفتحها ويلعب فيها براحتة ويلقب...غير كده ميشتريش..

عموما ربنا يعوض عليك...وفداك مليون جنيه ..يمكن ربنا فداك بالخسارة دي مصيبة اكبر....واديك اتعلمت ان فيه ناس اشرار والحذر مطلوب..

[رمزى البيلى]

الله يعوض عليك

[welly210]

لن اقول الا لا حول ولا قوة الا بالله

[hanitarek]

و الله جربته و اتفقت معاه انه لو اتشحن و ما اشتغلش إنى أرجعه , و مخطرش فبالى من هيئته إنه مش حيراعى ربنا , على العموم الواحد مبيتعلمش ببلاش.

شكرا ليك و لكل الأعضاء على ردودهم.

مع تحياتى

[ibraheem]

معلشى بس سؤالى اية الى اقنعك تجيب واحد كبير والموضة انة بقى بحجم الموبايل او ولاعة السجاير

[sultan]

فى الاول ربنا يعوض عليك وعل فكره انا قبلت الراجل ده او حد غيره مش فاكر بس كان الصاعق برده مش شغال والى انه عايز يتشحن بصراحه انا قلقت لولتله اشحنه وكلمنى ومكلمنيش واتصلت بيه تانى مش بيرد عليا

[Eng Badran]

لا حول ولا قوة الا بالله
اخي الكريم انا مهندس اليكترونيات - ومستعد ابصلك عليه لو عايز وبدون مقابل
حضرتك تقدر تشرفني وهشوفلك الموضوع ده مفيش عندي مشكله بس انا من الزقازيق وان شاء الله سهل تصليحة
مهندس / احمد بدران
0172215456

[خالد ابو العلا]

حسبى الله ونعم الوكيل ... محدش بيتعلم ببلاش بس اهم حاجه ان اما حد يحصل معاه حاجه ينبه الاخرين زى حضرتك كده ...تحياتى لك وربنا يعوض عليك

[dr.ahmed shahin]

حاول تعرف ال ip اللى عمل بيه مشاركات على المنتدى هنا يمكن لعل وعسى كان بيدخل من بيتهم

[smsmn8888]

تا للاسف منتشر علي المنتداء الان يسجل الواحد منهم ويبع ويخلع فا ارجو تجربة القطعة كويس اوى او عدم الشراء من اي عضو يكون مسجل حديث وتا حفاظ علي فلوسكو

[AFROTTO]

أولا ربنا يعوض عليك
بس أنت التانى غلطان لآن دة اليكتريك ولية وظيفة واحدة وهو أحداث شرز عند الضغط على الزرار
يعنى لاكشاف ولا سرينة وهو التانى برضة عديم الضمير أنة يبعة بدون مايقول فية أية
مع العلم أى موضوع أنا بعرضة اللى بيجيلى بديلة الحاجة اللى طالبها بيحطها فى جيبة بقولة
لآ طلعها وشوفها وجربها مش يمكن ماتعجبكش

[osha966]

ربنا يعوض عليك ..بس الخطأ خطأك معلش ..

[mosho]

لا حول ولا قوة الا بالله

[max666666]

فداك الف الواحد المهم انك بخير بس من غير زعل انت رايح تشترى الكتريك شوك مش سرينة و كشاف فكان المفروض تتاكد انه شغال وبرضه متزعلش نفسك الحمد لله انها جات لحد كدة

[hosam ibrahem]

ربنا يعوض عليك

[Consul]

أخي الحبيب الأستاذ هاني طارق...الأخوة الأعزاء الأفاضل...بادئ ذي بدء أحب أن أنوه وألفت نظركم جميعا أنني ليس لي سابق معرفة بأخونا الغائب بائع هذا الصاعق الإليكتروني والمشكو في حقه والمتهم في ذمته وأمانته...وللأمانة وحتى لا أكون متسرعا في حكمي عليه وآثما في سوء ظني به ( إن بعض الظن إثم )...فقد قمت بمراجعة وقراءة كل مواضيعه ومشاركاته السابقة والتي كان آخرها بتاريخ أمس...بصراحة وبأمانة لم ألاحظ في مشاركاته أو مواضيعه مايفيد أو يوحي بأنه محترف التجارة أو دخل منتدانا بنية المتاجرة وبغرض التكسب والتربح ( المتاجرون معروفون لنا جميعا ويتعدوا على الأصابع...وهناك كثيرون دخلوا عرضوا وباعوا وغادروا دون مشاركة في أي مواضيع )...بل وجدت أنه مشارك وله حضور في مواضيع مختلفة كثيرة...وإكتشفت بأنه ليس دراية أو خبرة أو معرفة سابقة بأسلحة الصيد ومسدسات الصوت وبالذات حتى في الصواعق الإلكترونية وكثير من الأخوة الأعزاء صححوا له معلومات كان قد ذكرها بالخطأ وبدون معرفة ( وهو بنفسه ذكر ذلك صراحة )...كل ما أطلبه منكم أن تتريثوا ولا تتسرعوا في حكمكم عليه وأعطوه مجالا وفسحة من الوقت ليتمكن من الدخول وتوضيح ملابسات الموضوع...ولاحظت أن هناك من راسله وإتهمه بأنه ( أعتذر لهذا اللفظ ) معفن وحرامي و نصاب...كيف هذا بالله عليكم وماذا تنتظرون بعد أن تسرعتم وأصدرتم حكمكم بالإعدام على شخص دون أن تسمعوه...أنا لا إدافع عنه ولست موكلا منه للتحدث بلسانه ولكنني منتظر مثلكم رده وتوضيحه لكي أفهم منه...وكما ذكر أخونا الحبيب الأستاذ هاني طارق بأن مظهره وحتى إسلوبه لا يوحي بأنه حرامي أو نصاب ( 600 جنيه ليست بمغنم أو مطمع أو ثروة يسيل لها اللعاب ) ومن ذا الذي يعرض نفسه للقيل والقال ويلوث شرفه وسمعته طمعا في مثل هذا المبلغ...أنا أقدر طبعا وأتفهم جيدا ضيق وزعل أخي الحبيب الأستاذ هاني طارق وصدمته لتعرضه لهذا الموقف...ولكن نحن كمنصفين ومحايدين كان من واجبنا أن نتريث ولا نتسرع ونحاول أن نهدئ ونحد من روعة وصدمة أخونا الحبيب المشتري ونطمئنه وفي نفس الوقت نستفسر ونستوضح من الأخ العزيز البائع ( والذي نفترض فيه حسن النيه حتي يثبت العكس ) حق الدفاع والتوضيح والرد مكفول ومن منطلق إننا حريصون على الإثنن ( المشتري والبائع )...وكما سمعنا من المشتري وأنصتنا له وتعاطفنا معه...كان من الواجب أن نعطي نفس الحق للبائع ونستمع له لكي يوضح لنا الملابسات...ودعوني أقولها لكم بصراحة ومن منطلق حرصي على مصلحة المشتري والمتواجد معنا وحتى لا يضيع حقه...لا بد أن أتحلي بالصبر والحكمة ولا أتسرع في حكمي على البائع وأغلق الباب في وجهه وأعتبر الموضوع منتهي...وأعطيه فرصه للتوضيح أو التصليح أو إعادة الحق للمشتري وترضيته...المفترض أننا محايدون وغرضنا الصالح العام...وسواء المشتري أو البائع فهم أخوتنا في أسرتنا الحبيبة...أسرة المنتدى...ونأمل وفي إنتظار رد وتوضيح أخونا العزيز الأستاذ البرنس777...وأنا واثق إن شاء الله من رده للتوضيح وترضية أخونا الحبيب الأستاذ هاني طارق...وربنا يخلف الظنون...إضافة أخيرة أحبائي...هذا لايمنع أن نكون حريصين في تعاملاتنا ونتعلم ونتعظ من أخطاء غيرنا...خالص تحياتي...

[بدر]

الاخ الفاضل
الاخوة الاعزاء
اولا ربنا يعوضك عنة خير
اسمحلى انا تعرضت لموقف مشابة واتنصب عليا فى مسدس صوت شوف اللى بتقولة علية خبير مسدسات اضحك علية لانى توسمت الامانة والمصداقية فى البائع وطبعا راكب سيارة فارهة يعنى الموضوع مش موضوع عربية دى ناس سقط من قاموسها الامانة
حسبى الله ونعم الوكيل فى كل واحد يستحل الحرام
وانا لا اتكلم عن ما حدث معك ولكن بصفة عامة نصيحة لكل الاعضاء ذى ما المثل البلدى بيقول حرص من اخوك ومتخونوش يعنى جرب حاجتك قبل الشراء دة لو واخدها من شخص اما من محل ففية مرجعية
والاخ صاحب الموضوع فداك الفلوس ومعلش محدش بيتعلم ببلاش
وربنا لا يبارك فى الحرام
تحياتى

[AFROTTO]

المشاركة الأصلية كتبت بواسطة بدر

الاخ الفاضل
الاخوة الاعزاء
اولا ربنا يعوضك عنة خير
اسمحلى انا تعرضت لموقف مشابة واتنصب عليا فى مسدس صوت شوف اللى بتقولة علية خبير مسدسات اضحك علية لانى توسمت الامانة والمصداقية فى البائع وطبعا راكب سيارة فارهة يعنى الموضوع مش موضوع عربية دى ناس سقط من قاموسها الامانة
حسبى الله ونعم الوكيل فى كل واحد يستحل الحرام
وانا لا اتكلم عن ما حدث معك ولكن بصفة عامة نصيحة لكل الاعضاء ذى ما المثل البلدى بيقول حرص من اخوك ومتخونوش يعنى جرب حاجتك قبل الشراء دة لو واخدها من شخص اما من محل ففية مرجعية
والاخ صاحب الموضوع فداك الفلوس ومعلش محدش بيتعلم ببلاش
وربنا لا يبارك فى الحرام
تحياتى

كلام جميل أستاذ بدر

[pooforever_2010]

الاخ العزيز /أ هانى طارق
بجد انا زعلان جدا
حضرتك راجل محترم جدا جدا جدا لابعد الحدود وانا اتشرفت بمعرفتك
لو مش فاكر انا محمد اللى قابلتك عند الغلبان اللى فالمظلات بالالكتريك الصغير
ولو حضرتك وافقت انا سالت وعارف حد ممكن يبصلك على الالكتريك اللى معاك ويصينه وانا تحت امرك
بس ابعتلى على الخاص
ومتزعلش يا باشا ان شاء الله خير
اخوك الصغير / محمد

[سيدخالد]

ربنا يعوض عليك وعلى فكرة حضرتك غلطان لانى انت ملقتهوش شغاال رجعوه ومتخدهوش لانى النصب كتير اوى الايام ديت؟؟؟؟

[tarekvb]

المشاركة الأصلية كتبت بواسطة بدر

الاخ الفاضل
الاخوة الاعزاء
اولا ربنا يعوضك عنة خير
اسمحلى انا تعرضت لموقف مشابة واتنصب عليا فى مسدس صوت شوف اللى بتقولة علية خبير مسدسات اضحك علية لانى توسمت الامانة والمصداقية فى البائع وطبعا راكب سيارة فارهة يعنى الموضوع مش موضوع عربية دى ناس سقط من قاموسها الامانة
حسبى الله ونعم الوكيل فى كل واحد يستحل الحرام
وانا لا اتكلم عن ما حدث معك ولكن بصفة عامة نصيحة لكل الاعضاء ذى ما المثل البلدى بيقول حرص من اخوك ومتخونوش يعنى جرب حاجتك قبل الشراء دة لو واخدها من شخص اما من محل ففية مرجعية
والاخ صاحب الموضوع فداك الفلوس ومعلش محدش بيتعلم ببلاش
وربنا لا يبارك فى الحرام
تحياتى

انت ايه حكايتك يا عم مرة ملثمين مرة نصب بس مش هسيبك لازم اعرف موضوع النصب ده بس على جنب وانت فاهمنى ههههههههه

[الراعى]

السلام عليكم
موقف لزم تقراه بخصوص هدا الصاعق
انا جديد معاكم فى المنتدا وعجبنى اسلوب الاعضاء فى قسم سوق المنتدا وحسيت انهم امناء مع بعض ومفيش حد بيبخل بالنصيحه
وكمان عجبنى اكتر ادارة المنتدا لانهم مش بيتدخلوا ى كل صغيره زى منتديات كتير
انا كتبت دلواتى لانى اتشرفت بالكلام مع صاحب الالكترتك هقولك الحوار اللى دار ووالله انا مش بدافع عنه بس انا بقول الكلام ده علشانن اكون مش حجبت حقيقه

انا اتصلت بصاحب الصاعق فى نفس اليوم اللى حضرتك كلمته فيه وكلمته تحديدا بعد مكالمتك ب 10 دقائق
وهو رد عليا بكل احترام
وطلبت اشترى الصاعق اللى معاك دلواتى كان رده عليا ( انا اسف انا لسه مدى كلمة لواحد ومش هقدر اقولك اوك بس هو لو مش جالى انهارده اعتبره بتاعك)
بصراحه حاولت اقنعه ان الفيصل فى البيع هو التقابل واتمام البيع
وكان رده بردو
( انا مش محتاج ابيعه وانا قولتلك لو مش اتباع اعتبره بتاعك )
شكرته وقولتله اسمحلى اكلمك بالليل على 10 بالليل واتمنى يكون من نصيبى قالى اوكى
وبالفعل كلمته كنت حضرتك اخدته ورده كان
(انا اسف هبلغك خبر مش هيكون كويس الجهاز اتباع)
شكرته وقفلت وقولتله اتمنى يكون تعامل بينا لانى بصراحه حسيت من اسلوبه انه شخصيه جاده ومحترم
وبيلتزم بكلمته


بعديها بكم يوم بعتله على المنتدا كنت عاوز استفسر عن جهاز صاعق وبصراحه الراجل رد عليا


اقسم بالله انا مش اعرف الراجل صاحب الموضوع ولا الراجل اللى باع الصاعق وانا قولت الموقف اللى حصل معايا
واتمنى يكون الجهاز شغال بس يكون معلق او فى حاجه مقفوله زى الامان
وان شاء الله نباركلك اول ما يشتغل

[alaa@virus]

منتظرين رد الطرف الاخر
وياريت فعلا منظلمش حد ولا حد يظلمنا لازم نحاول نصلح من نفسنا ونبتعد عن الكذب والغش وعدم الامانة

[hanitarek]

أشكر جميع الأخوة الأعضاء على ردودهم و أخص بالشكر سيادة القنصل و أستاذ بدر و أخويا محمد و أرجو من الأستاذ اللى باعلى الصاعق اللى مش شغال توضيح موقفه أو الإتصال لإرجاعه و أنا مستعد للإعتذار له أمام جميع الأعضاء فى حالة إذا كان هناك مانع شغله عن الرد على إتصالاتى به طوال الأسبوع اللى فات غير رسائلى اللى بعتهاله.

مع تحياتى للجميع

[Consul]

المشاركة الأصلية كتبت بواسطة hanitarek

أشكر جميع الأخوة الأعضاء على ردودهم و أخص بالشكر سيادة القنصل و أستاذ بدر و أخويا محمد و أرجو من الأستاذ اللى باعلى الصاعق اللى مش شغال توضيح موقفه أو الإتصال لإرجاعه و أنا مستعد للإعتذار له أمام جميع الأعضاء فى حالة إذا كان هناك مانع شغله عن الرد على إتصالاتى به طوال الأسبوع اللى فات غير رسائلى اللى بعتهاله.

مع تحياتى للجميع

بارك الله فيك أخي الحبيب...عداك العيب ولا يستطيع أحد أن يلومك...وإن شاء الله ربنا يخلف الظنون والحق يظهر ويبان ويعود لأصحابه والجميع يكون متراضي...وعموما أنا راسلته على الخاص ومنتظرين رده وتوضيحه...خالص تحياتي...

[dr.ahmed shahin]

ده حرامى اخى الفاضل بدليل انه بيدخل على المنتدى وقرى الكلام اللى انت كتبته عنه كمان ومردش

[engneer56]

ممكن اساعد حضرتك لان عندي صيانه اليكتريك انشاء الله نصلحه و طلع بقل خساره ابعتلي بس علي الاميل او رقمك علي الخاص وانا اكلم حضرتك

[pooforever_2010]

المشاركة الأصلية كتبت بواسطة hanitarek

أشكر جميع الأخوة الأعضاء على ردودهم و أخص بالشكر سيادة القنصل و أستاذ بدر و أخويا محمد و أرجو من الأستاذ اللى باعلى الصاعق اللى مش شغال توضيح موقفه أو الإتصال لإرجاعه و أنا مستعد للإعتذار له أمام جميع الأعضاء فى حالة إذا كان هناك مانع شغله عن الرد على إتصالاتى به طوال الأسبوع اللى فات غير رسائلى اللى بعتهاله.

مع تحياتى للجميع

الاخ الاكبر ا / هانى
ياباشا انا تحت امرك ومش كلام والله
حضرتك بس تامر وتيجى تنورنى وتشرفنى فشبرا
يا باشا وان شاء الله المشكله تتحل بعون الله
وانا برضه تحت امرك فاى وقت يا باشا

[hanitarek]

ربنا يخليك يا محمد و متشكر على إهتمامك و ألف شكر للمهندس أحمد بدران , و هو حاليا عند المهندس محمد (Engineer56 ) بيحاول معاه .

ألف شكر مرة تانية لإهتمامكم و مساعدتكم.

[محمد أشرف]

ربنا يعوض عليك

وممكن تلاقى حد يصلحه