طريقة تجهيز السردين و حفظة

[kefafy]

السلام عليكم ورحمه الله وبركاته
فى اوقات كتيير من السنة بنبقا محتاجين فيه السردين البلدى ومبنلائيهوش , ونظرا ان السردين زفرته عاليه جدا و من اهم طعوم البحر الاحمر
بس من عيوبة انه ديما طرى زيادة عن اللازم يعنى لو السمكة داقتة (استطعمتة ) هتلاقية وقع من على السن , مبيستحملش خالص
هنحاول بردو نشرح ازاى ندى القوام المتماسك للسردينة

1- نجيب مصفى كبيرة وتحط تحتها صينية على قد المصفى
2- وبعد كدة تفرش طبقة ملح مجروش على الصينية
3- وترصص على طبقة الملح طبقة من السردين
4- ثم طبقة ملح ثانية
5- ثم طبقة سردين وهكذ
6- حتى امتلاء المصفى بالسردين
7- وتتركها فى الشمس
8- وبعد اول يوم تفضى المياه الى نزلت من المصفى واستقرت فى الصينية
9- ثم نعيد ترتيب صوف السردين بالطريقة العكسية ( يعنى السردين الى كان فوق خالص نضعة اسفل طبقة فى المصفى ) وذلك كى نضمن ان كل قطعة سردين اخدت وقتها ودورها بين الملح و الهواءحقها من الملح و الهواء
9- واليوم الثانى ايضا تفضى الصينية من المياه ثم تعيد ترتيب طبقات السردين مثل المرة السابقة
10- و تلم فى صباح اليوم الثالث السردين بتاعك
11- وبعد كدة كل 10 او 15 سردينة تلفهم فى ورق جرايد او كراسة وتقفل عليهم الورقة باحكام
12- وبعد كدة تحط كل لفافات الاوراق المحشوة سردين فى الفريزر داخل كيس ورقى كبير مغلق
وفى كل طلعة صيد تاخد معاك العدد الى يكفيك من لفافات السردين علما ان كل لفه فيها 10 او 15 سردينة
كدة هنستفاد ايه ؟
1- السردين هيكون صفى كل الميه الى فيه مع الاحتفاظ الكامل بالرائحة الزفرة بتاعته
2- مجرد السردينة مهتنزل الميه هتلاقيها شربت ميه البحر وبقت احسن وافضل من الطازة وممكن تنزلها الميه وتصطاد بيها و السردينة تلاقيها زى مهية
3- لو سمكة دخلت على السردينة وشدت حته هتلاقيه متقعش من على السن وتتلافى ضرر وقوع السردينة من على السن
4- ممكن تخزن السردين فى فترات السنة الى بيبقا شاحح فيها سردين وده مهم جدا جدا فى الشهور الاخيرة و بداية السنة والشهور الاولى من السنة
الموضوع مش مجهد خالص وبينفع قوى فى الكميات اكتر من 3 كيلو
وبتنساهم فى الفريزر وطلع على قد الطلعة واستخدامك انت
ولو اتبقى حاجة من الطلعة ممكن تحطهم تانى فى ورق وتخزنهم بردو , بس متكررهاش اكتر من مرتين اثنين انك ترجع السردين تانى الفريزر بعد الطلعة
ارجو ان يكون الموضوع وصل
ولكل اخوتى الف شكر
والسلام عليكم ورحمه الله وبركاته

[sameer]

مشكور يا باشا جزاك الله كل خير

[التلميذ]

تسلم على المعلومات القيمة

[kefafy]

ولكم منى اخوتى الف شكر واهلا بيكم دائما وتحت امركم فى اى استفسار

[egyptusman]

بارك الله فيك .... شكرا على هذه الطريقة .. صيدا موفقا وبالهنا والشفا للجميع

[بسام سعيد]

مشكور اخي العزيز وبارك الله فيك