الصيد فى مصر - الصيد رزق لك ولطرائدك ... مواقف

الصيد فى مصر (http://www.egyhunt.net/index.php)

- الصيد العام (http://www.egyhunt.net/forumdisplay.php?f=1)

- - الصيد رزق لك ولطرائدك ... مواقف (http://www.egyhunt.net/showthread.php?t=13718)

الصيد رزق لك ولطرائدك ... مواقف

السلام عليكم
ملحوظة : انا ذاكرتي ضعيفه جداااااااا
صحيت انهارده من النوم " قبل الفطار يمكن ب 3 دقايق "
وافتكرت ان ليا مسدس بيتنكل في الورشة
فأفتكرت ايام زمان كان ليا بندقية رش معدلة لضرب ال 22 وكانت كلها نيكل ودبشك اسود
اه كانت جميلة اوي " كنت انا اللي عاملها "
المهم البندقية دي طلعت بيها طلعة واحدة بس .... بس ليها موقف غريب اوي معايا
انا عادة كل سنة في اوائل الصيف بطلع صيد جبلي في سيناء
وذلك لندرة الصيد وعدم وجود هجرة طيور في الايام دي
والصيد في سيناء بنحتاجله خرطوش وبنصطاد في العادة الارانب الجبلية وبعض الطيور مثل القطا والشنار والحجل
المهم في السنة اللي عملت فيها البندقية " يمكن من 5 سنين " كان فيه قلق شديد على موضوع الصيد وعلى المعدية بتاعة سيناء
فمعظم رفاقنا والصيادين رفضوا يطلعوا ببنادقهم وانا مكنش معايا خرطوش
المهم قلت هنطلع يعني هنطلع ان شاء الله حتى لو رحنا نصطاد عقارب وتعابين
احنا هناخد البندقية المعدلة دي معانا

هووب خدنا بعضنا وكنفت البندقية واخدت معايا البندقية الرش الجامو

وصلنا وخيمنا عند البدوي صاحبنا وبعد صلاة العشاء قلنا نطلع ناخد لفة على الارانب
طبعا الارانب بنمشيلها مالا يقل عن 20 ل 50 كيلو حتى نوصل الوديان والجبال الموجوده فيها

سبحان الله في اليوم ده يدوب خارجين من الخيمة وركبنا العربية ومشينا تقريبا 150 متر
وابص الاقي العين الحمرا بتلمع من بعيد.............
هووووووووووووووووب
الكشاف يا ولاد ال....
" الكشاف ده عبارة عن كشاف قدرته مليون وات بيركب على ولاعة العربية لكشف المسافت البعيدة"
هوب كشف الاقي ارنب على مدد النظر
هنعمل ايه دلوقتي؟؟
هاتو البندقية الموريس " الرش المعدلة الى رصاص "
كسرت وعمرت الا وصاحبي بيضرب الكشاف جنبي وبيمسكني بشدة من ايدي وبيقولي الحق
ابص جنبي الاقي كومة تراب على بعد 5 متر او اقل ارتفاعها متر ونص تقريبا وعليها ارنبة ما شاء الله تخشلها في 2 كيلو ونص 3 كيلو وقاعدة مكنزة
رحت مادد البندقية فيها واسفخ... زووووووووووو
جت فوق راسها بربع سنتي
طبعا من المفترض في هذه اللحظة ان الارنبة تطيييييييييييييير وتنجو بحياتها
لكن والله ماتحركت من مكانها سنتي واحد
كل اللي عملته انها قنفدت اكتر ولزقت ودانها في جسمها.. !!!!!!!!
عمر تاني عمر البارودة
نشن... هوب ... اسفخ
جت تحتها بربع ملي ...
والموريس " الرصاص بيعمل انفجارات في التراب ودي لا تتحرك نهائيا
انا اتهبلت اكتر
عمر تاني وبمد البارودة والا البدوي بيمسك مني البارودة وبيقولي حد الله ما تضرب
هالارنب عشار ما تطخها وهذي ارادة الله في انها ماتنصاب وهي الحين شارفت على الوضع فما هي قادرة تتحرك

في هذا اليوم شوفنا مالا يقل عن 7 ارانب وجميعهم في نطاق مخيمنا وهو مكان لم نعهد ان نرى فيه طرائد من قبل والارانب خاصة كان لازم نمشيلها بلاد بعيدة عن مكان تخييمنا

وبمناسبة العشار وصغار الطيور والحيوانات
اذكر موقف اخر
كنا في رحلة صيد قميري جبلي
وطبعا بنصطاد الكروان الجبلي معاه
لقينا جوز كروان عن طرفة " شجرة جبلية صغيرة "
هوب .... طااااااااااااخ بالخرطوش
يقع احدى الكراونين صريعا ولا يحرك الاخر ساكنا
واكثر من 5 خراطيش متتالين في زوجه ولا يتحرك من مكانه كما لو هناك درع خفي يحجبه عن بلي الخرطوش
والا رفيقي راح يشوف في ايه لا بينصاد ولا بيطير هذا شيء يهبل
وانا قاعد في العربية ورفيقي راح هناك لقيته وطى وجاب الكروان اللي مات ولمحت الكروان التاني بيجري ويلف حولين الشجرة " بيستخبى من صاحبي "
الا وصاحبي جاي وعينا مدمعه
ويقولي سبحان الله
محمد انا شفت حاجة عمري ما هنساها
قلتله انت اتهبلت ياض انت مطختش التاني ليه وانت بينك وبينه متر ؟؟؟!!!
قالي محمد احنا ضربنا فيه 6 خراطيش ومحصلوش حاجة عارف ليه ؟
قلتله ليه؟؟
قالي هناك زوج فراخ " عياله " في عشه تحت الطرفة
ولم يكلم احدنا الاخر لمدة 10 دقائق في صمت
سبحان الله... سبحان الله
هه
بدون دخول في دراما
الرزق بيجيلك لحد رجليك

ريح نفسك واسعى ولا تستعجب لماذا لا يرزقك الله في بعض الاحيان...
لأن قلة الرزق لك في بعض الاحيان رزق ونعمة لأخرين...
فعندما تنشن على طريدة وانت متأكد انها هتيجي وتضرب ومتجيش فتأكد ان الله يحبك...
لأن هناك خلف الكواليس ما هو اقوى وافضل من انك تأكلها...

اسف طولت عليكوا
بس بجد حبيت اشارككم اللي عندي
السلام عليكم