[محمد خلف]

المشاركة الأصلية كتبت بواسطة adel152

استاذ محمد بعد التحية.
أن شاء الله هتلاقى كل المطلوب لبندقية حضرتك هو تغيير جلبة البستم لأن هذه البنادق فيها جلبة جلد زفرة ومع مرور الوقت والركنة بتتفرفت وتتقطع.
شوف ياسيدى اولا انت هتحتاج حد معاك علشان يساعدك فى الضغط على البندقية اثناء حل البنز اللى ماسك القاعدة اللى فى نهاية الكانون لأن عليها ضغط من السوستة.
اول حاجة هتفك 3 مسامير ماسكين الدبشك الخشب بالكانون الحديد 2 منهم فى مقدمة الدبشك وانا عاملك سهم احمر على المسمار (ويوجد مسمار أخر فى الناحية الاخرى) فى الصورة بتاعة بندقيك هتحتاج مفك عادة كبير والمسمار الثالث عند مجموعة الزناد.
بعد حل المسامير الثلاثة هتلاقى الدبشك طلع لوحده بعيد عن الكانون.
نيجى بقى للحته اللى هتحتاج فيها مساعد.
أقلب البندقية وضعها بشكل رأسى على ترابيزة وتكون ماسورة البندقية موجهة ناحيى السقف والغطاء اللى موجود فى نهاية البندقية على الترابيزة.
خاللى المساعد بتاعك يضغط على الغطاء نحو الترابيزة وانت بمفك صليبة هتزق على البنز لأخراجه من مكانه (أنا عاملك سهم احمر على البنز فى الصورة بتاعة بندقيتك).
اول ما البنز يخرج من مكانه خاللى المساعد بتاعك يرفع الضغط من على البندقية بهدؤ لأن السوستة ضغطه على القاعدة. بعد رفع البندقية بهدؤ حوالى 2 سم كده انت شيلت الضغط بتاع السوستة هتلاقى السوستة طلعت من مكانها وخلف السوستة موجود البستم وفيه الجلبة.
على فكرة لو لم يتم تعديل بندقيتك بأى شكل من الاشكال هيكون فيها سوستيتين واحدة منهم الداخلية تعمل كدليل للسوستة الاولى.
انا وضعت لحضرتك شكل البندقية وهى مفكوكة والاجزاء الخاصة بها.
خد البستم عند أى محل بتاع بنادق وخليه يركبلك جلبة جديدة.
التركيب عكس الحل تمام مع مراعاة أثناء دخول البستم يتم تحريك لسان الزناد بمفك عادة صغير الى أسفل حتى تستطيع دخول البستم.
لو حضرتك حاسس انك مش هتعرف تعمل هذه الخطوات أنصحك بأخذ البندقية كلها لمحل بنادق وهو يغيرلك الجلبة وانت واقف على ايده الموضوع كله مش هياخد اكثر من نصف ساعو الى 45 دقيقة.
بالتوفيق وتحياتى.

الف شكر ليك يا استاذ عادل
هعمل الي قلت عليه باذن الله و ربنا يسهلها
الف شكر ليك كمان مره