البلد بقت فوضى من غير صاحب

[mman2005]

أنا بصراحة مش عارف أقول أيه، أنا لسة راجع من شوية من سفر، جه لوالدى إتصال النهاردة الساعة 5 فيه حالة وفاة فى البلد، المهم الوالد قال هيسافر بعد الفطار لأن الدفنه بعد صلاة العشاء فى بلدنا الغربية مركز زفتى، المهم لبسنا هدومنا علشان بعد الفطار مباشرة نروح نلحق الدفنه فى البلد، ركبت العربية مع الوالد والوالدة وكان عمى مستنينا عل الدائرى يروح معانا، المهم أول حاجة قابلتنا الطريق معظمه مقطوع بالدبش إلى بقى جبال والعربيات الى ماشية عكس الطريق قلنا مش مشكلة.

طلعنا على طريق الإسكندرية الزراعى بعد ما أخدنا عمى، ومشينا، طبعا معظم الطرق السريعة بدون إنارة وكل واحد منور كشاف العربية، المهم بقى أن لاقينا عربيات وموتوسيكلات ماشية عكس على الطريق السريع الإسكندرية الزراعى، تخيل بقى وأنت ماشى بسرعتك مش مدى خوانة وتلاقى حمار ماشى عكسى ومديك نور فى وشك ومش عاجبه كمان، المهم بقينا ماشيين بالراحة لغاية ما دخلنا الطريق الفرعى الى مودى عل البلد أسمه ميت برة لو حد يعرفه.


طبعا الطريق ده ضيق وأتجاهين ومفيش فاصل بين الطريقين، يا جماعة بين كل مطب ومطب مطب وكل مطب ناخده العربية تتحك من تحت وفيه مطبات أكلناها وإحنا مش شايفنها والعربية بسرعتها لدرجة أن راسنا كانت بتخبط ف سقف العربية، المهم عرفنا أن فيه 64 مطب معمولين على الطريق فى البلد قالولنا كده، وصلنا البلد بعد ما أخدنا ال 64 مطب فى الضلمة والعربيات مدية نور فى وشنا وجمبنا ترعة أقل إنحراف هنبقى فى الترعة، المهم وصلنا البلد الساعة 9.30 كانوا دفنه ورحنا عزينا ومشينا على الساعة 11.30 بالليل، المهم قلنا بقى نغير الطريق الى فيه 64 مطب دول ونروح من طريق ميت غمر أطول بس واسع ومفهوش مطبات كثير، لاقينا برده العربيات ماشية عكس الإتجاه فى الطريق السريع لدرجة أننا كنا هنلبس فى كذا عربية ده غير عربيات النقل الكبيرة الى السواقين ماشيين مساطيل وبيتحدفوا يمين وشمال، وطول الطريق رايح جاى مشفناش عسكرى ولا أمين شرطة ولا ظابط يوحد ربنا.

تحس أنك ماشى فى بلاد ملهاش صاحب، المهم عدينا بنها وطوخ وعند بلد تقريبا أسمها سنديون على الساعة 12.30 بالليل لاقينا الطريق واقف وبيتحرك بالعافية قلت أخيراً هشوف لجنة فى الطريق نصف ساعة كاملة الطريق بيتحرك بالعافية لغاية الساعة واحدة، قلت فى نفس دى مش لجنة ربنا يستر ليكون الطريق مقطوع بالبلطجية، وإحنا الحمد لله لا معانا مطوة ولا صاعق ولا مسدس صوت ولا أمريكان ولا حتة عصاية أستيك.

والمصيبة بقى الكبرى لاقيت شباب صيع لابسين فلنات بحملات بيوقفه العربيات ووقفه عربية جيب جمبنا لأن العربيات كانت ماشية تاتا تاتا ، ولاقيت الواد بيقول للواد أبو حملات ولعه فى العربيات، قلت يا نهار فل، الطريق فعلاً مقطوع من البلطجية وكل ما نمشى شوية نلاقى شباب أكثر والى ماسك سنجة والى مساك شومة، طبعا العبد لله ملقاش غير ربنا يلتجأله وقعدت أدعى باللى جه على لسانى لغاية ما وصلنا عند البلد ال أسمها سنديون ونبص نلاقى أمة لا إله إلا الله كل البلد طالعه قاطعة الطريق وكل واحد ماسك أى حاجة فى ايديه.

قلت بس هودعكم الليلة دى، المهم يظهر أن دعايا ربنا أستجابه وحنن قلبهم علينا فتحولنا الطريق وعدينا من الجيش ده، والحمد لله بعد ما عدينا لاقينا الإنقاذ جاى، أمين شرطة سايق موتسيكل وماشى عكس الطريق ورايح للناس الى قاطعة الطريق قلت عمار يا مصر، هكذا تكون الشرطة، ده رايح يهبب ايه ومستعجل أوى وماشى عكس الطريق خليه يروح لقضاه.

لغاية ما وصلت البيت فوضى فى كل مصر وعربيات ماشية فى عكس الطريق وزبالة قاطعة الطريق وتراب سمكه 3 أشبار لدرجة أن العربية كانت هتغرس، وما صدقت وصلت البيت وأنا حى قلت أحكيلكم عل تجربتى المريرة.

عن مصرنا الحبيبة وما آل إليه الوضع الذى كان سئ فى زمن المخلوع وتحول إلى أسوأ الآن، لكى الله يا مصر، ولا حول ولا قوة إلا بالله العلى العظيم.