مــبــادرة يــلا نــركــب عــجــل تــانــي ( ارجو من الجميع الدخول و ابداء الرأي )

[medo_hunt2012]

المشاركة الأصلية كتبت بواسطة axel

بسم الله الرحمن الرحيم
السلام عليكم و رحمة الله و بركاته




الموضوع دايما يخطر في بالي لما بشوف فيه ازمة في البنزين مثلا
او الناس اللي بتركب العربية عشان يروحوا الشارع اللي وراهم
او مثلا رايح المسجد لازم يركب و يدور و يسخن و يروح و يرجع طب ايه لازمتها ؟؟؟ مش عارف , الناس دول مش هيحسوا غير لما يكونوا مش قادرين يحطوا بنزين هيقولوا كنا بنهدر في البنزين في الهوا زي ما بنعمل للأسف في المية دلوقتي

فدايما بفكر في القصة ديه فجت في دماغي الفكرة اننا نرجع العجل تاني و نستخدمه زي الصين و اليابان و الهند
يعني مثلا اليابان ع كل التقدم ده و العربيات اللي منحلمش نشوف نصها هنا لكن بيستخدموا العجل و خاصة عشان يروحوا المدارس
و ممكن تلاقي واحد لابس بدلة و راكب عجلة رايح شغله يا حلاوة يا ولاد

فايه اللي يحصل لو نعمل زي مبادرة لركوب العجل تاني

يعني مثلا ان نازل اخر الشارع اشتري حاجة بدل العربية اركب العجلة و اروح بيها
او رايح مشوار قريب و الدنيا عارف انها هتبقي زحمة خلاص اخد العجلة و انزل
لو حصلت ازمة بنزين العجل هيكون البديل و تروح اي حتة ...الخ...الخ

و الموضوع مش للاطفال و الشباب بس لأ و الرجال كمان
ده بالعكس المفروض الرجال اللي هم اربعينات و طالع هم اللي يركبوا العجل عشان تبقي رياضة ليهم و يفضل عندهم نشاط و ميبقوش كسلانين

طبعا هيجي واحد و يقولي طب هنستفاد ايه من القصة ديه
هقول اللي هنستفاده كالآتي :
1- توفيرا للبنزين سواء للفلوس او لو مثلا حصلت ازمة في وجوده و التوفير للطرفين لينا و للبلد
2- التكدس المروري اللي بنشوفه هيقل في بعض المناطق و هنبتدي نلاقي مناطق زي الاسواق قلت العربيات فيها و التسوق فيها يبقي افضل و مش بعيد نلاقي العربيات الراكنة اكتر من اللي ماشية في بعض المناطق
3- طبعا رياضة مفيدة و تنشط الجسم
4- اهو الواحد يرجع يفتكر ايام زمان لما كان لسه صغير ههههه
و نغني اغنية
زمان و انا صغير كنت بحلم ابقي كبيير ابقي كبيير
و لما كبرت تعبت من الشغل و المواويل هههههه

بس هنبقي محتاجين حاجتين بقي اولهما
اننا فعلا ننفذ الموضوع مش ندخل نقول اه و ماشي و هجيب و اول ما يخرج يكبر دماغه
كعادتنا التنفيض اللي مودينا في داهية في اي حاجة جدية لازم تكون حاجة هايفة عشان نتصدر فيها

ثانيهما :
اتمني ان الحكومة تساعد معانا في حالة ان الناس ابتدت تتجه لتطبيق الفكرة
و هو ان يتعمل زي جراجات خاصة للعجل في المدراس و الجامعات اللي هي زي بتاعت موتسيكلات الدليفيري اللي بتحطها كنتاكي للديليفري عشان بدل العربيات بتاعت اهاليهم و التوصيل او المشي او المواصلات يبقي بالعجل عالطول و خاصة لو قريب و منها رياضة الطالب يبقي رايح نشيط او مثلا طالب جامعي معهوش عربية او موتسيكل او هيصرف كتيير ع المواصلات يركب العجلة و عالطول يبقي هناك و يركنها جوة الجامعة
و يبقي جراجات برده للعجل في الشوارع زي برة و يكون واحد متعين من الحكومة يبقي زي حارس عليهم منها حراسة و منها توفير فرص للعمل و يبقي كل واحد راكن بسلسلته و بكارت للعجلة بتاعته بس من غير رسوم لأنها اساسا للتوفير
يبقي زي الكارت اللي بناخده لما ندخل سوبر ماركت و ندي الشنطة للامانات

و اخيراهي حاجة بعيدة بس هقولها و هي بعد ما الشوارع تتظبط و ديه محتاجة وقت شوية بس خلي عندنا امل ان يتعمل حارات في بعض المناطق للعجل هو احتمال الي حدا ما بعيد بس اهو خلي عندنا امل

و بالنسبة العجل
العجل عامة مش غالي يعني العجلة الجديدة كلها بكام 200-600 جنيه ع حسب النوعية او المقاس و احنا بنضيع فلوس زي ديه و اكتر في حاجات هايفة اساسا فنستخدمها في حاجات مفيدة زي كده

و طبعا محدش ينسي السيفتي و هو كالآتي :
-حامي كوع و ركب
-و خوذة راكبي الدراجات
-و ممكن لو عايزين جوانتي او نضارة واقية
-و برده في سفتي زي بتاع الموتسيكلات بيتلبس تحت اللبس بيكون زي اير باج بحيث لو وقعت يحميك
و كلهم انواع وا شكال و اسعار بسيطة
بس كده
و لو عايزين بليل انوار بقي تشتري دينامو و تركبه بيولد كهربا لما بتمشي بينور اللمبات
و سرينة و ظبط نفسك

و الموضوع بجد مش هزار
و انا عن نفسي هبتدي كأول واحد يطبق الفكرة و اجيب عجلة تاني و استخدمها بدل العربية في اوقات كتيير

طبعا اكيد فيه ناس هتدخل تضحك و تقول ايه اللي بيقوله الشخصية ده
بس يا ريت نبصلها من الناحية الايجابية بلاش عدم المبالاة اللي احنا فيها اللي مضيعانا ديه


و ارجو ان كل واحد يدخل يشارك برأيه موافق و لا لأ و ايه اسباب موافقته او اعتراضه
كام كلمة يعني مش هياخدوا من وقتك كتيير ولا البخل هيظهر بقي ههههههه

و رجاء لو فعلا اللي موافقي ينفذ فعلا و يفهم كل اللي يعرفهما الكلام ده و يخلي اولاده يعلموا كده و يقولوا لاصحابهم كده و هكذا لحد ام تنتشر
لازم نبتدي بنفسنا عشان الباقي يتغير
و لا الكلام ده مش بنقوله غير في حالات حالات

اظن محدش عنده حجة

في انتظار ردكم و فكروا من الناحية الايجابية للموضوع

و ديه الصفحة الرسمية للمبادرة في انتظار انضمامكم جميعا
111
111
111111
1111
11
مبادرة يلا نركب عجل تاني

والله الراجل ده بيتكلم كلام ذى الفل وعلى فكره فى الارياف يعتبر 90%من الناس عندهم عجل بيقضوا بيه المشاوري القريبه