وأخيراً بقيت صياد

[mman2005]

بعد حوالى 7 شهور من الإنضمام للمنتدى أصبحت أمتلك بندقية صيد اشتريتها من الأستاذ الفاضل/ هشام سيد فى المنتدى.

بجد إحساس جميل إمتلاك بندقية صيد، ورغم أنى قبل إمتلاك بندقية كنت أتشوق لذلك، إلا أنى بعد إمتلاك بندقية صيد الظاهر أنى سوف أصبح مدمن لهذه الهواية وكل ما يتجمع معى مبلغ من المال أروح أشترى بندقية جديدة.

كعادتى كل يوم أتصفح سوق المنتدى لعلى أجد بندقية مناسبة لإمكنياتى وأنا فى العمل قرأت موضوع الإعلان، ورغم أنى أنوى شراء سيارة مستعملة وأدخر كل جنيه لذلك، إلا أنى بمجرد ما قرأت الإعلان وشاهدت صور البندقية أعجبتنى جداً ووجدت أن سعرها مناسب وهو مبلغ 450 جنيه.

قررت أن أتصل بأستاذ هشام وأفادنى أن هناك من سبقنى وإذا لم يحضر سوف تكون البندقية من نصيبى المهم أتصل بى وقال أن الشخص الذى أتصل به لم يحضر وخرجت من عملى عليه مباشرة، ووصلت إله بيته وأستقبلنى الرجل استقبال حار وبعد كرم الضيافة عرض على بندقيتين النوريكا 61 والصينى وكان لا يعرف موديل الصينى، بعد وصولى للبيت حاولت قراءة موديل البندقية ووجدت عليها مكتوب بخط خفيف shan وباقى الحروف ممسوحة وبعدها كلمة china أعتقد أن ماركة البندقية شانغهاى، بصراحة البندقية حالتها نظيفة وقوية، وقمت بتجربة البندقيتن النوريكا والصينى بالضرب بها من بلكونة شقته فى الدور الخامس على إحدى العمارات، بصراحة رغم قوة الصينى إلا أن النوريكا كانت مدفع جبار لدرجة أنى بعد أن حجزت الصينى ندمت أنى لم اشترى النوريكا ولكن كله نصيب، ومع ذلك البندقية الصينى محترمة جداً شكلاً وموضوعاً وسعرها مناسب 450 جنيه.

المهم حجزت البندقية من استاذ هشام ودفعت مبلغ تحت الحساب وقلتله هجيلك بكرة لأنى مكنتش عامل حسابى، بس بع ما رجعت البيت أتصلت بيه وقلتله هجيلك النهاردة الراجل قالى مفيش مانع رحلته على الساعة 9.15 وأخدت البندقية، وطبعاً لفهالى الراجل فى جرنال ولصقها وأنا جبت معايا أكياس سودا طويلة من بتاعة الزبالة وربطناها بأساتك، وكنت بصراحة شايلها وخايف لظابط يرذل عليه ولا حاجة، المهم بقى وأنا خايف وراكب الميكروباص بيها وحاطط البندقية بين رجلى والكيس مدريها كلها ومش مجسمها ومن شكلها محدش يقدر يعرف أنها بندقية، لاقيت راجل عجوز قاعد جمبى بيقولى أنت شايل معاك بندقية آلى ولا إيه، بصراحة أتخضيت من السؤال بس أخدت الموضوع بدون توتر وبإبتسامة قلتله أه يا حاج بندقية آلى أنت عارف القلق إلى موجود اليومين دول والراجل ضحك هو والسواق وأكل دماغى طول السكة بالبلطجية ومحاكمة مبارك... الخ...

وبصراحة يا جماعة أنا ضربت رشتين بيها لغاية دلوقتى وأنا فى بيتى جبت كرتونة كيبورد وحطتها فى البلكون وقعدت فى الصالة على كنبة الأنتريه وضربت أول رشة خرمت الكرتونة ودخلت فى حيطة البلكونة، مش مهم لأن البلكونة عندى معمولة محارة مخرفشة، ثانى رشة رسمت دايرة قطرها حوالى 10 سم على الكرتونة ونشلت عليها وجت الرشة فوق الدايرة بحوالى 3 سم.


بس يا جماعة إحساس بالخوف وأنا ماسك البندقية تملكنى ورهبة ولكن بدأت الآن أتعود وأتدرب على ماسكة البندقية الصحيحة وأصبحت أكثر تمكناً فى حمل البندقية والثبات بها.

وأنا شكلى والله أعلم هلغى موضوع العربية وأنزل أشترى بندقية جديدة، لأنى بعد إمتلاكى لهذه البندقية وإعجابى بشكلها وقوتها أصابنى الطمع فى إمتلاك بندقية أقوى وأجمل شكلاً.

وأخيراً فيه طلب عايز استفسر عليه منكم، على حسب ما قريت فى المنتدى الرش المصرى الحلو أسمه الرماية أو مارسمان والعلبة تقريباً ب 5 جنيه، هل فيه رش مدبب لأن الرش إلى إدهولى أستاذ هشام راسه مقوصة على شكل نصف دايرة، وأسف أن كنت أزعجتكم بموضوعى هذا