طلعة عذااااااب

[أبو صفية]

السلام عليكم و رحمة الله و بركاته

النهاردة خدت البندقية و طلعت أصطاد سمك كالعادة و كالعادة برده ضربتلى كام رشاية فى الأول أشوف البندقية مظبوطة و لا لا و ما خيبتش خالص لكن مع السمك ضربت يجى 20 رشاية و ما جبتش و لا سمكة و لقيت عش غربان ضربت عليهم يجى 10 رشات برضه و لا غراب بشوف البندقية تانى لقيتها بتحدف شمال يجى 20 سنتى رجعت تانى ظبطها و رجعت للغربان موت 3 فروخ لكن للأسف ما صورتهمش المهم كملت صيد السمك و أول ما البندقية إتظبتت و بدأت العملية تمشى كالعادة لقيت شبارة حلوة قعدت مترصدلها لحد ما جبتها المهم بعد ما ضربتها لقيتها بتتحرك بجرى أجيب الهلب وعشان أجيبها لسة بحط رجلى لقيت تعبان محترم طالع يتحمص فى الشمس و أنا بصراحة بخاف منهم خوف غير طبيعى بالرغم إنى قتلت منهم كتير جدا بالبندقية و مقلكوش بمجرد ما شفته كأنى إتكهربت و أنا بجرى وقعت من على البر فى المصرف طبعا إتبليت مية و طين و حاولت أتعلق فى الغاب و أطلع وقعت تانى كام مرة لحد ما ربنا كرمنى و طلعت و بمسك غابة كبيرة لقيت عليها عش دنانين و عينك ما تشوف إلا النور إتقرصت فى إيدى و ودنى و ورموا جدا قمت واخدها من قاصرها و مروح وقلت بارك الله فى مارزق هيا طلعة منظورة و ألحق نفسى و كفاية عذاب و أسيبكم مع الصور و عملت على السمكة وش المصايب سهم عشان تعرفوا إنها نوعا تستاهل