|
| الإعلانات |
|
|||||||
| الموضوعات العامه الموضوعات الغير متعلقه بالصيد. |
|
|
أدوات الموضوع | إبحث في الموضوع | انواع عرض الموضوع |
12-07-07, 07:17 PM
|
#1 |
|
صيــــــــاد محتـــــــــرف
تاريخ التسجيل: Feb 2012
المدينه: الاسكندريه
المشاركات: 2,659
معدل تقييم المستوى: 141   |
انا كان هايتنصب عليا يارجاااااااله ههههههههههه
السلام عليكم ورحمة الله وبركاته
هاحكيلكو موقف حصل معايا وكنت هاتجنن من الناس اللى بتتفنن فى طرق النصب والضحك على الغلابه اللى عايشين بالعافيه كنت راجع من الشغل على اسكندريه نزلت فى الموقف الجديد فى محرم بك وكان معايا البندقيه الــbsa ملفوفه فى قطعة قماش كبيره كنت باعملها شوية صيانه وبمجرد ماقربت من بوابة الموقف حصل الاتى لقيت حوالى 12 شاب ومعظمهم شكلهم غلط لكن الابتسامه مبتفارقش وشهم  واقفين قدام مداخل بوابات الموقف ومرصوص قدامهم كميه كبييييييييره اوى من تلفزيونات اجهزة كمبيوتر شوايات شاشات lcd اطقم صنى من اللى بــ 400 و600 جنيه وكل الحجات دى جديده زيرو بكراتينها واول مانزلنا من العربيه الميكروباص انا وباقى الركاب لقينا الشباب دول كل واحد منهم جاى على راكب مننا وبرده الابتسامه موجوده على وشه انا عملت نفسى مش واخد بالى ومشيت عادى لقيت واحد منهم جاى ورايا وماسك فى ايده زجاجة برفان من اللى هى بــ10 جنيه دى ودار بينى وبينه الحوار ده انا كلامى مكتوب باللون الازرق وهو كلامه باللون الاحمر يا استاذ ياستاذ نعم ياباشا ممكن بس ثوانى اقولك حاجه اسف والله انا متأخر والله ماهأخرك دقايق اسمعنى بس قلتله خير ان شاء الله بص حضرتك احنا هنا عاملين مسابقه مجانيه وحضرتك مش هاتدفع ولا مليم الا لو كسبت جايزتك عشان ماتقلقش من حاجه لا شكرا مش محتاج جوايز ياباشا اصبر بس وبص على الجوايز ده انت ممكن تكسب جهاز كمبيوتر يساوى 2000 بدون ولا مليم غير 90 جني مقابل الاشتراك فى المسابقه كل مافى الامر اللى يهمنا فى الموضوع هو اننا بنعمل دعايه لشركتنا وبرده والابتسامه مفارقتش وشه حسيت ان الفار بدأ يلعب فى عبى لكن انا لسه مطمن عشان مش هادفع غير لو كسبت جايزه وممكن اكسب حاجه حلوه  ههههههههههههه وبصيت للأجهزه اللى مرصوصه قدامى وقلت لنفسى فيها ايه ياض جرب طالما مانتش دافع حاجه قلت للراجل طيب اي المطلوب بالظبط عشان اشترك ولا حاجه انت هاتفتح زجاجة البرفان دى (هى متغلفه ومعاها ظرف) وتشوف هديتك ايه جوه الظرف واى حاجه من الهدايا دى تمنها لايقل عن 400 جنيه يعنى ممكن كمبيوتر شوايه شاشه ال سى دى تلفزيون 28 بوصه لو كسبت اى هديه منهم هاتدفع فقط 90 جنيه مقابل الاشتراك فى المسابقه وتاخد جايزتك وتمشى مهما كانت ولو الورقه طلعت فاضيه ومكسبتش حاجه هتاخد زجاجة البرفان دى ببلاش وتمشى بدون ماتدفع ولا مليم انا فكرت فى الموضوع وقلت لنفسى ايه المانع ايا ان كانت الجايزه اللى هاكسبها فهى سعرها لايقارن بالــ90 جنيه وبعدين ده انا واد زكى جدا ومقطع السمكه وديلها ومستحيل ينضحك عليا احم احم ههههههههههههههههههه  قلتله توكل على الله وافتح الظرف فتح الظرف الله اكبر علييييييك يابن اللعيبه ده انت كسبت جايزتين كمان مش جايزه واحده دى اول مره تحصل معانا انا الفرحه نطت فى عنيا وقعدت احلم بقى ياترى ايه الجايزتين كمبيوتر ولا شاشه ال سى دى ولا الاتنين مع بعض وقعدت احلم بقى احلام جميله  هههههههههههههههه قلتله تسلم ياعم على زوقك ورينى بقى الورقه كده اشوف ايه هما الجايزتين لقيت مكتوب فيها مبروك كسبت 2 جايزه طقمين صينى لجهاز العروسه قلت الحمد لله طقمين بــ800 جنيه مثلا وهادفع فيهم 90 جنيه بس قال لا ياباشا دول جايزتين يعنى تدفع 180 جنيه قلت لنفسى مش مشكله برده انا كسبان طلعت ورقه بــ200 جنيه واديتهاله وادانى الباقى راجل امين فعلا ههههههههههههههههههه راح منادى لواحد تانى من زمايله وقاله خد الورقه دى وسلم الاستاذ الجايزتين مبرووووووووووووووووك يا استاذ اتفضل معايا اسم حضرتك ايه فلان الفلانى وانا ماشى معاه بقى قاعد احلم بالطقمين اللى باشوفهم فى اعلانات التلفزيون الطقم ابو 400 جنيه فيه 140 قطعه وشايل هم انى مش هاقدر اشيلهم لوحدى هههههههههههههههههه المهم وصلنا عند العربيه المركونه جنب البضاعه فتح الشنطه طلع الجايزتين اتفضل ياباشا جوايزك انا بصيت للجوايز وكان هايغمى عليا ويجيلى سكته قلبيه  ههههههههههههههههههه هما عباره عن كرتونتين كل كرتونه فيها تقريبا 6 اطباق صينى و6 سلطانيه وكان من حسن حظى انى كنت باشوفها فى سوق باكوس عندنا على طول البياعين بيبيعوها الطقم بــ15 جنيه ومالهمش علاقه خاااااااااالص بالاطقم اللى هما حاطينها جنب البضاعه بره قلت لنفسى اوبااااااااااااااااا شكلك وقعت فى الفخ واتنصب عليك يامعلم وقال عامللى فيها زكى قال ههههههههههههههههه قلتله ايه ده؟؟ الجايزتين بتوع حضرتك لألألألألألألأ خليهملك يابابا انت فاكرنى هندى ولا ايه وزعقت بصوت جامد والناس بدأت تاخد بالها وتتلم وانا عارف ان اكيد كلهم شايلين مطاوى وممكن اتقطع دلقوت ومحدش هايلحقنى  بس برده مهمنيش وقلت اللى يحصل يحصل لقيت تلاته منهم اتلمو حواليا ووشهم اتقلب من الحب والالفه اللى كانو عليها فى الاول الى الشر والنظرات مرعبه واللذى منه  قلت لنفسى انا كده شكلى اتنصب عليا رسمى يارجاله هههههههههههههههههه عليا النعمه ياقاتل يامقتول هنا حتى لو هاموت مش هاسيب حقى وطلعت جرى على الواد الاولانى اللى اخد منى الــ200 جنيه قلتله هات الفلوس انا مش عاوز جوايز فلوس ايه ياعم انت مش دخلت السحب بمزاجك وبعدين ده انت كاسب جايزتين عاوز ايه تانى هو حد طايل لا ياعم الخفيف مش عاوز جوايزك الحلوه اللى بتضحك بيها عالناس الغلابه وكنت ماسك البندقيه فى ايدى ومستعد فى اى وقت لأى لحظة غدر منهم هى طبعا ملفوفه بالقماش بس كنت هاستخدمها كا (شومه) وكده يعنى  والله جوايزك هناك اهى ياتاخدها وتخلع من هنا ياتسيبها انت حر انا حسيت انى لو مشيت هابقى اكبر جبان ومش راجل لو مشيت وفجأه قمت هاجم عليه وكان فى ايده كبشة فلوس كلها خمسينات على ميات على متينات (كله من دم الغلابه طبعا) ومسكته من ايده مسكه قويه وبصيت فى عنيه بصه جامده كلها شر وقلتله هات الفلوس احسن وحياة امى هاقتلك هنا دلوقت لقيت واحد من بعيد قاله اديله فلوسه ياعم ده شكله لبش وهايعملنا وش هنا قام مطلع 180 جنيه وادهملى وهو بيبصلى بصة كلها وغيظ ونفسه يقتلنى دلوقت اهو قمت واخد الفلوس وماشى ولااااااااااا كأن فيه حاجه وهما كلهم بيبصولى بغيظ ونفسهم يضربونى بس مش قادرين عشان مايفضحوش نفسهم  واكيد طبعا فيه ناس كتير اوى غلابه انضحك عليهم غيرى منهم اللى مايعرفش سعر الحاجه دى فعلا ومنهم اللى بيكتشف انه انضحك عليه بس بيخاف يتكلم ومنهم اللى بيكون معاه مثلا حد من عياله او مراته وبيخاف يتكلم لكن على العموم انا قلت اللى حصل معايا وبعد كده شوفت مجموعات كتير بتشتغل بنفس الطريقه فى كثير من الميادين والحطات رجاء من الجميع اخذ الحيطه والحذر
__________________
*لـيس كـل مـن حــمـل السلاح كـان صيـادا* *ولكن كل من كان صياداً كان للأخلاق عنوانا* |
|
|
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| مطوة ضعف حجم حاملها ههههههههههه | عبــ الله ــد @ | الصيد البري وادواته | 9 | 12-08-05 05:08 PM |
| اسلحة الام...تحتاج تقييم حلو ههههههههههه | Karim Eid | الموضوعات العامه | 31 | 12-02-11 04:01 PM |
| ههههههههههه توفيق عكاشة أحسن من 10 كيلو لب و سودانى | ahmedmh_ali | الموضوعات العامه | 26 | 11-12-23 02:00 PM |
| صورى وانا صغييييير ههههههههههه | محمد ياقوت | الموضوعات العامه | 21 | 11-08-21 09:49 PM |
| من غير متضحك عليا | omarara | بنادق ضغط الهواء ومتعلقاتها | 12 | 11-05-15 10:54 PM |
العرض الشجري