ليه السلاح حلم للمصريين

[michohat]

السلام عليكم ورحمه الله وبركاته

عاوز افضفض معاكم بخواطر عندي بخصوص تحكمات الدولة فى اقتناء السلاح

ليه خطوات اقتناء سلاح صعبه كده فى البلد
ليه مش تكون رخصه السلاح زي رخصه قياده العربيات من حق من يطلبها
طبعا كلنا عارفين كل العراقيل انك لازم يبقي عندك مبررات واملاك بكذا و اشتراطات
طب انا عايز اشيل سلاح وابقي مسئول عن سلاح ليه ياحكومه تمنعيني مع اني لائق طبياً وجسمانياً ونفسياً ما ممكن لو عاوز اشيل اشيل من غير رخصه بمبدأ الممنوع مرغوب
ولو ربنا كرمنا بالوساطه وبالمعارف طلع التصريح ايه الاسعار الخزعبليه دي معقول الشرعي اغلى من المخالف

وبعد ده اسمع انك بتحاسبني عن عدد الطلقات اللي بستعملها في السنه ( ليك فيها دي ايه) ما تحاسبني على الهوا الكيلومترات اللى السلاح مشيها معايا كمان

وفى الاخر لما اموت تقول نرجع المسدس طب فرضا ان المسدس له قيمه عند اولادي و مثلا اعوذ بالله اكون عرفت فى حياتي اني اشتري مسدس جميل بالاسعار الخزعبليه بتاعتكم دي ليه مش يتنقل لاحد الورثة ده بفرض انكم لا قدر الله بتسهلوا اجراءات التراخيص بدل ما يتباع باي ثمن

طب انا دلوقتي مش معايا الامكانيات اللي تحقق لي ده كله وحبي للسلاح موجود
نوادي الرماية مش منتشرة ليه وليه اشتراكتها بالشكل ده

من اللي اعرفه ان فيه ناس اعراب مصريين في بعض المناطق بيعدوا علي كماين بعربياتهم المتفيمه سوبر دارك ومش عليها نمر كمان ولا حد يوقفهم ولايقدروا ومعروف ان مفيش حد منهم بيمشي من غير سلاح

هنرجع نقول لو عملنا كده هيبقي الشوارع حمامات دم
طب ليه نفترض اسوأ حاجه
مش لو سهلتوا الترخيص ايوه هيكون في اقبال و الترخيص لازم معاه دورات تدريبية والمتقدم يعديها بتقديرات ( ممكن هنا يكون شبهه فساد وواسطه)
وتغلظوا عقوبة السلاح المخالف
وتشغلوا المصانع بتاعكم و تخلوا فلوس البلد فيها

شكلي بحلم صح؟
معلش مخنوق من الحال وقول افضفض معاكم