الحلال مابيضعش

[كابتن محمود دياب]

السلام عليكم
اخواتى فى المنتدى انا حصل معايا امبارح موضوع غريب وحبيت انكم تشاركونى فيه
اولا انا كنت اشتريت طبنجة ايجل واتسرقت منى وبعد شهرين رجعتلى
تفاصيل الموضوع
فى يوم كنت فى البيت وكان عندى صديق عزيز عليا وكان عايز يشوف الطبنجة كنا قاعدين فى البدروم بتاع البيت عندى زى مضيفة كبيرة كده المهم شافها وعجبته قوى وبعدين عنتها تحت المرتبة بتاعت سرير موجود تحت فى البدروم وقلتله انا هاروح اشترى حاجة تيجى معايا قالى لا انا مروح قلتله ماشى روحت اشتريت الحاجة بتاعتى ورجعت قعدت شوية كده وجيت بعدها ابص على الطبنجة مالقتهاش فى مكانا اتصلت على صاحبى ده وعرفته زعل قوى وجالى وقعدنا ندور عليها وقلبنا الدنيا مالقناش حاجة فاستعوضت ربنا فيها.. لحد كده تمام....
بعدها بأسبوع كنت قاعد مع صاحب تانى ليا غير الاةلانى اسمه ممدوح قالى انا شفت الطبنجة بتاعتك امبارح فى فرح فى ايد واحد اسمه على قولتله انت متاكد قالى ايوه متاكد تانى يوم روحت لعلى ده البيت عنده قابلنى والده كان راجل محترم جدا وعضو مجلس شعب سابق حكيتله الموضوع بعد ماعرفته بنفسى وعائلتى قالت سيبلى رقمك وانا هاشوفلك الموضوع ده لان ابنى فى كلية بره ومابيجيش غير يوم الخميس انا قولت عوضى على الله ومشيت وفى نفس اليوم اخر النهار لقيت الراجل ده بيتصل عليا وبيقولى الطبنجة دى مش ملك ابنى ده واخده من واحد اسمه عبدالله وانا لما ينزل هاخليه يشوف الموضوع ده شكرت الراجل جدا وعدى يومين ولقيت نفس الراجل بيتصل عليا وبيقولى عبدالله هايكلمك كلمت عبدالله قالى تعال قابلنى روحت قابلته قالى الطبنجة دى مع واحد اسمه حسن وانا كنت استلفتها منه عللشان اضرب بيها فى فرح واحد قريبى حسن ده كان فى بينى وبينه معرفة روحت كلمته فى الموضوع وشرحتهولى قام جايبهالى وقالى شوفها اهى لقيتها هى قولتله جايبها منين قالى من واحد من الهرم قولتله لا مش مظبوط وسيبته وروحت واخر النهار نزلت البدروم بعد مااتصلت بمجموعة من اصدقائنا وحسن وقعدنا كلنا قعد يحلف انه واخدها من واحد من الهرم وقالى اسأل محمود هو الى جايبهولى قولتله محمود مين قالى محمود الفلانى فاعرفتو وكانت بتجمعنى بيه صلت قرابة اتصلت بيه وقلتله تعال قالى الوقت متاخر مش هاينفع اجى قمت اخدت 4 من زمايلى ورحتلو عالبيت وقلتله انزل دلوقتى وسألتو قلتلو انت جبت واحد من الهرم علشان يبيع الطبنجة دى لحسن انكر فى الاول بس بمواجهة حسن قال اه قمت ضربه قلم ومسكته من لياقته وقلتلو انت كداب قالى هاقول الصراحة الى ادانى الطبنجة دى فلان الفلانى وقالى ابيعهالو بس ماقولش انه هو الى مديهالى قمت جايب واحد صاحبى وقلت انه من الهرم وانها بتاعته علشان ابعده عن الموضوع وكان معايا واحد اسمه محمد..

تعرفوا مين فلان الفلانى الى خدها؟
كان صاحبى وحبيبى الى واكل معايا عيش وملح وقاعد معايا فى البدروم ودنوا يدور معايا الى ذكرته فى الاول..
طبع صعقت ومش مصدق قولتله استنانى هنا فى البيت ولو اتصلت عليك تجيلى
كلمت صاحبى وقلتله تعال عاوزك قالى مش هاينفع ومش فاضى قلتله طب استنانى قدام البيت انا جايلك وقمت قافل الخط اخدت 2 من زمايلى وروحتله لقيته قاعد وسط ولاد عمه قلتله تعال انا عايزك فى كلمة لوحدنا قالى لا اتكلم ماحدش غريب وانا مابخبيش حاجة قمت واخد الطبنجة من حسن وموريهالو وقلتلو مابتشبهشى على دى قالى ماعرفش الحجات دى قولتله ازاى دى الطبنجة الى ورتهالك والى انت خدتها منى ينفع الى عملته معايا ده قالى لا وماحصلش وده كدب قولتله ربنا عرفوه بالعقل وحكيت الموضوع وقولتله فى شهود الى ادتهم الحاجة واتصلت على محمود وقلتله تعلالى وكان ابو الولد ده نزل على صوت الزعيق وحكيتله الموضوع وجبت الشهود قالو قدامه انهم خدوا منه الطبنجة علشان يبيعوها وحكوا الكلام كله والعيال باعوها ب 500 جنيه وادوا للواد الى سارقها 200 جنيه وده الى حرق دمى اكتر قام ابوه جايب 500 جنيه من فوق واداهم للى اشترى الطبنجة وانا اخدت الطبنجة بتاعتى تانى بعد شهرين من سرقتها بسعلى قد ماكنت فرحان كنت حزين جدا علشان صاحبى خانى بالشكل ده...

ارجوا ماكونش طولت عليكم ودى صور الطبنجة الى كانت مسروقة ورجعت