للبيع مسدس جامو p 800

[JOSEPH]

اهلا بيك يا mishofun79 معليش مليش نصيب اتشرف بمعرفتك ان شاء الله تتعوض فى حاجة تانية
اما بالنسبة للديانا فأنا شاريها ب 7500 جنية. وانا علشان اشترى البندقية دى سألت فى كل محلات القاهرة الكبرى وضواحيها شبر شبر بيت بيت دار دار زنجا زنجا ومالقتهاش لحد وانا بدور عليها اتعرفت على واحد وكان عندة اتنين منها واحدة عايز يبيعها والتانية مخليها لنفسة و اشتريتها منة و لما قال لى سعرها مقدرتش افاصل معاة خالص لأن مفيش منها فى السوق ولا واحدة واللى معاة منها واحدة ماسك فيها ومخليها لأستخدامة الشخصى. ولو مش عارف ال 300r تبقى مش عارف هى لية دى بالذات من النادر جدا لما تلاقيها. الميزة اللى فيها و مش موجودة فى كل موديلات الديانا التانية هى ان فيها خزنة بتشيل سبع رشات وكمان نمرة 2. البندقية دى فعلا تستحق لقب مدفع قوية جدا. يعنى انت مثلا ممكن تلاقى ديانا اير كينج 54 او 56 حتى لو لقيتها غالية انما ال 300r مش هتلاقيها لا بالغالى ولا بالرخيص انا. بس انا قبل ما اشتريها اتعرفت على واحد تانى من الناس المعروفة هنا فى المنتدى كان هينصب عليا بس الحمدالله لحقت نفسى قبل ما اقع فى الفخ. الراجل دة بقى كان هينصب عليا ازاى؟ اولا انا ما قابلتهوش خالص لحد دلوقتى كان كلامى معاة على الموبايل. قالى ان هو عندة بندقية bsa goldstar ودى بندقية بردو بخزنة وبتشيل 10 رشات وقاللى سعرها 4000 جنية مصرى و قاللى ان هو من دمنهور وبينزل مصر كل فترة وفضل معلقنى معاة فترة وكل لما اتصل بية يعمل نفسة ما يعرفنيش واقولة سجل نمرتى علشان لما اتصل بيك تفتكرنى على طول وبعدين اتصل بية تانى يوم علشان اكمل معاة الاتفاق بردو ما يعرفنيش وافضل افكرو بيا. قال يعنى عامل نفسو راجل مهم ومن كتر مكالماتة مش بيفتكر وبعدين لما حن عليا وقالى انة نازل القاهرة قالى ان اللى هيجيبلى منة البندقية غير رأية وعايز فيها 6000 جنية بردو مصرى فأنا اتخضيت وكنت هاءع من طولى من الصدمة وكنت هقولة مش عايزها بس بصراحة انا كنت هافطس على بندقية بخزنة وما كنتش عايز اشترى بندقية رشة رشة فقولتلو موافق مع ان دة استغلال ولما جيت اتفق معاة قولتلو لما تيجى مصر تشرفنى عندى فى البيت علشان اجربها واشوفها بالراحة فرد عليا رد غريب جدا عرفت وقتها انة نصاب رسمى وان هو معندوش اصلا البندقية دى. اية هو الرد بقى؟ قالى انا لما هنزل مصر هكون مستعجل ومش هقدر اجيلك البيت فقولتلو امال هنتقابل فين؟ قالى بسلامتة هنتقابل فى الشارع ويدينى البندقية فى العلبة من غير ما افتحها ولا اشوفها ولا اجربها واديلو 6000 جنية بردو مصرى ويخودهم ويخلع وابقى انا اللى اشتريت الترماى رقم 2 بعد اسماعيل يس زمان فى الفيلم وعلشان كدة يا جماعة لازم نخلى بالنا من النصابين ومانأمينش لحد بسهولة. ملحوظة فى احتمال ان النصاب يكون بيدخل على المنتدى بأسماء كتير ويقعد يشكر فى نفسة علشان الناس تأمنلو. وملحوظة كمان مرة من المرات اللى انا كنت بكلمو فيها قالى انا لازم اقفل معاك دلوقتى علشان انا لازم اصلى علشان يخلينى أأمنلو اكتر فأحنا لازم نخلى بالنا من الناس اللى بتمثل دى وهو اصلا ما يعرفشى ربنا لو يعرف ربنا مكنش ينصب على الناس وكفاية كدة انا صوابعى وجعتنى من الكتابة سلام عليكم.