اول طلعة ليا و جت على غفلة

[silver_5000]

السلام عليكم و رحمة الله و بركاته

صباح الخير يا رجالة , كل سنة و كلكم طيبين إن شاء الله , النهاردة طلعت طلعة الصبح بعد الفجر على الساعة 5:30 تقريبا للساعة 6:30 يعنى ساعة بالتمام و الكمال , انا اصلا كنت بشوف غربان كتير و انا فى طريقى لبيت والدى ( انا و والدى ساكنين فى فيصل ) المهم كنت عند والدى و كنا سهرانين علشان نتسحر و نصلى الفجر عادى جدا و طلعت ف دماغى انى انزل اجرب اصطاد لاول مرة فى حياتى , و كنت حاطط فى دماغى انى هضرب كام غراب و كدة يعنى المهم , عديت على المكان اللى كنت بشوف فيه الغربان , ملقيتش غربان قولت اكمل شوية و اشوف يمكن الاقى حاجة اجرب اصطادها , لقيت شوية يمام على الارض و انا ماشى بالعربية , المهم اشوف اليمامة من دول واقفة اجى اطلع البندقية و اعمرها علشان انشن عليا و اضربها الاقيها طارت اول ما تسمع صوت البندقية و هيا بتخبط فى اى حاجة و لا فى العربية المهم من هنا اتعلمت انى اخلى البندقية فى متناول ايدى , و كملت و ضربت على كام يمامة الاقى الرشة متجيش فيها و هيا تطير بنت اللذين , و فجأة ربنا كرمنى و لقيت غراب واقف يا عينى ف حاله بس على مين , ضربته بس كنت متوتر شوية او قلقان انها متجيش فيه بس جت فيه و وقع فى مكانه , على ما ماجيبت الموبايل و روحت اصوره لقيته طار تانى ابن الذين و متهنيتش على فرحتى , المهم شوية و الاقى يمام و اهدى و اضرب و ربنا كرمنى و جيبت يمامة و جريت شوية و لحقتها بسلاح التزكية و دبحتها ( و كان احساس ليه رهبة اول مرة ادبح فى حياتى ) و شوية و لقيت يمامة تايهة قومت مناولها رشة حلوة جت فيها و وقعت بس على ماجيبت سلاح التزكية و روحتلها لقيتها جريت و دخلت مكان كدة بتاع حد زى مزرعة و دخلت وراها و هنا اتعلمت ان الواحد لما الحاجة اللى اصطادها تدخل عند حد فى مكانه ميأاوحش كتير و بالذات لو لقى المزرعة دى فيها شوية كلاب ولاد لذين يسيب الحاجة للكلاب بدال مايتسلو عليه هو احسن , و شوية و لقيت يمامة تانية ضربت عليها و جت فيها بس وقعت و لقيتها طارت شوية قولت بس دى راحت خلاص مشيت بالعربية شوية و رجعت للمكان اللى ضربتها فيه يمكن الاقي يمامة تانية اصطادها لقيت اللى انا ضربتها و طارت واقعة و ميتة ( صحيح الحمد لله كنت بسمى الله و اكبر قبل ما اضرب اى رشة و لو نسيت كانت فى نيتى ) المهم خدتها و دبحتها برضه و شوية و لقيت عدم التوفيق تملكنى و كل ما القى يمامة و اجى اضرب عليها متجيش فيها ف زهقت لانى اصلا مفيش معايا حد يشجعنى , و قولت اروح و انا ماشى لقيت غراب جميل كدة اديته هدية ( رشة من نوع ميلبرو راسها كروية ) فى صدره وقع مقفول و بس و الحمد لله قولت اكتفى لحد كدة و بداية الحمد لله مفرحانى اوى ,


كنت عايز بقى رأى الخبراء بجد علشان اعرف كذا حاجة , حكاية انى اضرب على الحاجة و متجيش فيها ده طبيعى و لا ده معناه فشل ذريع منى مع العلم ان المسافة ماكنتش بتزيد عن 15 متر , و اليمامة اللى لما رجعت و لقيتها ماتت دى حلال اكلها و لا حرام و متشكر جدا و كفاية الرغى اللى انا فيه ده اسيبكم بقى مع الصور





و ده الغراب اللى راح يا عينى فى شربة مية