محتاج سكوب

[Qoldus]

المشاركة الأصلية كتبت بواسطة karam okasha

متشكر جدا على كلامك الحلو اولا

اما ثانيا الا سعار عالية مش عارف اعمل اية انا ممكن ابيع البندقية الصينى استعمال خفيف بس مش عارف تجيب كام ياريت تفيدنى
ولو حبيت اقوى الى عندى اعمل اية فى حالة انى موفقتش فى البيع

العفو يا باشا إحنا إخوات وتحت أمرك وأمر الإخوة جميعا...لو عايز تسمع نصيحتى وطبعا إنت حر ده يرجعلك...ما تستعجلش وتبيع البندقية بتاعتك...لسبب بسيط...هاتخسر فيها كتير...يعني بكتيره ها تبيعها في حدود 600 جنيه ده لو حالتها جديدة وكسر الزيرو مافيهاش خدش...ونصيحتي خليها زي ما هيا وبلاش تلعب فيها علشان تقويها المصنع مصممها كده لسرعة وقوة معينة...تابعها إنت بالصيانة والتنظيف بعد كل إستعمل وتجنب الضرب بيها على الفاضي ( بدون رش ) علشان ما تبوظش الجلبة أو تكسر السوستة أو البستم...برضو محتاج مبلغ كبير علشان تكمل وتشتري بندقية هاي باور...صدقني إللي معاك حلوة مش بطالة وكفاية إنك تمارس هوايتك وإنت مرتاح ومش مزنوق في الفلوس أو متداين لحد...غيرك مش طايل رمسيس أو معادي...وبعدين غالبية الصيادين المحترفين مش بيصطادوا على مسافات أبعد من 20-30 متر ونادرا ما يحتاجوا تليسكوبات للصيد من مسافات بعيدة...دي بتبقي حالات نادرة وقليلة...وإللي معاك تغطي المسافة دي مستريح قوي...والتيليسكوبات صدقني والله مركبينها ونادرا ما نستعملها...معظم الشباب الصغير بينبهر بشكل البندقية وعليها تيليسكوب بغض النظر هوا عايز يصطاد بيها إيه...خليك عملي وصدقني مارس هوايتك ببندقيتك العزيزة إمكانياتها مش بطالة وشغالة زي الفل وبتصطاد...ولعلمك بقي متعة الصيد والفن والحرفنة في الصيد بالنيشانات العادية بدون تيليسكوب...التيليسكوب ها يقيدك بمسافة معينة حسب الظبطة بتاعتك...ولما تغير المسافة سواء قربا أو بعدا أو حتى تغير نوع الرش ها تحتاج تظبطه تاني...غير مشاكل تحركه وعدم ثباته في مكانه وتحتاج كل شوية تربطه وتأكد على مسامير تثبيته وهكذا...صدقني أنا قناص قديم وعندي بنادق كتير بتيليسكوبات وبدون...صدقني بأستمتع أكثر بالبنادق إللي بدون تيليسكوب...لكن أنا غاوي وبأحب الإقتناء وبأصرف على هوايتي مبالغ طائلة...وطبعا مش كل واحد عنده الإمكانيات دي...يا ريت كلامي يكون أفادك يا باشا...وبرضو الأمر ما يمنعش معانا أخوة وأساتذة كبار يفيدونا بآرائهم وتجاربهم الشخصية...المجال مفتوح وكل واحد يدلو بدلوه...