المسافه _ والصيد

[best hunter]

المشاركة الأصلية كتبت بواسطة المستشار

اخوانى الاعزاء انا بطرح عليكم موضوع للمناقشه وبخص بيه اساتذتنا فى المنتدى يعنى الناس الجامدين اوى وهذا الموضوع يتناول شقين اولا المسافه المناسبه لظبط النشينكاه سواء عادى او بالمنظار والشق الاخر وهو الاهم امتى اتربص بالطير امتى اضربه على اى مسافه لان معظم الناس اما بتقرب منه اوى فبيطير او بتضربه من بعيد اوى فتخطأ الاصابه وهل كل طائر بيضرب من على نفس المسافه ولو كان فى مجموعه طير على الارض ازاى اتعامل معاها وانهى طير اختار ولو كانوا على بناء او سلك او فى الماء وهل قوه السلاح بتفرق يلا يا اعضائنا الكرام شاركونا بخبراتكم وانا هرد عليكم فى الاخر خالص بعد ما استمتع بتجاربكم ونصائحكم

حضرتك سالت عن 4 حاجات تقريبا
1- ازاى نظبط الشنكان والمنظار:
انا هاقول النشكان وفقط لانى ما ركبتش منظار قبل كده
وده مش محتاج مسافه معينه
فقط
انك بتشوف اصغر حاجه عندك ممكن تمثلك الطير وتضعها على مسافه تكون فيها الرؤيه واضحه وتحط عينك فى النشنكان على الظبطه الصح(سن نمله الدبانه مكمل لفتحه الشيز) وبعدين تضرب
هاتلاقى الرشه جت يمين او شمال او فوق وتحت
تبدا تظبط
بس ما تثبتش البندقيه بحجه انك لازم تبقى صح
لان اكيد ايدك هاتتحرك فى اى ضربه ولازم تكون حركه ايدك متوازنه مع ظبطه نشنكان بندقيتك
انا مش عارف افهمها لحضراتكم ازاى بس ما دام اصبت الهدف 3 مرات متتاليه بنفس ظبطه النشنكان يبقى هو كده بونو
وصحيح النشنكان مش زى التليسكوب محتاج مسافه معينه لانه اصلا المسافه الراسيه بينه وبين ماسوره البندقيه ما تتعداش ال2 سم فعادى حكايه المسافات ديه

2- ازاى نتربص بالطير ونصطاده وايه المسافه:
لو بنصطاد فى صحرا او بمعنى اصح منطقه قليله المبانى
يبقى لازم نضرب من بعيده شويه يعنى بالقليل مسافه 20 متر بينك وبين الطير وبلاش نبالغ فى المسافات لان اقصى مسافه تجيبها بندقيه رش هى 100 متر على حد علمى
ولو نقدر نستخبى او نموه نفسنا حسب طبيعه الارض والبيئه يبقى تمام اوى
وكمان
لو شوفت طير ولقيته مش مديك اى انتباه وبيمشى عادى(خاصه اليمام) اعرف ان اليمامه ديه مش معاك اصلا ومش شايفاك فقرب منها لحد لما تحس انها بدات تقلق(تقف وترفع رقبتها وتبصلك)
اما بقى لحد زى حالاتى بيصطاد فى المدن
فاهم شئ عينيا واكون شديد الملاحظه والهدوء
طبعا غير انك لازم تعرف طبيعه الطير اللى هاتصطاده وتعرف هو بيلاحظ ايه اوى وكده

3- قوه السلاح اللازمه:
بصراحه انا بفضل القوه المتوسطه للطيور معظمها
لان البندقيه بتبقى هاديه وصوتها واطى ورد فعلها مقبول
ده غير انها مش بتكسر الطير
وزى ما قلت اقصى مسافه 100 متر فمش محتاج اقوى من كده
والصياد باى سلاح هايقدر يصطاد الفريسه حتى لو ب(طوبه)

4- انهى طير نصطاده:
انهى طير من جميع الطيور
طبعا الطير الذى يؤكل وتقدر توصله بعد ما تصطاده علشان ما يبقاش حرام اننا موتناه وخلاص
اما بالنسبه لانهى طير من نوع معين
فاكيد الاصغر حجما والانثى
علشان الطيور الباقيه تحس بالخطر على الصغار فتحاول تنقذهم ظنا منهم انهم هايقدرو
ولو فيه تجمع طيور امامك وعاوز تصطاد منه كتير
انزل ع الارض
واصطاد بوضع افقى
مش علشان تجيب عدد اكبر من الطيور بطلقه واحده وبس
لا
علشان الطيور ما تلاحظكش فترجع تانى
وبصراحه انا فى عقلى حاجات اكتر واكتر بس مفيش متسع اننا نشرح كل حاجه فى تعليق واحد
ونستنى بقيه الاعضاء علشان يفيدونا بخبراتهم
وشكرا ع الموضوع المفيد ده