الشرح الكامل لقنص الاسماك بالبندقيه

[القبطان المصرى 77]

بسم الله الرحمن الرحيم
السلام عليكم ورحمة الله وبركاته
بعد الكثير من الاستفسارات من الكثير من الاعضاء
بعد الكثير من الاستغرابات
بعد الكثير من الانتظار
وبعد التحيه
كنت وعدت اخواتى واحبابى اللى كانو بيستفسرو عن طريقة صيد السمك بالبندقيه
انى اعمل موضوع اشرح فيه كل حاجه
واليكم الشرح المفصل عن طريقة قنص الاسماك بالبندقيه
وبصراحه اللى هايجرب الحكاية دى هايحس بمتعه كبييييييييييره اوى
اكتر من متعة صيد السمك بالسناره
والسبب
انك مش هاتحس بالملل ابدا زى مابيحس بيه صياد السناره:o
لأنك مش هاتقعد فى مكان واحد اكتر من عشر دقايق
انك ان شاء الله مفيش طلعه هاترجع فيها مكسور الجناح
لكن الصيد بالسناره
ممكن تطلع يوم بطوله وترجع اخر اليوم بسمكه او اتنين
وممكن ترجع فااااااضى خالص:mad:
هو الموضوع طبعا اولا واخيرا رزق من عند ربنا
لكن برده انت لازم تعمل اللى عليك
المهم
دلوقت انت حطيت الموضوع فى دماغك وعاوز تطلع تجرب
هاتقوللى ايه المطلوب ياعم الحاج عشان الرحله دى
هاقولك بص ياسيدى
المعدات المطلوبه
اولا
بوصه صيد بحر انجليزى اسمها (نتش)او لطش
ودى طولها خمسه متر
ولو لقيت 7 متر يكون احسن

وهى بنظام العقل بتدخل فى بعضها ولما بتلمها بيكون طولها 1 متر فقط
ولما بتفردها بيكون طولها خمسه متر
ودى بتكون قويه وناشفه عشان تقدر ترفع بيها السمكه لو كبيره


وتجيب حوالى 1 متر سلك صلب ويكون قطره مثلا فى نفس قطر سلك الشاحن بتاع الموبايل او اتخن قليلا وتعملها طوق صغنن كده
وتجيب حتة شبك من اى محل ادوات صيد
وتركبها على الطوق اللى عملته وتخليها زى حلقة كورة السله كده لكن هاتقفلها من تحت طبعا
وتخليها بالشكل ده

وبعدين تركبها على البوصه بالشكل ده

ثانيا
وعاء مربع بحجم مثلا 20 فى 30 سنتى عشان تحط فيه السمك
وتحط فيه شوية تلج وانت طالع عشان السمك مش يبوظ من الحر
انا باخد حاجه زى كده معايا

ومتنساش تاخد معاك زجاجة مياه ليك انت عشان هاتخرج فى عز الحر وهاتعطش كتير اوى وهاترجع تدعى عليا
ههههههههههههههه
ولو هاتروح مكان بعيد شويه ممكن تاخد معاك اكل كمان

وتاخد معاك سكينه حاميه لزوم الدبح عشان ممكن يقابلك فراخ ميه وانت بتصطاد
ومايمنعش برده انك وانت ماشى ممكن تلاقى يمامه ولا حاجه
يعنى السكينه مهمه برده معاك

طيب كده تمام
فاضل ايه تانى بقى عشان نخرج نصطاد ياواد
فاضل ايه ياواد:confused:
اه
فاضل البندقيه طبعا
امال يعنى هانصطاد بالطوب
هههههههههههه

وفيه شىء مهم جدا جدااااااااا لازم تعمله قبل الخروج للمشوار
وهو انك لازم تظبط الناشنكاهات على الضرب لأسفل
يعنى مثلا تقف فى بلكونه فى الدول الاول
وتحط زلطه فى الشارع تحت او اى هدف وتظبط عليه البندقيه قبل الخروج
لأن الضرب لأسفل مختلف جدا فى منحنى الرمايه عن الضرب الافقى
الرش المفضل
وااااااااادى كمان الرش
وعلى فكره الافضل فى صيد السمك اى رش ماجنوم مدبب
او ديابلو
هاتقوللى ليه مدبب
هاقولك عشان الرشه لما بترتطم بالماء بيتيغير مسارها قليلا بفعل الارتطام بسطح الماء
وكلما قل حجم بوز الرشه بيكون مساحة الارتطام اقل
يعنى بالعربى الرش المدبب افضل
وانت وراحتك برده

نيجى بقى على شىء مهم جدا فى العمليه دى
هما حاجتين بصراحه
الاولى
انت هاتلبس ايه وانت رايح
الافضل طبعا انك تلبس ملابس قاتمه اللون وغير مميزه
يعنى بلاش الالوان الزاهيه
خليك مثلا فى الرمادى
او البيج
او الاخضر
او المشجر
ويستحسن انك تلبس طاقم كله لون واحد لو امكن
ليه بقى
لأن السمك حريص جدا وبمجرد ماهيشوفك ويلاحظ وجودك كل سنه وانت طيب مش هاتشوفه تانى فى نفس المكان
وبالذااااااااااات السمكه الكبيره لأنها ازكى

الحاجه التانيه
هى ظاهرة انكسار الماء
بمعنى ادق
انك مثلا بتشوف سمكه تحت الميه على عمق مثلا 20 سنتى
وبتنشن وتضرب عليها وتتفاجئ ان الرشه مجتش فيها
وهذا هو مايسمى بظاهرة انكسار الماء
وهو انك بتشوف اى حاجه تحت الميه اعلى قليلا من مكانها الحقيقى
وان اللى انت ضربت عليها دى كانت صوره وهميه للسمكه
ولكن الصوره الحقيقيه للسمكه بتكون تحت الصوره اللى انت شايفها بمقدار تقريبا 6 سنتى لو العمق 20
ولو العمق 10 بتضرب اسفل صورتها بمقدار 4 سنتى
ولو العمق 5 بتضرب اسفل 2
ولو العمق خمسه سنتى فما اقل ودى افضل وضعيه للسمكه لقنصها بتنشن وتضرب عادى بالطريقه المعتاده اسفل منتصف الهدف
الايام المفضله لصيد السمكالايام المفضله لصيد السمك
ايام الحر الشديييييييييد اوى
ومايكونش فيه ولااااا فتفوتة هوا
وفى الايام دى الاكسوجين بيكون قليل جدا فى الاعماق
وده بيجبر السمك انه يخرج على وش الميه وبالذات قريب من الشواطئ وفى المياه الضحله
اماكن الصيد بالبندقيه
مكان يكون الميه فيه رايقه
وتكون الميه واقفه مش بتجرى
ودايما بتكون الاسماك واقفه قريب من البر بسبب الحر زى ماقلنا وفى اماكن ضحله الميه فيها قليله
وغير مكانك كل 10 دقايق تمشى شويه وتختار مكان جديد
لان بعد كام رشه السمك بيخاف يجى فى نفس المكان تانى غير بعد ساعه مثلا ولا حاجه
مواعيد الصيد المفضله
والمواعيد المفضله بتكون من 10 صباحا الى 3 عصرا
وكمان بلاش وانت داخل على الميه تدخل بحركات سريعه
الافضل انك تتسحب واحده واحده وتبص كويس على اطراف الميه جنب البر
لأن ده افضل مكان للاسماك فى الحر اثناء القيلوله
وتختار مكان يكون فيه بينك وبين الميه شوية بوص مثلا على البر وتستخبى وراهم
والسمكه اللى تظهر فوق الميه تقوم ضاربها
وبسرعه تجيبها بالملقاف
وسعات كتير فيه حجات هاتضربها وتغطس منك وماتعرفش تجيبها
عادى شوف غيرها
الاماكن القاتله فى جسم السمكه
هى الرأس بتتقفل مكانها
او فى منتصف الظهر من اعلى
ودى بتشلها تماما ومش بتتحرك من مكانها
تقوم لاحقها انت بالملقاف
لكن لو ضربتها فى بطنها او فى التلت الاخرانى من جسمها
بتاخد الطلقه وتجرى فى الميه وتهرب بعيد عنك
وعلى فكره مش شرط يعنى كل رشايه بسمكه
ممكن تضرب تلات اربع رشات على ماتجيب سمكه
بسبب حجات كتير
زى مثلا ظاهرة انكسار الماء
عمق الميه لو كبير بيحول مسار الرشه
وممكن السمكه تاخد طلقه وتجرى بيها
وممكن السمكه تغطس منك فى مكان عميق وماتعرفش تجيبها
كل ده عادى ماتزعلش نفسك
سيبها وشوف غيرها انا عارف انك هاتتعب
لكن معلش الموضوع يستاهل
وعلى فكره انا لسه مجرب الموضوع من فتره صغيره مش من زمان يعنى
لكن عجبنى
ودى عينه من بعض المرات اللى خرجت فيها للصيد بالبندقيه
مره اربعه كيلو

ومره اتنين كيلو

ومره 2 كيلو

ومره اتنين ونص

ومره كيلو ونص

ومره كيلو تقريبا

وان شاء الله ربنا هايكرمك وتجيب احلى سمك
وعلى فكره انا اول مره خرجت فيها للصيد بالطريقه دى مجبتش حاجه خالص
لانى مكنتش فاهم الموضوع كويس
لكن بعد كده لما فهمت بقيت باستمتع بالقنص والله
وفى مره من المرات رحت مكان لقيت هناك اتنين صيادين بالسناره قاعدين
وكانت الساعه تقريبا 2 ظهرا
ووقفت بعيد عنهم بمسافه وقعدت اصطاد بالبندقيه وهما بيتفرجو عليا
وبعد حوالى ساعتين كنت جبت حووالى 4 كيلو سمك بلطى
وجالى واحد منهم وانا باصطاد وهو مستغرب وقاللى
..........
مساء الخير يا استاذ
حضرتك عارف احنا قاعدين هنا من امتى ؟
من بعد الفجر تقريبا وكل واحد فينا يادوب جايب نص كيلو
وانت ماشاء الله عليك جايب الكميه دى فى اقل من ساعتين
حرام عليك سبلنا شويه وروح بقى
كان بيهزر طبعا
ههههههههههههههه
اتمنى ان الكل يستفيد من الموضوع
واى استفسار تانى انا فى الخدمه
وعاوز دعوات بقى على قد ماتقدرو
واللى مش هايدعى هو حر
مش هايجيب سمك خااااااالص
ههههههههههههههه
ربنا يكرمنا جميعا يارب

من مواضيعى

بالذمه ده اسمه كلا يارجاله
http://www.egypthunt.net/showthread.php?t=30091
مذبحة الجمعه بالكرال
http://www.egypthunt.net/showthread.php?t=28543
رساله الى كارهى الكرال
http://www.egypthunt.net/showthread.php?t=29417
كنا هانروح فى شربة ميه
http://www.egypthunt.net/showthread.php?t=30036
الشرح الكامل لقنص الاسماك بالبندقيه
http://www.egypthunt.net/showthread.php?t=29067
طلعة النهاره اهداء للرئيس المصرى القادم
http://www.egypthunt.net/showthread.php?t=30185
طلعة ساعه متنوعه
http://www.egypthunt.net/showthread.php?t=28988
طلعة ساعتين الصبح قبل الشغل
http://www.egypthunt.net/showthread.php?t=29990
الموضوع الشامل عن صيد اليمام ودجاج الماء ليلا
http://www.egypthunt.net/showthread.php?t=29886
نص ساعه صيد والقطه الشقيه
http://www.egypthunt.net/showthread.php?t=29646
شرح متكامل عن تمويه البنادق تجربه على الكرال والبى اس ايه
http://www.egypthunt.net/showthread.php?t=28907
تمويه الbsa بتاعتى وارجو التقييم
http://www.egypthunt.net/showthread.php?t=28570