الثورة واثرها على السوق واخر الاحداث والاسعــار

[الأفوكاتو]

شكرا لمجهودك الرائع ، ولكـــــــــــــــــــــن انا من رأيى إن التجار مغلطوش لما طبقوا سياسة العرض والطلب ، بمعني ان وقتها كان المعروض قليل والطلب كتير جدا جدا جدا جدا جدا جدا جدا ، فأي حد لو مكانهم هيعمل أسوأ من كدة ، طبعا انا عمري ما كنت تاجر ولا بجامل اي حد ايا كان علي الإطلاق ، بس هي الفكرة جاية منين ؟ ان زي ما حضرتك تفضلت وقولت : احنا شعب لقطة
برة ، الناس بيطلقوا علينا : مستهلك رائع
يبقي اللوم كل اللوم علينا احنا كمستهلكين
انك تجري تشتري مسدس صوت وتبقي طالب انه شكله يبقي زي الحي بالظبط (يبقي تستاهل لما يقولك الكيمار بريجيدير بـ3000 جنيه)
انك تجري تجيب مسدس صوت وتكون قصدك الحماية وليس الاقتناء (يبقي تستاهل لما يقولك الايكول بي 29 بـ1500)
لما تجري تسأل علي الروم وتحسسه انه هو الوحيد اللي عنده روم في مصر (يبقي تستاهل لما يقولك الروم ب4000)
يعني في الآخر احنا اللي عملنا كدة في نفسنا ، احنا اللي كنا بنوافق علي أي أسعار يقوللنا عليها ، احنا اللي كنا راضيين بمسدسات فرز عاشر وبأغلي ثمن ، علي فكرة اي تاجر كان هايضطر ينزل السعر لو مافيش اقبال ، طيب ما بالك لو كان فيه مقاطعة ؟ كان غصب عنه هيبيع بالسعر الحقيقي .
احنا اللي ادينا الفرصة للتجار إنهم يلعبوا بينا ، ويكسبو ملايين علي قفانا ، ويبيعو كميات هائلة في مدة قصيرة .
وعلي فكرة احنا شعب مشكلته إنه مش بيتعلم من غلطته السابقة ، يعني حتي لو حصلت تاني لا قدر الله وحصل إنفلات تاني ، الأسعار هتزيد ، وبردو الناس هتشتري بالسعر الجديد .
علشان كدة .. ناس كتير بتزعل مني لما بقول اننا : شعب ماكنش مستعد للثورة في الوقت الحالي .. وإننا شعب غير مؤهل للعيش بحرية في الوقت الحالي ، نظرا لأننا فضلنا ثلاثون عاما نحكم بالحديد والنار وماشيين جنب الحيط ، ولما عشنا الحرية بقت البلد مالهاش كبير وبنمشي في الشارع عكس الاتجاه والفوضي أصبحت عادة (يبقي احنا غير مؤهلين للحرية الآن) ، وعلشان نبقي مؤهلين لابد من تغيير أخلاق الأجيال ، بل لابد من تعاقب الأجيال نفسها .
في النهاية أشكرك لمجهودك الرائع .
خالص تحياتي للجميــــــــــــــــــــــــــــع