بلطجية يعتدون على ضابط ويسرقون سلاحه وسيارة الشرطة

[sayedlabib]

قبل 25 يناير حد فاكر كده كان فيه كام ظابط اخلاقهم كويسه

حد كان فاكر انه دخل قسم شرطه لمجرد تخليص اوراق حتى وماتهانش او حد من الباشوات زعقله

حد فاكر قد ايه افتروا على خلق الله خصوصا طائفة امناء الشرطه

حد فاكر كده وهو ماشى بسيارته دفع كام مره للامناء فى المرور فلوس حتى لو كان ماشى صح ومش مخالف

حد فاكر وقائع التعذيب فى اقسام الشرطه والتعامل الغير آدمى مع المساجين اللى ممكن يكون فيهم ابرياء وناس محترمين

حد فاكر قانون التحرى اللى كان يخلى اى ظابط حاقد على اى شاب ياخده تحرى فى الكمين الليلى اللى على الطرق ويحبسه فى البوكس دون وجه حق وتانى يوم يعرضه على المديرية التابع ليها عيانا بيانا فى وضح النهار امام الناس وهو مقيد بجانب بلطجى او مسجل

حد فاكر مره واحده حاول يعترض فيها على ظابط ظالم وكان الرد اسكت يا ابن الل.................. وانتو عارفين بقى

حاجات كتييييييييييييييييير جدا عملتها الداخليه والحجه دلوقتى ان الوزير القديم هو اللى كان معلمهم كده طب يا اخى لو ابوك مش هاقولك الوزير ابوك نفسه قالك اشتم الواد ده لو انتا من جواك مش عايز تشتمه عمرك ما هاتشتمه

يا جماعه افتكروا سيارة البيه الظابط اللى زجاجها فاميه بالكامل ومافيهاش نمر وماشى فى الشارع بياخد التحية من زمايله ومن الامناء

وافتكر انتا بقى لو عملت حادثه لا قدر الله والاكسدام وقع والنمر وقعت وحاططتها على الزجاج الخلفى يوقفوك ويقولولك فين النمر يا روح ...... صح مش كان بيحصل


الظلم اللى الشرطه ظلمته للناس بيتردلها دلوقتى وانا عارف ومتاكد ان فى منهم كويسين جدا ويستاهلو التعاطف والمسانده بس نسبتهم قد ايه ؟؟؟؟


اتمنى ان بعد محاولة التطهير اللى الداخليه عملتها يكون الوضع مختلف ويكون السئ اقل ويكون الظابط الخلوق هو اللى مسيطر على الداخليه ساعتها بس ممكن كلنا نساعدهم ووالله العظيم رغم كل اللى كانوا بيعملوه الا اننا كلنا فى المنطقه اللى بسكنها كنا واقفين لجان شعبيه عشان نحمى القسم والحمد لله ما تسرقش منه اى شئ ولا اتحرقت منه طوبه وكنا دايما مع الضباط وعاتبناهم وفهموا واعتذروا

اتمنى انها تكون بدايه جيده لكل الناس مع ظباط الشرطه واتمنى انكم تساعدوهم يعنى لو شوفتو مشكله وفيها ضابط ماتسيبوهوش اقفوا جنبوا لحد ماتعرفوا الحقيقه فين وهو هايرحب لانه محتاج مساعدتكم

اما من ذكرناهم من الامثله السيئة لضباط الشرطه فارجو اذا وجدتم منهم احدا اشتكوه على طول وماتسيبوهوش يزيد فى طغيانه لانها امانه ونحن تحملناها والله الموفق