توفيق عكاشة هل هو أراجوز أم نابغة

[saskon]

فى الفترة الأخيرة عرفت من المنتدى هنا ان فى واحد اسمه توفيق عكاشة وكتير كانوا بيتكلموا على انه كوميديان أو بالمعنى الاصح أراجوز ! المهم علشان مطولش عليكم قعدت ادور على المكان اللى بيطلع فيه الاراجوز ده اللى اصبح اشهر من اسماعيل ياسين فى عزه واشهر من القذافى فى اختلال قواه العقلية . لغاية لما عرفت ان فيه قناة فضائية اسمها الفراعين (معلهش استحملوا جهلى بالقنوات الفضائية) المهم قعدت اتفرج على توفيق عكاشة وخرجت من الحلقة الاولى والاخيرة بأن هذا العكاشة اما أهبل وعبيط يا إما نابغة؟ ليه بقى نابغة لأنه بيعمل حاجتين فى نفس الوقت الأولى انه بيخاطب فئة من الناس واللى هيا ممكن نقول عليها الفئة الساذجة والبسيطة واللى مبيفهموش الكلام الكبير اللى فى البرامج الحوارية والتوك شو وعايزين حد يكلمهم بالهجايص علشان يفهموا وهو واضح انه استاذ فى الهجايص دى وطبعا الفئة دى هى أغلبية الشعب التعبان اللى مايهمهوش فى الدنيا الا السبوبة ولقمة العيش. و الحاجة الثانية انه من جهة أخرى يستغل المثقفين أمثالنا فى اننا نعملوا دعاية مجانية و سريعة على اساس انه اراجوز يستحق المشاهدة علشان نضحك عليه. بس يا ترى احنا اللى بنضحك عليه ولا هوا اللى بيضحك علينا.

أنا حبيت اكتب عن هذا الموضوع بعد الانتشار الكاسح لهذا العكاشة لدرجة ان في ناس بتستنى ميعاد الحلقة بتاعته وبتواظب عليها !!!! وبعد ما شوفت كم المواضيع اللى فى المنتدى هنا عليه لدرجة ان واحد زيى معرفوش ولا عرف الفراعين دى الا من المنتدى هنا. يا جماعة دواء السفيه والمختل اجتنابه مش الدعاية له وتسهيل شهرته.

[farouk]

بس والله راجل مسلي انا شخصيا بحب اتفرج عليه وبدور علي فيديوهاته

[commando]

يا جماعة ليه التحمل على لراجل ده فى المنتدى يعنى كل الملايين دى سذج وانتم اللى عباقرة كل اللى الراجل يقوله بيتحقق انتم مش عايزيين تسمعو غير صوتكم اتقو الله شويه

[ahmed6394]

على فكرة هوا بيلعب على فئة الفلاحين

[saskon]

المشاركة الأصلية كتبت بواسطة commando

يا جماعة ليه التحمل على لراجل ده فى المنتدى يعنى كل الملايين دى سذج وانتم اللى عباقرة كل اللى الراجل يقوله بيتحقق انتم مش عايزيين تسمعو غير صوتكم اتقو الله شويه

أخى كوماندو انت بتسأل هل فى ملايين سذج الاجابة نعم وبتسأل هل احنا عباقرة الاجابة بالطبع لا. خلى بالك السذاجة اللى اقصدها هيا السذاجة السياسية و كما تعلم اننا كمصريين محرومين نهائيا من ممارسة السياسة لمدة عقود طويلة وبالتالى معظمنا عنده سذاجة سياسية. أما بالنسبة لعدم السماع الا لصوت النفس فده برده قصور عند معظمنا لأننا أيضا محرومون من الديموقراطية وليست لدينا ثقافة الاختلاف والأنا الأعلى لنا فى هذه المرحلة فى أعلى وضع وربما فعلا معظمنا لا يستمع الا لنفسه ولقناعاته الا ان الشيئ الصحى الوحيد هو اننا ايضا نستمع الى صوت المنطق والعقل بس بشرط انه يكون منطق وعقل يخاطب عقلاء واسوياء مش منطق عكاشة ومرتضى والأخت اللى بتقول مصر هيحصل فيها زلازل السنة الجاية لو مبارك مرجعش !!!!!!!!!!!
أما عن دعوتك لنا أن نتق الله شوية فأشكرك عليها وادعو الله أن يجعلنا من المتقين له دائما وليس "شوية". وأخيرا أحب أن أؤكد لك بل و أقسم لك اننى شخصيا من كبار اساطين حزب الكنبة و لكن الاوضاع الحالية العجيبة والخطاب الاعلامى الموجه من المجلس العسكرى هيخلى الواحد يخرج من هدومه.

[saskon]

المشاركة الأصلية كتبت بواسطة farouk

بس والله راجل مسلي انا شخصيا بحب اتفرج عليه وبدور علي فيديوهاته

طيب و رأيك ايه فى اللى بيقوله - مش فيه هوا شخصيا - يعنى انت مقتنع باللى بيقولوا ولا ضده ولا على الحياد؟

المشاركة الأصلية كتبت بواسطة ahmed6394

على فكرة هوا بيلعب على فئة الفلاحين

فئة البسطاء عامة وليس الفلاحين فقط. المشكلة يا أستاذ أحمد ان الناس تعبت اوى والبسطاء هم اكثرنا تعبا و اغلبهم مش عارف هل الثورة دى حلوة ولا وحشة طبعا فى حياتهم اليومية هما شايفين الثورة زى الزفت بس بيفتحوا التليفزيون يلاقوا البرامج تقولهم اصبروا اللى جاى افضل بكتير اصمدوا حياتكم هتتحسن واحنا بنعمل كده علشانكوا فيهدوا. يقوم ييجى الاخوة عكاشة وصحبه يقولولهم دول خونة دول مجرمين دول عايزين يبوظوا البلد هوا انتم شوفتوا يوم عدل من ساعة الثورة ....... وللعلم مش عكاشة بس ده في رجال اعمال بيرفدوا الناس اللى شغالة عندهم ولما يسألوهم ليه يقولوا بسبب الثورة وبكدة البسطاء دول وهم غالبية الشعب اصبحوا الد اعداء الثورة !!!